သမဂ္ဂရုံးခန်း သော့ခတ်ထားမှုကို တွေ့ရစဉ်
ရတနာပုံတက္ကသိုလ် ကျောင်းသားများ သမဂ္ဂရုံးခန်း ပြန်လည်သိမ်းဆည်းခံရကြောင်းနှင့် သပိတ်စခန်းဖြိုခွင်းခံရစဉ်က ကျောင်းသားကျောင်းသူများ၏ ပစ္စည်းများ ယခုအချိန်ထိ ပြန်လည်ရရှိခြင်း မရှိသေးကြောင်း ရတနာပုံတက္ကသိုလ်ကျောင်းသားများသမဂ္ဂ (ဗကသများအဖွဲ့ချုပ်) မှ သိရသည်။
ရတနာပုံတက္ကသိုလ်ကျောင်းသားများ သမဂ္ဂ (ဗကသများအဖွဲ့ချုပ်) ဥက္ကဋ္ဌကို ကျော်သီဟရဲကျော်က “ခုမနက်ပဲ ကျွန်တော်တို့ကို ရဲဘော်ကျောင်းသားတွေက အကြောင်းကြားလာပါတယ်။ ကျွန်တော်တို့သမဂ္ဂရုံးခန်းကို ကျောင်းကပြန်သိမ်းလိုက်ပြီလို့ ကြားပါတယ်။ ကျွန်တော်တို့သမဂ္ဂက ခတ်ထားတဲ့သော့ကို ဖျက်ပြီးသူတို့က သော့အသစ်ခတ်သွားတယ်လို့ သိရတယ်။ သမဂ္ဂအဖွဲ့ဝင် ကျောင်းသားတွေကို ကျောင်းထုတ်တယ်။ နောက်ပြီး ခုလိုရုံးခန်းပြန်သိမ်းတာဟာ သမဂ္ဂရပ်တည်မှုကျောင်းထဲမှာ တည်ရှိနေတာကို လိုက်လံဖိနှိပ်နေတယ်လို့ ထင်ပါတယ်” ဟု ရုံးခန်းအသိမ်းခံရမှုဖြစ်စဉ်နှင့် ပတ်သက်၍ ပြောကြားသည်။
ကျောင်းသားများနေရပ်သို့ ပြန်လည်ပို့ဆောင်ခံရပြီးနောက် တိုက်ပွဲဝင်ကော်မတီဝင်များ ရတနာပုံတက္ကသိုလ်သို့ ပြန်ရောက်လာစဉ် သမဂ္ဂရုံးခန်းမှာ သော့ဖျက်ဆီးခံခဲ့ရပြီး ပစ္စည်းများ သိမ်းဆည်းခံခဲ့ရကြောင်း၊ ဇန်နဝါရီ ၂၈ ရက်တွင်မူကျောင်း အာဏာပိုင်များက သော့အသစ် ပြန်ခတ်သွားခဲ့ကြောင်း၊ ထို့ပြင် သပိတ်စခန်းဖြိုခွင်းခံရစဉ်က ကျောင်းသားကျောင်းသူများကို၏ ပစ္စည်းများကို ကျောင်းတာဝန်ရှိသူများမှ ပြန်လည်အပ်နှံနိုင်ရန် ဖိတ်ခေါ်ခဲ့သော်လည်း ကျောင်းသားများဘက်မှ လက်ခံခဲ့ခြင်းမရှိကြောင်း သိရသည်။
ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ် ပညာရေးအသုံးစရိတ် တိုးမြှင့်ရေးတိုက်ပွဲကော်မတီမှ ဦးဆောင်ကာ တက္ကသိုလ်ပေါင်းစုံမှ ကျောင်းသူကျောင်းသားများပါဝင်သည့် ဆန္ဒပြတောင်းဆိုမှုကို ဇန်နဝါရီ ၂၂ ရက် နံနက် ၉ နာရီမှ စတင်ပြုလုပ်ခဲ့ကာ ဇန်နဝါရီ ၂၂ ရက်၊ ၂၃ ရက်၊ ၂၄ ရက်တို့တွင် ပညာရေးဝန်ကြီးဌာန တာဝန်ရှိသူများနှင့် ညှိနှိုင်းဆွေးနွေးခဲ့သော်လည်း ပြေလည်ခဲ့ခြင်းမရှိခဲ့သောကြောင့် ဇန်နဝါရီ ၂၅ ရက်တွင် အစာငတ်ခံဆန္ဒပြမည်ဖြစ်ကြောင်း သတင်းစာရှင်းလင်းပွဲပြုလုပ်ကာ အသိပေးခဲ့ပြီးနောက် ဇန်နဝါရီ ၂၅ ရက် နံနက် ၄ နာရီတွင် ဖမ်းဆီးခဲ့ခြင်းဖြစ်သည်။
ထို့နောက်ကျောင်းသားများကို မန္တလာသီရိအားကစားကွင်းသို့ ခေါ်ဆောင်လာခဲ့ပြီးနောက် နေအိမ်အသီးသီးသို့ လိုက်လံပို့ဆောင်ခဲ့ခြင်း ဖြစ်သည်။
မြန်မာနိုင်ငံပညာရေး အသုံးစရိတ်ကို ယခင်နှစ် ၂၀၁၆-၂၀၁၇ ပညာသင်နှစ်အတွက် ဘီလျံ ၁၆၉၀ ရရှိခဲ့ပြီး ဘီလျံ ၁၀၀၀ ခန့်ကို ပညာရေးဝန်ထမ်းများအတွက် အသုံးပြုခဲ့ကြောင်း၊ နိုင်ငံတစ်ဝန်းရှိ အခြေခံကျောင်းများမှစတင်ကာ တက္ကသိုလ်အဆင့်ထိ ကျောင်းသားဦးရေ ၇၉ သန်းရှိပြီး ယင်းတို့အတွက် ၂၀၁၈ ခုနှစ်အတွက် ခြောက်လစာ ပညာရေးအသုံးစရိတ် ဘီလျံ ၈၀၀ ကျော်ခန့်သာ အသုံးပြုခွင့်ရရှိခဲ့သည်။
