အဓိက လုပ်ငန်းခွင်များရှိရာ ရန်ကုန်မြို့လယ်မှ ဖွံ့ဖြိုးမှုနည်းပါးသည့် ဒလမြို့နယ်ဘက်သို့ ပြန်ကြသူများကို တွေ့ရစဉ် (ဓာတ်ပုံ-ကြည်နိုင်)
တစ်နိုင်ငံလုံး အတိုင်းအတာအရ လက်ရှိအချိန်တွင် ရန်ကုန်မြို့သည် လူဦးရေတိုးနှုန်း အမြန်ဆုံးဖြစ်ကြောင်း၊ လာမည့် ၁၀ နှစ်၊ အနှစ် ၂၀ အတွင်း လူဦးရေ ၁၀ သန်းကျော်ရှိသည့် MEGA City ဖြစ်လာနိုင်သဖြင့် အခြေခံအဆောက်အအုံ မလုံလောက်မှုများ၊ မြို့ပြရာဇဝတ်မှု ထူပြောလာမှုများအတွက် ကြိုတင်ပြင်ဆင် ထားရန်လိုကြောင်း ဆောက်လုပ်ရေးဝန်ကြီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာနမှ ဒုတိယ ညွှန်ကြားရေးမှူးချုပ် ဦးမြင့်နိုင်က ပြောကြားသည်။
“ရန်ကုန်မြို့က ၂၀၁၄ သန်းခေါင်စာရင်းအရ လူဦးရေ ငါးသန်းကျော် ရှိပါတယ်။ အဲဒီအပြင် မြန်မာနိုင်ငံမှာ လက်ရှိ လူဦးရေတိုးနှုန်းက ရန်ကုန်မြို့က အမြင့်ဆုံး ဖြစ်ပါ တယ်။ တစ်နိုင်ငံလုံး လူဦးရေတိုးနှုန်းထက် ရန်ကုန်ရဲ့ လူဦးရေတိုးနှုန်းက ပိုမြန်နေပါတယ်။ ဒါကြောင့် ကျွန်တော်တို့ ခန့်မှန်းထားတာ နောက်ထပ် ၁၀ နှစ်၊ နှစ် ၂၀ အတွင်းမှာ ရန်ကုန်မြို့က MEGA City ပေါ့။ လူ ၁၀ သန်းကျော်ရှိတဲ့မြို့ ဖြစ်လာဖို့ အနေအထား ရှိပါတယ်။ ဒါကလည်း ခန့်မှန်းချက်တွေ ဖြစ်ပါတယ်။ ဒီလို လူဦးရေ ၁၀ သန်းကျော် ဖြစ်လာရင်၊ ဒီမြို့ကို ခုကတည်းက ကြိုတင်ပြင်ဆင်မထားရင် မြို့ပြပြဿနာတွေ ကြုံတွေ့ရလေ့ရှိပါတယ်” ဟု ဒုတိယ ညွှန်ကြားရေးမှူးချုပ် ဦးမြင့်နိုင်က ပြောကြားသည်။
“အကြမ်းဖျင်းအားဖြင့် ယာဉ်ကြောကြပ်တည်းမှုတွေ ရှိပါတယ်။ ပြီးရင် Infrastructure Shortage တွေ၊ ရေမလုံလောက်တာတွေ၊ လျှပ်စစ်မီး မလုံလောက်တာတွေ၊ မိုးရွာရင် ရေကြီးတာတွေ၊ အိမ်ရာတွေ အခြေအနေ ကျဆင်းတာတွေ၊ အဆင့်နိမ့်အိမ်ရာတွေ၊ Slum and Squatters တွေ၊ အားလုံးသိတဲ့အတိုင်း မနှစ်က Squatters တွေကို Registration လုပ်ကြည့်တဲ့အခါမှာ လေးသိန်းကျော် အနေအထားပေါ့။ အတိအကျတော့ မမှတ်မိတော့ပါဘူး။ အဲဒီလောက် ရှိနေပါတယ်။ နောက်ပြီး မြို့ပြရာဇဝတ်မှုတွေ ထူပြောပါတယ်။ ဒါကြောင့် မြို့ကို ကြိုတင်ပြင်ဆင်ဖို့ လိုပါတယ်” ဟု ၎င်းကဆက်လက် ပြောကြားသည်။
ရန်ကုန်မြို့နှင့် ပတ်သက်ပြီး ယခင်အစိုးရ လက်ထက်ကတည်းက JICA ၏အကူအညီဖြင့် Greater Yangon Master Plan - 2040 ကို ရေးဆွဲထားကြောင်း၊ လာမည့် ၂၀၄၀ တွင် ရန်ကုန်မြို့ကို မည်ကဲ့သို့သောပုံစံဖြင့် တည်ဆောက်မည်၊ အဓိကအားဖြင့် လူနေထိုင်ရေးနှင့် အလုပ်အကိုင် အခွင့်အလမ်းများ ဖန်တီးပေးနိုင်ရေး၊ နေထိုင်သည့်နေရာနှင့် အလုပ်အကိုင် အခွင့်အလမ်း ရှိသည့်နေရာကို ဆက်သွယ်ပေးမည့် လမ်းကြောင်းများ စသည်တို့ကို ဦးတည်ပြီးရေးဆွဲ ထားခြင်းဖြစ်ကြောင်း သိရသည်။
မြို့ပြဖွံ့ဖြိုးမှု မဟာဗျူဟာ စီမံကိန်းအရ မြို့သစ်စီမံကိန်းများ၊ ရန်ကုန်မြို့လယ် ဗဟိုစီးပွားရေးဇုန်နှင့် တန်ဖိုးနည်းအိမ်ရာ စီမံကိန်းများအပါအဝင် မြို့ပြဖွံ့ဖြိုးမှု မဟာဗျူဟာ စီမံကိန်းမှ ဦးစားပေးစီမံကိန်း ၄၁ ခုအတွက် အမေရိကန်ဒေါ်လာ သန်း ၂၃၃၀ သုံးစွဲရန် ခန့်မှန်းထားကြောင်း သိရသည်။
မြို့ပြဖွံ့ဖြိုးတိုးတက်မှု စီမံခန့်ခွဲရေးအတွက် ဒေါ်လာ သန်း ၆၃၀ သုံးစွဲရန် ပြင်ဆင်နေခြင်းဖြစ်ပြီး ဗဟိုခွဲများနှင့် အခြားဦးစားပေး ဖွံ့ဖြိုးတိုးတက်မှုများအတွက် ဒေါ်လာသန်း ၃၂၀၊ မြို့လယ် ဗဟိုစီးပွားရေးဇုန် ပြန်လည် ပြုပြင်ခြင်းအတွက် ဒေါ်လာ သန်း ၂၉၀ နှင့် စွမ်းဆောင်ရည် ဖွံ့ဖြိုးတိုးတက်မှုနှင့် ဆက်စပ်၍ ဒေါ်လာ သန်း ၂၀ သုံးစွဲရန်အပြင် အခြေခံအဆောက်အအုံ ဖွံ့ဖြိုးတိုးတက်မှုအတွက် ဒေါ်လာ သန်း ၁၇၀၀ သုံးစွဲရန် ခန့်မှန်းထားခြင်းဖြစ်ပြီး အခြေခံ အဆောက်အအုံ တိုးတက်ပြောင်းလဲမှုနှင့် သဘာဝဘေးအန္တရာယ် ခံနိုင်ရည် ရှိစေရေးအတွက် သုံးစွဲမည်ဖြစ်သည်။
မြို့ပြဖွံ့ဖြိုးမှု မဟာဗျူဟာစီမံကိန်းမှ ဦးစားပေးစီမံကိန်း ၄၁ ခုတွင် စွမ်းဆောင်ရည် ဖွံ့ဖြိုးတိုးတက်မှု စီမံကိန်း ၂၅ ခုနှင့် သဘာဝဘေးအန္တရာယ် လျော့ပါးသက်သာစေရေး စီမံကိန်း ၁၆ ခုအဖြစ် ခွဲခြားထားသည်။
ထို့ပြင် ဘတ်စ်ကားစနစ် ဖွံ့ဖြိုးတိုးတက်ရေးစီမံကိန်း (မြို့လယ်ဗဟို စီးပွားရေးဇုန်)၊ ပန်းခြံမြေအောက် ကားရပ်နားရန် နေရာများ စီမံကိန်း၊ မြို့ပြတန်ဖိုးနည်းအိမ်ရာ စီမံကိန်း ငွေကြေးထောက်ပံ့မှု အစီအစဉ်၊ ရန်ကုန်မြို့ပြ အမွေအနှစ် မဟာဗျူဟာ အကောင်အထည်ဖော် ဆောင်ရွက်ခြင်းစီမံကိန်း (မြို့လယ် ဗဟိုစီးပွားရေးဇုန်)၊ ပန်းခြံသစ်များ ဆောက်လုပ်ခြင်းစီမံကိန်း၊ မသန်စွမ်းသူများအတွက် နေထိုင်သွားလာမှု အခက်အခဲ မရှိစေရေး စီမံကိန်း၊ ပညာရေးစနစ် ပိုမိုခိုင်ခံ့ရေးစီမံကိန်း၊ မြို့ပြရှိ ဆင်းရဲနွမ်းပါးသူများအား ကူညီထောက်ပံ့ရေး စီမံကိန်း၊ မြို့ပြဖွံ့ဖြိုးတိုးတက်မှု စီမံခန့်ခွဲရေး စွမ်းဆောင်ရည် ဖွံ့ဖြိုးတိုးတက်ရေးစီမံကိန်း၊ ကုက္ကိုလ်၀ ရေသန့်စင်စက်ရုံနှင့် ရေပေးဝေရေး ပိုက်လိုင်းများ ဆောက်လုပ်ခြင်းစီမံကိန်း၊ ဇုန် (၁) ရေပေးဝေရေးပိုက်လိုင်း ကွန်ရက်အသစ် ပြန်လည်တည်ဆောက်ခြင်း စီမံကိန်း၊ မြို့လယ်ဗဟိုစီးပွားရေးဇုန် ရေဆိုးစနစ် တိုးတက်မှုဆောင်ရွက်ရေး စီမံကိန်း စသည့်စီမံကိန်းများ ပါဝင်သည်။
