<

ထိုင်းရေတပ်က လာအိုနိုင်ငံသားတစ်ဦးထံမှ ဖမ်းဆီးရမိသည့် စိတ်ကြွဆေးပြား ၁၁ သန်းကို ‘၀’ အဖွဲ့ကထုတ်လုပ်သည်ဟူသော ဖော်ပြချက်များသည် မဟုတ်မှန်ဘဲ ငြင်းဆိုကန့်ကွက်ကြောင်း UWSP/UWSA ဖြေရှင်း

ထိုင်းရေတပ်က လာအိုနိုင်ငံသားတစ်ဦးထံမှ ဖမ်းဆီးရမိသည့် စိတ်ကြွဆေးပြား ၁၁ သန်းကို ‘၀’အဖွဲ့က ထုတ်လုပ်သည်ဟူသော ဖော်ပြချက်များသည် မဟုတ်မှန်ဘဲ ငြင်းဆိုကန့်ကွက်ကြောင်း ‘၀’ သွေးစည်းညီညွတ်ရေးပါတီ (UWSP/UWSA ) ၏ လားရှိုးဆက်ဆံရေးရုံး ဒုတိယတာဝန်ခံ ဦးညီရန်း၏ Facebook စာမျက်နှာမှတစ်ဆင့် ဇန်န၀ါရီ ၂၈ ရက်တွင် ပြန်လည်ဖြေရှင်းထားသည်။

ဦးညီရန်း၏ Facebook စာမျက်နှာတွင် “လူမှုကွန်ရက် Facebook နှင့် Media ၌ ပြန့်နှံ့လျက်ရှိသော ၉၉၉ တံဆိပ် စိတ်ကြွဆေးယာဘတန်ဖိုး အမေရိကန်ဒေါ်လာသန်း ၁၀၀ နှင့် လာအိုနိုင်ငံသားတစ်ဦးတို့အား ထိုင်းမြစ်ကြောင်းကင်းလှည့်တပ်ဖွဲ့မှ ဖမ်းဆီးရမိ၊ ‘၀’ တပ်ဖွဲ့ထုတ်လုပ်ဟူသော သတင်းရှင်းလင်းချက်’ ဟု ဖော်ပြထားသည်။

အဆိုပါရှင်းလင်းချက်တွင် ၉၉၉ တံဆိပ် ဖမ်းမိတိုင်း ‘၀’ တပ်ဖွဲ့ဟုစွပ်စွဲ၍မရကြောင်း၊ ဖမ်းမိသည့် လာအိုနိုင်ငံသားသည် မိမိတို့ တပ်ဖွဲ့နှင့် သက်ဆိုင်ခြင်းမရှိကြောင်း ရေးသားထားသည်။

ထို့ပြင် ထိုင်းနှင့် လာအိုနိုင်ငံနယ်စပ် မဲခေါင်မြစ် Nakhon Phanom ဆိပ်ကမ်းသည် UWSP/UWSA တပ်ဖွဲ့များထိန်းချုပ်ရာ ကုန်းတွင်းဒေသနှင့်သော်လည်းကောင်း မူးယစ်ဆေးဝါးထုတ်လုပ်မှုအမည်ဆိုးဖြင့် ကျော်ကြားသည့် ရွှေတြိဂံဒေသနှင့်သော်လည်းကောင်း၊ မဲခေါင်မြစ်ကြောင်းအတိုင်း ရေမိုင် ၅၀၀ ခန့်နှင့် အဖြောင့်တိုင်း ကုန်းမိုင် ၆၅၀ ခန့်ကွာဝေးကြောင်း၊ မြန်မာနိုင်ငံနှင့် ထိစပ်နေသော ရှည်လျားသည့် မဲခေါင်မြစ် ကြောင်းတစ်လျှောက်အား UWSA တပ်ဖွဲ့များမှ ထိန်းချုပ်ခြင်းလုံးဝမရှိကြောင်းလည်း  ရှင်းလင်းချက်တွင်ပါရှိသည်။

မဲခေါင်မြစ်ရေပြင်ကို မြန်မာ၊ တရုတ်၊ လော (လာအို)၊ ထိုင်း လေးနိုင်ငံတပ်ဖွဲ့များမှ မြစ်တွင်းကင်းလှည့်ရေယာဉ်များသည် မျက်ခြည်မပြတ် ပူးတွဲကင်းလှည့်ခြင်းများနှင့်အတူ ဆက်စပ်မြေပြင်ဒေသများအား ဒေသခံပြည်သူ့စစ်၊ ယခင် ဘိန်းဘုရင် ခွန်ဆာ၏ နောက်လိုက် SURA ဗိုလ်ကြီးနော်ခမ်း (တရုတ်ပြည် သေဒဏ်ကွယ်လွန်) လက်ကျန်မူးယစ်ဂိုဏ်းဝင်များနှင့် အခြားနိုင်ငံစုံမှ မူးယစ်ကုန်သည်များ လှုပ်ရှားနေဆဲဖြစ်ကြောင်းလည်း ‘၀’ အဖွဲ့က ပြန်လည်ဖြေရှင်းထားသည်။

ရွှေတြိဂံဒေသမှ ရေမိုင် ၅၀၀ ခရီးတွင် မူးယစ်ကိစ္စများ၌ နာမည်ဆိုးနှင့် ကျော်ကြားသော ထိုင်းနှင့် လော (လာအို) နိုင်ငံများကို ကျော်ဖြတ်ရမည်ဖြစ်သောကြောင့် ၉၉၉ တံဆိပ်ယာဘဆေးလုံးရေ ၁၁ သန်း (၃၇ အိတ်) သည် ‘၀’ တိုင်းရင်းသားလက်နက် ကိုင်အဖွဲ့မှ ထုတ်လုပ်ခြင်းဟူသော သက်သေခိုင်လုံမှုမရှိ၊ အခြေအမြစ်မရှိ တစ်ဖက်သတ် စွပ်စွဲချက်သတင်းများသာဖြစ်ကြောင်းနှင့် မဟုတ်မှန်ကြောင်း ခိုင်မာစွာ ငြင်းဆိုကန့်ကွက်ကြောင်း ပြန်လည်ရှင်းလင်းထားသည်။

January 29, 2018














Copy Protected by Chetan's WP-Copyprotect.