အမေရိကန် Ford ကားကုမ္ပဏီက ပြည်တွင်း၌ လာရောက်မြှုပ်နှံထားသည့် ကားတပ်ဆင်မှုစက်ရုံကို တွေ့ရစဉ်

၂၀၁၇ ခုနှစ်အတွင်း မြန်မာနိုင်ငံတွင် Brand New ကားသစ်စီးရေ ၈,၂၂၅ စီး ရောင်းချနိုင်ခဲ့ပြီး ယခင်နှစ်ကာလတူထက် ၉၇ ရာခိုင်နှုန်းကျော်များပြားခဲ့ကာ အာဆီယံ နိုင်ငံများအနက် တိုးတက်မှုနှုန်းအမြင့်ဆုံးဖြစ်နေကြောင်း ASEAN Automotive Federation မှ ထုတ်ပြန်သော ဒေသတွင်း ကားသစ် ရောင်းချမှုနှင့် ထုတ်လုပ်မှုဆိုင်ရာအစီရင်ခံစာအရ သိရသည်။

၂၀၁၇ ခုနှစ် နိုဝင်ဘာလကုန်အထိ အာဆီယံနိုင်ငံများအလိုက် ကားသစ်ရောင်းချမှု ပမာဏမှာ အင်ဒိုနီးရှားတွင် ၁,၀၇၉,၅၃၄ စီး၊ ထိုင်းတွင် ၈၇၁,၆၅၀ စီး၊ မလေးရှားတွင် ၅၇၆,၆၃၅ စီး၊ ဖိလစ်ပိုင်တွင် ၄၂၅,၆၇၃ စီး၊ ဗီယက်နမ်တွင် ၂၅၀,၆၁၉ စီး၊ စင်ကာပူတွင် ၁၁၆,၁၄၈ စီး၊ ဘရူနိုင်းတွင် ၁၁,၂၀၉ စီး၊ မြန်မာတွင် ၈,၂၂၅ စီးဖြစ်ပြီး ဗီယက်နမ်နှင့် ဘရူနိုင်း၊ မလေးရှားနိုင်ငံတို့မှလွဲ၍ ကျန်နိုင်ငံများတွင် ရောင်းအားအနည်းအများအလိုက် တိုးတက်ခဲ့ကာ မြန်မာနိုင်ငံက တိုးတက်မှုနှုန်း အမြင့်ဆုံးဖြစ်သည်။

မြန်မာနိုင်ငံတွင် ၂၀၁၇ ခုနှစ် ၁၁ လ အတွင်း လအလိုက်ရောင်းချရသည့်ကားသစ်စီးရေမှာ ဇန်နဝါရီတွင် ၄၀၅ စီး၊ ဖေဖော်ဝါရီ တွင် ၄၃၆ စီး၊ မတ်တွင် ၆၉၇ စီး၊ ဧပြီတွင် ၃၈၀ စီး၊ မေတွင် ၆၄၃ စီး၊ ဇွန်တွင် ၆၃၄ စီး၊ ဇူလိုင် တွင် ၆၀၈ စီး၊ သြဂုတ်တွင် ၇၉၀ စီး၊ စက်တင် ဘာတွင် ၇၇၆ စီး၊ အောက်တိုဘာတွင် ၉၀၇ စီး၊ နိုဝင်ဘာတွင် ၁၀၂၇ စီး၊ ဒီဇင်ဘာတွင် ၉၂၂ စီးရောင်းချခဲ့ရပြီး ယခင်နှစ်ကထက် ၄,၀၅၇ စီး ပိုမိုရောင်းချခဲ့ရပြီး တိုးတက်မှု ရာခိုင်နှုန်း ၉၇ ဒသမ ၃ ရာခိုင်နှုန်းဖြင့် အာဆီယံ နိုင်ငံများအနက် ထိပ်ဆုံးရောက်နေခြင်းဖြစ် သည်။

၂၀၁၆ ခုနှစ်တွင် မြန်မာနိုင်ငံအတွင်း ကားသစ်စီးရေ ၄,၁၆၈ စီးရောင်းချခဲ့ရပြီး ၂၀၁၇ ခုနှစ်အတွင်း မြန်မာအစိုးရ၏ကားတင်သွင်းမှုဆိုင်ရာ မူဝါဒအပြောင်းအလဲကြောင့် ကားသစ်စီးရေ ၈,၂၀၀ ကျော်အထိ ရောင်းချခဲ့ရခြင်းဖြစ်သည်။ ကားသစ်များရောင်းချမှုနှင့် ထုတ်လုပ်မှုများအတွက် မြန်မာဈေးကွက်သည် ထွန်းသစ်စဈေးကွက်တစ်ခုဖြစ်လာပြီး နှစ်အလိုက်တိုးတက်မှုနှုန်း ဆက်လက်မြင့်မားမည်ဟု ခန့်မှန်းထားကြောင်း သိရသည်။

မြန်မာနိုင်ငံတွင် ၂၀၁၇ ခုနှစ်အတွင်း လအလိုက်တပ်ဆင်ထုတ်လုပ်သည့် ကားသစ်စီးရေမှာ ဇန်နဝါရီတွင် ၁၁၄ စီး၊ ဖေဖော်ဝါရီ တွင် ၁၆၇ စီး၊ မတ်တွင် ၃၄၈ စီး၊ ဧပြီတွင် ၂၀၀ စီး၊ မေတွင် ၃၄၄ စီး၊ ဇွန်တွင် ၄၁၆ စီး၊ ဇူလိုင်တွင် ၄၇၈ စီး၊ သြဂုတ်တွင် ၅၅၉ စီး၊ စက်တင် ဘာတွင် ၆၃၈ စီး၊ အောက်တိုဘာတွင် ၅၈၈ စီး၊ နိုဝင်ဘာတွင် ၇၈၈ စီး၊ ဒီဇင်ဘာတွင် ၂၉၀ စီးတပ်ဆင်ထုတ်လုပ်နိုင်ခဲ့ပြီး ယခင်နှစ်ကာလ တူထက် ၃,၇၇၈ စီး ပိုမိုခဲ့ကာ တိုးတက်မှု ပမာဏ ၃၂၈ ရာခိုင်နှုန်းရှိခဲ့ကြောင်း ASEAN Automotive Federation အစီရင်ခံစာအရ သိရသည်။