ဇန်နဝါရီ ၃၁ ရက်ကပြုလုပ်သော ဒုတိယအကြိမ် ပြည်ထောင်စုလွှတ်တော် သတ္တမပုံမှန်အစည်းအဝေး ဆဋ္ဌမနေ့ မကျင်းပမီမြင်ကွင်း
လွှတ်တော်နှစ်ရပ် သဘောကွဲလွဲသည့် မြန်မာနိုင်ငံ လွှတ်တော်အဖွဲ့ဥပဒေကြမ်းအား ပြည်ထောင်စုလွှတ်တော်က ဇန်နဝါရီ ၃၁ ရက်တွင် တစ်ပိုဒ်ချင်းစီအလိုက် အတည်ပြုခဲ့သည်။
ပြည်သူ့လွှတ်တော်က ပြင်ဆင်ချက်များဖြင့် ပေးပို့လာသည့် မြန်မာနိုင်ငံလွှတ်တော်အဖွဲ့ ဥပဒေကြမ်းအား အမျိုးသားလွှတ်တော်က ပြင်ဆင်ချက်များဖြင့် နိုဝင်ဘာ ၈ ရက်ကအတည်ပြုခဲ့ပြီး လွှတ်တော်နှစ်ရပ် သဘောကွဲလွဲသည့်အတွက် ဇန်နဝါရီ ၂၄ ရက်ကပြုလုပ်သည့် ပြည်ထောင်စုလွှတ်တော် အစည်းအဝေးတွင် ဥပဒေကြမ်းပူးပေါင်းကော်မတီက အစီရင်ခံစာတင်သွင်းခဲ့သည်။
ဥပဒေကြမ်း၏ ပုဒ်မ ၇ (စ) တွင် ဥပဒေကြမ်း ပူးပေါင်းကော်မတီ၏ ပြင်ဆင်ချက်ဖြစ်သည့် အစည်းအဝေးအထမြောက်ခြင်းမရှိပါက ဥက္ကဋ္ဌသည် အဖွဲ့ဝင်များ၏ တင်ပြချက်များနှင့် အကြံပြုချက်များကို စာဖြင့်ပေးပို့ရန် တောင်းယူနိုင်သည်ဟု ပြင်ဆင်ချက်ကို ပြည်ထောင်စုလွှတ်တော်က အတည်ပြုခဲ့သည်။
ဥပဒေကြမ်း၏ ပုဒ်မ ၁၄ တွင် ပြည်သူ့လွှတ်တော်၏ ပြင်ဆင်ချက်ဖြစ်သည့် လွှတ်တော်အဖွဲ့အတွင်းရေးမှူးသည် လွှတ်တော်အဖွဲ့၏ ဆောင်ရွက်မှုအစီရင်ခံစာကို ပြည်ထောင်စုလွှတ်တော်တွင် တင်ပြရမည့်အပြင် သက်ဆိုင်ရာလွှတ်တော်များသို့လည်း ပေးပို့ရမည်ဟု ပြင်ဆင်ချက်ကို ပြည်ထောင်စုလွှတ်တော်က အတည်ပြုခဲ့သည်။
အဆိုပါလွှတ်တော်အဖွဲ့တွင် ပြည်ထောင်စုလွှတ်တော် နာယကသည် ဥက္ကဋ္ဌ၊ ပြည်ထောင်စုလွှတ်တော် ဒုတိယနာယကမှာ အတွင်းရေးမှူး၊ ဒုတိယဥက္ကဋ္ဌများအဖြစ် ပြည်သူ့လွှတ်တော်နှင့် အမျိုးသားလွှတ်တော်ဥက္ကဋ္ဌ၊ အဖွဲ့ဝင်များအဖြစ် တိုင်းဒေသကြီးနှင့် ပြည်နယ်လွှတ်တော်ဥက္ကဋ္ဌများဖြင့် ဖွဲ့စည်းရန် အတည်ပြုခဲ့သည်။
ထို့ပြင် မြန်မာနိုင်ငံလွှတ်တော်အဖွဲ့၏ သက်တမ်းအား ပြည်ထောင်စုလွှတ်တော်၏ သက်တမ်းဖြစ်ကြောင်း၊ ပြည်ထောင်စုလွှတ်တော် ညွှန်ကြားရေးမှူးချုပ်သည် လွှတ်တော်အဖွဲ့ရုံး၏ ရုံးအဖွဲ့မှူးဖြစ်ကာ အစည်းအဝေးကို တစ်နှစ်လျှင် အနည်းဆုံးတစ်ကြိမ် ကျင်းပရမည်ဖြစ်ကြောင်း အတည်ပြုခဲ့သည်။
ဥပဒေကြမ်း၏အခန်း ၄ တွင် လွှတ်တော်အဖွဲ့၏ လုပ်ငန်းတာဝန်များအဖြစ် အခန်း ၄ ပုဒ်မ ၈ (ခ) တွင် ဖွဲ့စည်းပုံအခြေခံဥပဒေပါ ပြဋ္ဌာန်းချက်များ၊ လွှတ်တော်ဆိုင်ရာဥပဒေများနှင့် ဆန့်ကျင်ခြင်းမရှိစေဘဲ ဥပဒေပြုခြင်းဆိုင်ရာ ကိစ္စရပ်များနှင့်စပ်လျဉ်းပြီး ညှိနှိုင်းဆောင်ရွက်ခြင်း၊ (ဂ) ပြည်ထောင်စုနှင့် တိုင်းဒေသကြီး သို့မဟုတ် ပြည်နယ်များ ဆက်နွှယ်အကျုံးဝင်သော ကိစ္စရပ်များနှင့်စပ်လျဉ်း၍ ညှိနှိုင်းဆောင်ရွက်ခြင်း၊ (ဃ) လွှတ်တော်အဖွဲ့၏ လုပ်ငန်းများဖွံ့ဖြိုးတိုးတက်ရေး၊ လွှတ်တော်ကိုယ်စားလှယ်များ၏ စွမ်းရည်မြှင့်တင်ရေးနှင့် လွှတ်တော်ဝန်ထမ်းများ၏ လုပ်ငန်းစွမ်းဆောင်ရည်မြှင့်တင်ရေးတို့အတွက် ဆွေးနွေးဆောင်ရွက်ခြင်း၊ ပြည်တွင်းပြည်ပသင်တန်းများ၊ အလုပ်ရုံဆွေးနွေးပွဲများ၊ အစည်းအဝေးများ၊ ညီလာခံများနှင့် လေ့လာရေးခရီးစဉ်များ စေလွှတ်ခြင်း စသည်ဖြင့်အတည်ပြုခဲ့သည်။
အောက်တိုဘာ ၂၆ ရက်ကပြုလုပ်သည့် အမျိုးသားလွှတ်တော်အစည်းအဝေးတွင် ယင်းဥပဒေကြမ်းနှင့်ပတ်သက်ပြီး ရခိုင်အမျိုးသားပါတီမှ ကိုယ်စားလှယ်သုံးဦး၊ အမျိုးသားဒီမိုကရေစီအဖွဲ့ချုပ်ပါတီမှနှစ်ဦး၊ တပ်မတော်သားကိုယ်စားလှယ် နှစ်ဦး၊ တစ်သီးပုဂ္ဂလကိုယ်စားလှယ် တစ်ဦးတို့ ဆွေးနွေးခဲ့သည်။ အမျိုးသားဒီမိုကရေစီအဖွဲ့ချုပ်ပါတီမှ ကိုယ်စားလှယ်နှစ်ဦး ထောက်ခံဆွေးနွေးခဲ့ပြီး တပ်မတော်သားကိုယ်စားလှယ်၊ ရခိုင်အမျိုးသားပါတီကိုယ်စားလှယ်၊ တစ်သီးပုဂ္ဂလကိုယ်စားလှယ်တို့က ပြဋ္ဌာန်းရန်မသင့်ကြောင်း ဆွေးနွေးခဲ့သည်။
