ဒုတိယသမ္မတ ဦးဟင်နရီဗန်ထီးယူ၊ ဝန်ကြီးချုပ် ဒေါက်တာလဲ့လဲ့မော်နှင့် လုပ်ငန်းရှင်များအား တွေ့ရစဉ်

မြိတ်မြို့တွင် အမေရိကန်ဒေါ်လာ သန်း ၁၀၀ ရင်းနှီးမြှုပ်နှံမည့် ခေတ်မီငါးလေလံဈေးကြီးတစ်ခု ထပ်မံတည်ဆောက်မည့် အစီအစဉ်ကို ဒုတိယသမ္မတ ဦးဟင်နရီဗန်ထီးယူအား မြိတ်အများပိုင်ကော်ပိုရေးရှင်းက တင်ပြရှင်းလင်းခဲ့ကြောင်း သိရသည်။

မြိတ်မြို့သို့ ဇန်နဝါရီ ၂၅ ရက်က ရောက်ရှိလာသော ဒုတိယသမ္မတဦးဟင်နရီဗန်ထီးယူအား ဝန်ကြီးချုပ် ဒေါက်တာလဲ့လဲ့မော်နှင့် လုပ်ငန်းရှင်များက ငါးလေလံဈေးစီမံကိန်း လုပ်ဆောင်မည့် တောထွက်ကြီးနေရာသို့ ခေါ်ယူပြသခဲ့ကြောင်း သိရသည်။

မြိတ်လေတပ်စခန်းဌာနချုပ် ဧရိယာနှင့် ယောကြီးဝချောင်းအနီးတွင် တည်ရှိသည့် မြေနေရာတွင် မြိတ်အများပိုင်ကော်ပိုရေးရှင်း လီမိတက်နှင့် ဒေသခံရေလုပ်ငန်းရှင်များ ပူးပေါင်းဆောင်ရွက်မည့် ငါးလေလံဈေးစီမံကိန်းကို ခွင့်ပြုချက်ရပါက ခြောက်နှစ်အတွင်း အပြီးသတ်အကောင်ထည်ဖော်ဆောင်ရွက် မည်ဖြစ်ကြောင်း သိရသည်။

“၁၁၃ ဧကပေါ်မှာတည်ဆောက်မှာပါ။ MEC (မြန်မာ့စီးပွားရေးဦးပိုင်လီမိတက်) နဲ့ အကျိုးတူ ပူးပေါင်းဆောင်ရွက်ဖို့လည်း အဆိုပြုတင်ပြထားပြီး ဖြစ်ပါတယ်။ ရည်ရွယ်ချက်က မြိတ်ဒေသခံ ငါးလုပ်ငန်းများဖွံ့ဖြိုးတိုးတက်ဖို့၊ ရေလုပ်သားနဲ့ သာမန်အလုပ်သမားများ အလုပ်အကိုင်အခွင့်အလမ်းများရရှိလာရေး၊ ရနှောင်းငါးဈေးကွက် (ထိုင်းနိုင်ငံ) ကို မှီခိုနေရခြင်းမှ လွတ်ကင်းစေရေး၊ အပြည်ပြည်ဆိုင်ရာ ငါးဈေးကွက်သို့ ထိုးဖောက်ဝင်ရောက်နိုင်ရေးနှင့် ခေတ်မီငါးဈေးပေါ်ထွက်လာရေး၊ ကုန်ကြမ်းစနစ်မှ နိုင်ငံတကာအဆင့်မီကုန်ချော ထုတ်လုပ်ဖြန့်ဖြူးနိုင်ရေး၊ နိုင်ငံတော်အတွက် တရားဝင်အခွန်ငွေများပိုမိုရရှိလာရေးတို့ ဖြစ်ပါတယ်” ဟု မြိတ်အများပိုင်ကော်ပိုရေးရှင်း ကုမ္ပဏီလီမိတက်ဥက္ကဋ္ဌ ဦးလှသန်းက ပြောကြားသည်။

ယောကြီးဝချောင်းအတွင်း ရေအနက်မှာ အနိမ့်ဆုံး ၃ ဒသမ ၅ မီတာမှ  ငါးမီတာအထိရှိမည်ဖြစ်ပြီး  ငါးဖမ်းလှေနှင့်အခြားလှေများ ၂၄ နာရီဝင်ရောက်ဆိုက်ကပ်နိုင်သည့် နေရာတစ်ခုဖြစ်ကြောင်း သိရသည်။

စီမံကိန်းဧရိယာအတွင်း ငါးချိန်တွယ် လက်ခံသည့်နေရာ၊ စက်သုံးဆီအရောင်းဆိုင်၊ ဂိုဒေါင်များ၊ ဟိုတယ်/ တည်းခိုခန်းများ၊ စားသောက်ဆိုင်များ၊ ကုန်စုံဆိုင်များ၊ အအေးခန်း၊ ရေခဲစက်များ ပါဝင်မည်ဖြစ်ကြောင်း သိရသည်။

“စီမံကိန်းကာလကို ခြောက်နှစ်လျာထားပါတယ်။ ပထမအဆင့်မှာတော့ ၂၀၁၈ ခုနှစ်ကနေ ၂၀၂၀ အထိ ဆောင်ရွက်သွားမယ်။ ဒုတိယအဆင့်က ၂၀၂၁ ကနေ ၂၀၂၃ အထိ ဆောင်ရွက်သွားဖို့လျာထားပါတယ်။ ရင်းနှီးမြှုပ်နှံမှုကတော့ အမေရိကန်ဒေါ်လာသန်း ၁၀၀ ရင်းနှီးမြှုပ်နှံဖို့လျာထားပါတယ်။ လုပ်ငန်းဆောင်ရွက်မယ့် အစီအစဉ်ကတော့ မြိတ်ဒေသကထွက်ရှိမယ့် ရေထွက်ပစ္စည်းတွေကို မြိတ်ခေတ်မီ ငါးလေလံဈေးကတစ်ဆင့် မိုင် ၁၂၀ ကျော်ကွာဝေးတဲ့ မောတောင်နယ်စပ်ကို ဖြတ်သန်းပြီး ထိုင်းနိုင်ငံ (မဟာချိုင်၊ ဘန်ကောက်) ကို ၇ နာရီအတွင်း ကားလမ်းကတင်ပို့ဖို့ ရည်ရွယ်ထားပါတယ်။ အာဆီယံနိုင်ငံများနဲ့ ဂျပန်၊ တရုတ်၊ ဟောင်ကောင်တို့ကိုလည်း ပို့မှာဖြစ်ပါတယ်။ အကောင်ထည်ဖော်မယ့်အစီအစဉ်ကတော့ မြိတ်အများပိုင်ကော်ပိုရေးရှင်းနဲ့ တနင်္သာရီတိုင်းအတွင်းမှာရှိတဲ့ ရေလုပ်ငန်းများနဲ့ ပူးပေါင်းဆောင်ရွက်သွားပါ့မယ်” ဟု ဦးလှသန်းက ပြောကြားသည်။

အဆင့်မီ ငါးလေလံဈေးတည်ဆောက်မည့် ဆိပ်ခံတံတားမှာ အရှည်ပေ ၃၂၀၀ ရှိပြီး ငါးဖမ်းလှေအစင်းရေ ၅၀ ခန့် တစ်ပြိုင်နက် ဆိုက်ကပ်နိုင်မည်ဖြစ်ကြောင်း၊ ရေထွက်ပစ္စည်းများကိုတင်ပို့မည့် အများဆုံး ကွန်တိန်နာ ယာဉ်အစီးရေ  ၁၂၀ ခန့်နှင့် အိမ်စီးကား ၂၄၀ ဆိုက်ကပ်နိုင်မည့် ကားပါကင်များပါဝင်မည် ဖြစ်ကြောင်း သိရသည်။

အဆိုပါစီမံကိန်းနှင့်ပတ်သက်ပြီး ဒုတိယသမ္မတအနေဖြင့် သိရှိလိုသည် တချို့ကိုသာ မေးမြန်းခဲ့ပြီး ပြန်လည်မှတ်ချက်ပြုပြောဆိုခဲ့ခြင်းမရှိခဲ့ကြောင်း သိရသည်။ ဒုတိယသမ္မတအနေဖြင့် ပြီးခဲ့သည့်နှစ်က ထားဝယ်ခရိုင်၊ သရက်ချောင်းမြို့နယ်တွင် အကောင်ထည်ဖော်ရန် ကြိုးစားနေသည့် ငါးလေလံဈေးနေရာအား ကြည့်ရှုခဲ့သလို ယခုမြိတ်မြို့တွင် ထပ်မံအကောင်ထည်ဖော်ရန်ကြိုးစားနေသည့် ငါးလေလံဈေးနေရာကိုလည်း ကြည့်ရှုခဲ့ကြောင်း သိရသည်။