ပညာရေးဘတ်ဂျက်မြှင့်တင်ပေးရန် ဆန္ဒပြ တောင်းဆိုရာတွင်ပါဝင်သည့် ကျောင်းသား ကျောင်းသူများအား ကျောင်းမှထုတ်ပယ်ခြင်းသည် သက်ဆိုင်ရာကျောင်းများနှင့်သာ သက်ဆိုင်ကြောင်း ဇန်နဝါရီ ၂၇ ရက်တွင် မန္တလေးတိုင်းဒေသကြီး အစိုးရအဖွဲ့အတွင်းရေးမှူး (တိုင်းအုပ်ချုပ်ရေးမှူး၊ တိုင်းဒေသကြီး အထွေထွေအုပ်ချုပ်ရေးဦးစီးဌာန) ဦးစိုင်းသော်ဝင်းက The Daily Eleven သတင်းစာသို့ ပြောကြားသည်။
“ကျောင်းသားတွေကို ကျောင်းထုတ်မယ့်ကိစ္စက ကျောင်းတွေကိုပဲ မေးလိုက်ပါ။ ကျွန်တော်တို့ကို မမေးပါနဲ့။ ဘာလို့လဲဆိုတော့ အဲဒါက ကျောင်းကိစ္စဖြစ်နေလို့ပါ။ သူတို့ကို ကျောင်းက ထုတ်တာ သတ်ဆိုင်ရာကျောင်းတွေနဲ့ပဲ သက်ဆိုင်ပါတယ်” ဟု မန္တလေးတိုင်းဒေသကြီး အစိုးရအဖွဲ့အတွင်းရေးမှူး ဦးစိုင်းသော်ဝင်းက ပြောကြားသည်။
ဇန်နဝါရီ ၂၂ ရက် နံနက် ၉ နာရီမှ စတင်ကာ ၂၄ ရက်အထိ ပညာရေးအသုံးစရိတ် တိုးမြှင့်ရေး ဆန္ဒပြတောင်းဆိုသည့် ကျောင်းသားကျောင်းသူများကို ဇန်နဝါရီ ၂၅ ရက် နံနက် ၄ နာရီ ၁၅ မိနစ်က ကျောင်းဝင်းအတွင်း မှ ခေါ်ဆောင်ခံခဲ့ရပြီး စုစုပေါင်း ကျောင်းသား ကျောင်းသူ ၇၂ ဦးရှိခဲ့သည်။ ၎င်းတို့အထဲမှ ၂၆ ဦးကို ၎င်းတို့၏ သက်ဆိုင်ရာကျောင်းများက ဇန်နဝါရီ ၂၆ ရက်တွင် ထုတ်ပယ်ပြီးဖြစ်ကာ ယခုအခါ ကျန်ရှိသည့် ကျောင်းများမှလည်း ၎င်းတို့၏ ကျောင်းသားများကို ကျောင်းမှ ထုတ်ပယ်မည်ဖြစ်ကြောင်း ကနဦးသတင်းများ ထွက်ပေါ်လျက်ရှိသည့်အပေါ် မန္တလေးတိုင်းဒေသကြီး အစိုးရအဖွဲ့က ကျောင်းမှထုတ်ပယ်ခြင်းကိစ္စသည် သက်ဆိုင်ရာကျောင်းများနှင့်သာ သက်ဆိုင်ကြောင်း ပြောကြားခဲ့ခြင်းဖြစ်သည်။
“အဲဒါက ဘော်လီဘော ပုတ်တာပဲဗျ။ အထက်အမိန့်မရဘဲနဲ့တော့ ထုတ်မှာမဟုတ်ဘူး။ သူတို့ကတော့ သူတို့နဲ့မဆိုင်ဘူးပြောမှာပဲ။ ရတနာပုံမှာ ဆန္ဒပြခဲ့လို့ ရတနာပုံကကျောင်းသားတွေကို ထုတ်တာတော့ ထုတ်လို့ရတယ်။ အခုက မိတ္ထီလာ၊ ရမည်းသင်းမှာရှိတဲ့ ကျောင်း သားတွေကို ကျောင်းထုတ်တာတော့ တိုင်းဒေသကြီးအစိုးရအဖွဲ့အမိန့်နဲ့ ထုတ်တာပဲဖြစ်နိုင်တယ်။ အဲဒါကို သူတို့က ကျောင်းနဲ့ပဲဆိုင်တယ်ဆိုတော့ ဒါ ခေါင်းရှောင်တာဖြစ်ပြီး ဘော်လီဘော ပုတ်နေတာလို့ပဲမြင်တယ်”ဟု ပညာရေး ဘတ်ဂျက်တိုးမြှင့်ပေးရေးတိုက်ပွဲ ကော်မတီဝင် ကိုမင်းထက်မြက်က ပြောကြားသည်။
ဇန်နဝါရီ ၂၆ ရက်မှ ဇန်နဝါရီ ၂၇ ရက်အထိ ကျောင်းမှထုတ်ပယ်ခြင်းခံရသည့် ကျောင်းသား ကျောင်းသူ စုစုပေါင်း ၃၂ ဦးအထိရှိပြီး ရတနာပုံတက္ကသိုလ်မှ ၁၄ ဦး (ပြင်ပမှ နှစ်ဦး အပါအဝင်)၊ ရမည်းသင်းနည်းပညာတက္ကသိုလ်မှ ၁၁ ဦး၊ မိတ္ထီလာနည်းပညာတက္ကသိုလ် မှ တစ်ဦးနှင့် မိတ္ထီလာစီးပွားရေးတက္ကသိုလ်မှ ခြောက်ဦး ထုတ်ပယ်ခံထားရကြောင်း သိရသည်။
အဆိုပါဆန္ဒပြမှုတွင် တက္ကသိုလ်ပေါင်းစုံမှ စုစုပေါင်း ကျောင်းသူကျောင်းသား ၁၀၀ ကျော်ပါဝင်ပြီး ကျောင်းတွင်းမှ ဖယ်ထုတ်ကာ မိဘများထံ ပြန်လည်အပ်နှံသည့် ဇန်နဝါရီ ၂၅ ရက် နံနက်တွင် ၇၂ ဦး ပါဝင်ခဲ့ကြောင်း၊ ကျောင်းသား ၅၉ ဦး ၊ ကျောင်းသူ ၁၃ ဦး ပါဝင် ကြောင်း၊ ဆန္ဒပြတောင်းဆိုမှုကို ဇန်နဝါရီ ၂၂ ရက် နံနက် ၉ နာရီမှ စတင်ပြုလုပ်ခဲ့ပြီး ကျောင်းဝင်းအတွင်း ညအိပ်စောင့်ဆိုင်းကာ ဇန်နဝါရီ ၂၃ ရက်တွင် ကျောင်းဝင်းအတွင်း လှည့်လည်ခြင်း၊ စာသင်ခန်းများအတွင်း ဝင်ရောက်ဆွေးနွေးခြင်းများပြုလုပ်ပြီး ထပ်မံ ညအိပ်စောင့်ဆိုင်းခဲ့ကြောင်း၊ ဇန်နဝါရီ ၂၄ ရက် နံနက်မှ စတင်ကာ ပဲခူးနှင့် မြင်းခြံမှ ကျောင်းသားများ ထပ်မံလာရောက်ပူးပေါင်းခဲ့ပြီး ကျောင်းဝင်းအတွင်း ဆန္ဒပြနေမှုများ ထပ်မံ ပြုလုပ်ခဲ့ကြောင်း၊ ၂၅ ရက် နံနက် ၄ နာရီ ၁၅ မိနစ်တွင် ကျောင်းဝင်းအတွင်းမှ ခေါ်ထုတ်ကာ မိဘများထံပြန်လည်အပ်နှံပြီး နေရပ်သို့ ပြန်လည်ပို့ဆောင်ခဲ့ကြောင်း၊ အဆိုပါဆန္ဒပြမှုတွင် တက္ကသိုလ်ပေါင်းစုံမှ ကျောင်းသူ ကျောင်းသားများသည် ပညာရေးအသုံးစရိတ်တိုးမြှင့်ရေး၊ ကျောင်းတွင်းအဆောင်များ တည်ဆောက်ရေး၊ သင်ထောက်ကူပစ္စည်းလုံလောက် ရေးတို့အတွက် တောင်းဆိုခဲ့ခြင်းဖြစ်သည်။
မြန်မာနိုင်ငံ ပညာရေးအသုံးစရိတ်ကို ယခင်နှစ် ၂၀၁၆-၂၀၁၇ ပညာသင်နှစ်အတွက် ဘီလျံ ၁၆၉၀ ရရှိခဲ့ပြီး ဘီလျံ ၁၀၀၀ ခန့်ကို ပညာရေးဝန်ထမ်းများအတွက် အသုံးပြုခဲ့ကြောင်း၊ နိုင်ငံတစ်ဝန်းရှိ အခြေခံကျောင်းများမှစ၍ တက္ကသိုလ်အဆင့်အထိ ကျောင်းသားဦးရေ ကိုးသန်းခန့်ရှိပြီး ၎င်းတို့အတွက် ဘီလျံ ၆၉၀ သာ ရရှိခဲ့ကြောင်းသိရသည်။
