မြစိမ်းရောင်စီမံကိန်းတွင် အားနည်းချက်များ ရှိနေပြီး စီမံကိန်းကော်မတီဝင်များသည် ကျေးရွာသားများထက် အဆပေါင်းများစွာ ချေးငွေရယူထားကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးလှကျော်က ပြည်သူ့လွှတ်တော်တွင် ပြောကြားသည်။
နေပြည်တော်၌ ဖေဖော်ဝါရီ ၂ ရက်က ပြုလုပ်သည့် ဒုတိယအကြိမ် ပြည်သူ့လွှတ်တော် သတ္တမပုံမှန်အစည်းအဝေး ၁၁ ရက်မြောက်နေ့တွင် အိမ်မဲမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါ်သန္တာက မေးမြန်းသည့် ကျေးရွာအဆင့် မြစိမ်းရောင် ရန်ပုံငွေ ကြီးကြပ်မှု ကော်မတီများကို ပြည်သူလူထုမှ တိုင်ကြားမှုနှင့်ပတ်သက်၍ မည်သို့ စစ်ဆေးဖြေရှင်းပေးမည်ကို သိလိုခြင်းနှင့် စပ်လျဉ်းသည့် မေးခွန်းကို ဒုတိယဝန်ကြီးက ဖြေကြားရာတွင် အထက်ပါအတိုင်း ပြောကြားခဲ့ခြင်းဖြစ်သည်။
“မြစိမ်းရောင်စီမံကိန်းမှာ အားနည်းချက်တွေ ရှိပါတယ်။ ဒီလိုအားနည်းချက်ဟာ ဘယ်သူ့အပေါ်မှာ မူတည်လဲဆိုတော့ ဒီစီမံကိန်းကို ကြီးကြပ်အကောင်အထည်ဖော်ရတဲ့ လုပ်ငန်းကော်မတီပေါ်မှာ မူတည်ပါတယ်။ အကောင်အထည်ဖော် ဆောင်ရွက်တဲ့နေရာမှာ ကော်မတီဝင်တွေဟာ တွေ့ရှိရတဲ့ အတွေ့အကြုံအရ ကျေးရွာသူ ကျေးရွာသားတွေထက် အဆပေါင်းများစွာ ချေးငွေရယူထားပြီးတော့ ကျေးရွာသားတွေအတွက် နည်းပါးတဲ့ ချေးငွေကို ထုတ်ချေးတဲ့အတွက် တိုင်ကြားလာမှုတွေ ရှိပါတယ်။ ကျေးရွာသူ၊ ကျေးရွာသားတွေအနေနဲ့ ဒီလိုကော်မတီမှာ မရိုးမဖြောင့်တဲ့ လုပ်ဆောင်မှုကြောင့် ချေးငွေတွေ ပြန်လည်ရယူဖို့ အတွက် တရားစွဲဆိုရတဲ့ဖြစ်စဉ်တွေလည်း ရှိပါတယ်။ ကော်မတီဝင်တွေရှိတဲ့ ကျေးရွာသားတွေအတွက်ကိုတော့ ကော်မတီက တရားစွဲဆိုရပါတယ်။ ကော်မတီဝင်က အလွဲသုံးစားလုပ်တာကျတော့ ကော်မတီဝင် အချင်းချင်းကပဲ ပြန်လည် တရားစွဲခိုင်းရပါတယ်” ဟု ဒုတိယဝန်ကြီး ဦးလှကျော်က ပြောကြားသည်။
ဒုတိယဝန်ကြီးဦးလှကျော်၏ ဖြေကြားချက်နှင့် ပတ်သက်ပြီး မေးခွန်းရှင် ပြည်သူ့ လွှတ်တော်ကိုယ်စားလှယ် ဒေါ်သန္တာက ထပ်ဆင့်မေးခွန်းမေးမြန်းသည်။
ထပ်ဆင့်မေးခွန်းတွင် “မြစိမ်းရောင် ချေးငွေစီမံကိန်းရဲ့ငွေတွေဟာ ပြည်သူ့ဘဏ္ဍာတွေပဲ ဖြစ်ပါတယ်။ ဝန်ကြီးဖြေသွားတဲ့အထဲမှာ အလွဲသုံးစားလုပ်တာ ပေါ်လွင်ပါတယ်။ ဒီလို ကော်မတီလေး ပြောင်းလဲဖွဲ့စည်းတာနဲ့ ပြီးသွားပြီလား။ နိုင်ငံတော်ရဲ့ဘဏ္ဍာကို ဒီလိုအလွဲသုံးစား ရည်ရွယ်ချက် ရည်မှန်းချက်တွေပျောက်အောင် အလွဲသုံးစားလုပ်တဲ့သူတွေကိုလည်း စစ်ဆေးအရေးယူမှုတွေ မရှိတော့ဘူးလား” ဟု ဒေါ်သန္တာက မေးမြန်းသည်။
ဒုတိယဝန်ကြီး၏ ဖြေကြားမှုနှင့် ပတ်သက်ပြီး ပြည်သူ့လွှတ်တော် ကိုယ်စားလှယ် ဒေါ်သန္တာက “လေ့လာကြည့်တဲ့အခါကျတော့ ဒီချေးငွေကြောင့် ဆင်းရဲနွမ်းပါးမှု လျော့သွားလားဆိုတော့ မလျော့သွားဘူး။ ဒါဆိုရင် ဒီရည်ရွယ်ချက်က မအောင်မြင်ဘူး ဖြစ်တာပေါ့။ ဒီမြစိမ်းရောင်စီမံကိန်းရဲ့ လာတဲ့ဘတ်ဂျက်က နိုင်ငံတော်ရဲ့ ဘတ်ဂျက်ဖြစ်တယ်။ နိုင်ငံတော်ရဲ့ ဘတ်ဂျက်က အကျိုးရှိရှိ သုံးမလား မသုံးဘူးလားဆိုတဲ့အပေါ် မူတည်တယ်။ ဒါကြောင့် ဒီမေးခွန်းကို မေးတာဖြစ်တယ်။ ဝန်ကြီးဌာနရဲ့ ဖြေကြားချက်က ကျေနပ်မှုတော့ အပြည့်မရှိဘူး။ ဘာလဲဆိုတော့ ပြည်သူလူထု အချင်းချင်းကို ပြန်တိုင်ခိုင်းသလိုဖြစ်တယ်။ အချင်းချင်းကိုပဲ တရားပြန်စွဲပါ။ ဒီမှာ တစ်ချက်ကြည့်ရမှာက ဒါအချင်းချင်းရဲ့ပုဂ္ဂလိက ပိုက်ဆံ မဟုတ်ဘူး။ နိုင်ငံတော်ဘတ်ဂျက်ဖြစ်တယ်။ နိုင်ငံတော်ဘတ်ဂျက်ကို အလွဲသုံးစားလုပ်တာသည် တရားမကြောင်းမှာရော ရာဇဝတ်ကြောင်းမှာရော အများကြီးရှိတယ်။ ဒီဟာအပေါ်မှာ အချင်းချင်း ပြန်ပြီး တရားစွဲခိုင်းတယ်ဆိုတာ တရားစီရင်ရေးစနစ်သွားတဲ့ အခါမှာလည်း ရှုပ်ထွေးတယ်။ ကျေးလက်နေ ပြည်သူလူထုက အချင်းချင်း တရားပြန်စွဲဖို့ဆိုတာ ဘယ်လိုမှမဖြစ်နိုင်ဘူး။ ဖြစ်စေချင်တာ စီမံကိန်းကြီးတစ်ခုလုံး ပြန်သုံးသပ်ပြီးတော့ နိုင်ငံတော်ဘဏ္ဍာ အလွဲသုံးစား လုပ်နေသူတွေကို ဌာနကပဲ အရေးယူစေချင်တယ်” ဟု ပြောကြားသည်။
မြစိမ်းရောင် ကျေးရွာစီမံကိန်းကို ၂၀၁၄-၂၀၁၅ ခုနှစ်က စတင်ဆောင်ရွက်ခဲ့ပြီး ကျေးရွာတစ်ရွာလျှင် အရင်းမပျောက် လည်ပတ်ရန်ပုံငွေ ကျပ်သန်း ၃၀ မတည်ပေးခြင်းဖြစ်ကာ အဆိုပါရန်ပုံငွေကို ကျေးရွာလူထုမှ အများသဘောတူ မဲစနစ်ဖြင့် အမျိုးသမီးဦးရေ ထက်ဝက် ပါဝင်ရွေးချယ်ထားသော ကျေးရွာကိုယ်စားလှယ်များဖြင့် ဖွဲ့စည်းထားသည့် ကျေးရွာရန်ပုံငွေ ကြီးကြပ်မှုကော်မတီနှင့် ဘဏ္ဍာရေးဆပ်ကော်မတီတို့မှ စီမံခန့်ခွဲကာ ရန်ပုံငွေ လည်ပတ်ခြင်းဆိုင်ရာ အကြံဉာဏ်များ၊ အခက်အခဲများ ဖြေရှင်းပေးရန်နှင့် အုပ်ချုပ်ရေးဆိုင်ရာ ကိစ္စရပ်များတွင် ပေါင်းစပ် ဆောင်ရွက်ပေးရန်အတွက် ကျေးရွာအုပ်ချုပ်ရေးမှူး (သို့မဟုတ်) ရာအိမ်မှူးက ကော်မတီ နာယကအဖြစ် ဆောင်ရွက်ကြောင်း သိရသည်။
လက်ရှိအချိန်တွင် ကော်မတီအသစ်ကို ၂၀၁၈ ခုနှစ် ဇန်နဝါရီ ၅ ရက်က ပြန်လည် ရွေးချယ်ခဲ့ပြီး အသင်းသားများသို့ ထုတ်ချေးငွေနှင့်ပတ်သက်၍ ပိုလျှံထုတ်ယူငွေများကို ဘဏ်သို့ အပ်နှံခြင်း၊ ကြိုတင်ကောက်ယူသည့် အတိုးငွေများကို ကော်မတီအသစ်သို့ လွဲှပြောင်းခြင်းတို့ကို ဆောင်ရွက်ကာ ၂၀၁၈ ခုနှစ် ဇန်နဝါရီ ၉ ရက်တွင် ကော်မတီအသစ်နှင့် ကော်မတီအဟောင်းတို့ စာရင်းဇယားလွဲှပြောင်းခြင်းနှင့် ငွေထုတ်သူ ပြောင်းလဲခြင်း လုပ်ငန်းများကို မြို့နယ်ကျေးလက်ဦးစီးမှူးရုံးတွင် ဆောင်ရွက်ခဲ့ပြီးဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးလှကျော်က ပြောကြားသည်။
