<

ရခိုင်ပြည်နယ်အတွင်း မိခင်နှင့် မျိုးဆက်ပွား ကျန်းမာရေးစောင့်ရှောက်မှု လုပ်ငန်းများအတွက် လိုအပ်သော ဆေးနှင့်ဆေးပစ္စည်းများကို ကျန်းမာရေးဝန်ကြီးဌာနက UNFPA အဖွဲ့နှင့် ညှိနှိုင်းလုပ်ဆောင်မည်

ရခိုင်ပြည်နယ် မောင်တောဒေသအတွင်း ရွေ့လျားဆေးအဖွဲ့က ကျန်းမာရေးစောင့်ရှောက်မှုပေးနေစဉ်

ကျန်းမာရေးနှင့် အားကစားဝန်ကြီးဌာနအနေဖြင့် ရခိုင်ပြည်နယ်အတွင်း မိခင်နှင့် မျိုးဆက်ပွားကျန်းမာရေး စောင့်ရှောက်မှုလုပ်ငန်းများအတွက် လိုအပ်သော ဆေးနှင့်ဆေးပစ္စည်းများကို UNFPA အဖွဲ့နှင့်    ညှိနှိုင်းလုပ်ဆောင်သွားမည်ဖြစ်ကြောင်း သိရသည်။

ပြည်ထောင်စုအစိုးရနှင့် ရခိုင်ပြည်နယ် အစိုးရတို့အနေဖြင့် ရခိုင်ပြည်နယ်အတွင်း နေထိုင်လျက်ရှိသော လူ့အဖွဲ့အစည်းများအား ဘာသာရေး၊ လူမျိုးရေး၊ ကျား/ မ ဆိုင်ရာ သို့မဟုတ် နိုင်ငံသားဖြစ်တည်မှုတို့ အပေါ် အခြေခံသည့် ခွဲခြားမှုများကို မပြုလုပ်ဘဲ ထိုအဖွဲ့အစည်းများအားလုံး တူညီသော ကျန်းမာရေးဆိုင်ရာ ဆေးကုသခွင့်များ တစ်ပြေးညီရရှိရန် လုပ်ဆောင်ပေးသွားမည်ဖြစ်ကြောင်း  သိရသည်။

ဝန်ကြီးဌာနအနေဖြင့် ဆေးရုံများအားလုံး၌ မည်သည့်လူမျိုးဖြစ်စေ၊ မည်သည့် ဘာသာကိုးကွယ်သည်ဖြစ်စေ၊ ကျား/ မ ဖြစ်စေ၊ မည်သည့် နိုင်ငံသားဖြစ်စေ ဆေးကုသခွင့်ရရှိရေးအတွက် ဆောင်ရွက်လျက်ရှိပြီး ထိုသို့ဆက်လက်ဆောင်ရွက်နိုင်ရေးအတွက် ဆေးရုံများနှင့် ကျန်းမာရေးဌာနများအားလုံးသို့ ညွှန်ကြားချက်များ ထပ်မံထုတ်ပြန်သွားရန်ရှိကြောင်းနှင့် ရွေ့လျားဆေးအဖွဲ့များဖြင့် ဆေးကုသပေးခြင်းနှင့် ပြည်သူ့ကျန်းမာရေးစောင့်ရှောက်မှု လုပ်ငန်းများ (ကာကွယ်ဆေးထိုးနှံပေးခြင်း၊ အာဟာရစောင့်ရှောက်မှုပေးခြင်း၊ မိခင်နှင့်ကလေးကျန်းမာရေး စောင့်ရှောက်မှုလုပ်ငန်းများစသည့် လုပ်ငန်းများ) ဆောင်ရွက်ရာ၌လည်း ခွဲခြားမှုမျိုးမရှိစေရေး အတွက်ဆက်လက်ဆောင်ရွက်သွားမည်ဖြစ်ရာ ပြည်နယ်၊ ခရိုင်၊ မြို့နယ်နှင့် အောက်ခြေအဆင့်များအားလုံးသို့ ညွှန်ကြားချက်များ ထပ်မံထုတ်ပြန်သွားမည်ဖြစ်ကြောင်း သိရသည်။

ထိုလူ့အဖွဲ့အစည်းများအားလုံး တူညီသော ကျန်းမာရေးဆိုင်ရာ ဆေးကုသခံယူ ခွင့်များရှိသည်ဟူသော အချက်ကို အများပြည်သူသိရှိကြစေရန်အတွက် ရပ်ကွက်/ ကျေးရွာများအတွင်းရှိ ကျန်းမာရေးလုပ်သားများနှင့် စေတနာ့ဝန်ထမ်းများအား အသိပေးသွားမည်ဖြစ်ပြီး ရပ်ကွက်/ကျေးရွာများ အတွင်းရှိ ဆေးကုသမှုလိုအပ်သော ပြည်သူများအားလုံးကို ခွဲခြားမှုမရှိဘဲ ဆေးရုံ၊ ဆေးခန်းများသို့ လာရောက်ပြသစေရေးအတွက် ရပ်ကွက်ကျေးရွာများအတွင်း အသိပေးခြင်းများကို ဆောင်ရွက်သွားမည်ဖြစ်ကြောင်း သိရသည်။

ထို့ပြင် ဆေးရုံ၊ ကျန်းမာရေးဌာနတိုင်း၌လည်း ‘ဆေးကုသမှုခံယူနိုင်ခြင်း အသိပေး ကြေညာချက်’ ကို ချိတ်ဆွဲသွားနိုင်ရေးအတွက် အဆင့်ဆင့်တင်ပြ၍ အတည်ပြုချက် ရယူသွားမည်ဖြစ်ပြီး အဆိုပါ အသိပေးကြေညာချက်ကို ရခိုင်ပြည်နယ်အတွင်းရှိ ဆေးရုံနှင့် ကျန်းမာရေးဌာနအားလုံး၌ ချိတ်ဆွဲသွားနိုင်ရေးအတွက် ဆက်လက်ဆောင်ရွက်ပေးသွားမည်ဖြစ်ကြောင်း သိရသည်။

ရခိုင်ပြည်နယ်မြောက်ပိုင်း၌ နားဆင်နိုင်သော မေယု FM ရေဒီယို၌လည်း ရခိုင်ပြည်နယ်အတွင်း နေထိုင်လျက်ရှိသော မည်သူမဆို ဘာသာရေး၊ လူမျိုးရေး၊ ကျား/ မ ဆိုင်ရာ သို့မဟုတ် နိုင်ငံသားဖြစ်တည်မှုတို့ အပေါ်အခြေခံသည့် ခွဲခြားမှုများကို မပြုလုပ်ဘဲ ဆေးရုံ၊ ကျန်းမာရေးဌာနနှင့် ရွေ့လျားဆေးအဖွဲ့များ၏ ယာယီဆေးခန်းများ၌ ကျန်းမာရေး စောင့်ရှောက်မှုခံယူနိုင်ကြောင်း အသိပေးခြင်းကို ပုံမှန်ထုတ်လွှင့်သွားနိုင်ရေး ညှိနှိုင်းဆောင်ရွက်သွားမည်ဖြစ်ကြောင်း  သိရသည်။

February 3, 2018














Copy Protected by Chetan's WP-Copyprotect.