ရန်ကုန်အဆင့်မြင့် မိုးပျံအမြန်လမ်းမကြီး စီမံကိန်းတည်ဆောက်ရေးသည် အစိုးရအချင်းချင်း ပူးပေါင်းဆောင်ရွက်သည့် စီမံကိန်းကြီးများဖြစ်သဖြင့် မြန်မာနိုင်ငံ ရင်းနှီးမြှုပ်နှံမှုကော်မရှင်သို့ တိုက်ရိုက်တင်ပြစရာမလိုဘဲ ဆောင်ရွက်နိုင်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်မှ သိရသည်။
“အစိုးရချင်း အစိုးရချင်းပေါင်းလုပ်တဲ့ဟာဆို ဒီကိုမလာဘူး။ အစိုးရချင်းလုပ်တာ။ G to G စီမံကိန်းလုပ်တာ Government to Government လုပ်တဲ့ဟာဆို Investment ရင်းနှီးမြှုပ်နှံမှုကို တင်လေ့တင်ထမရှိဘူး။ ဒါတွေနောက် PPP ပုံစံနဲ့လုပ်တယ်။ Public, Private, Partnership ပုံစံတွေ၊ Developer အနေနဲ့လုပ်တာဆိုရင် ဒီကိုလာတယ်။ ဒါတွေက အခုက မြန်မာနိုင်ငံမှာလုပ်မယ့် Infrastructure စီမံကိန်းတွေ EU တို့ IFC တို့ နိုင်ငံတကာကိုပေးတဲ့စီမံကိန်းက ဒါတွေက စတဲ့အဆင့်ပဲရှိသေးတယ်။ ရိုးရိုးစီမံကိန်းတွေကတော့ Project by project ကို လုပ်တော့မယ်ဆိုရင်တော့ ရင်းနှီးမြှုပ်နှံမှုက မြန်မာနိုင်ငံသားလား၊ နိုင်ငံခြားလား အဲဒီကျရင်တော့ သက်ဆိုင်ရာဝန်ကြီးဌာနကနေ ဒီကိုတင်တယ်။ အဲဒီ Proposal တွေပို့လိုက်တာပေါ့။ ရှေ့နေချုပ်ရုံးက အတည်ပြုတာတို့ အသေးစိတ်လုပ်ပြီးမှ ရင်းနှီးမြှုပ်နှံမှုကော်မရှင်ကို လာတင်တာ” ဟု ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန ဒုတိယညွှန်ကြားရေးမှူးချုပ် ဦးသန်းအောင်ကျော်က ပြောကြားသည်။
ရန်ကုန်မြို့တောင်ဘက်ပိုင်းရှိ ရန်ကုန်ဆိပ်ကမ်း၊ သီလဝါအထူးစီးပွားရေးဇုန်နှင့် မြောက်ပိုင်းရှိ ရန်ကုန်အပြည်ပြည်ဆိုင်ရာ လေဆိပ်၊ ရန်ကုန်စက်မှုဥယျာဉ်နှင့် ရန်ကုန်-မန္တလေး အမြန်လမ်းတို့ကို ချိတ်ဆက်မှု တိုးတက်ကောင်းမွန်စေမည့် ရန်ကုန်အဆင့်မြင့် မိုးပျံအမြန်လမ်းမတစ်ခုကို အကောင်အထည်ဖော်ဆောင်ရန်အတွက် အကြံပေးဝန်ဆောင်မှုပြုရန် ဆောက်လုပ်ရေးဝန်ကြီးဌာနနှင့် ကမ္ဘာ့ဘဏ်အုပ်စုဝင်အဖွဲ့အစည်းဖြစ်သော IFC တို့ ဇန်နဝါရီ ၁၁ ရက်တွင် သဘောတူညီချက် လက်မှတ်ရေးထိုးခဲ့ခြင်းဖြစ်သည်။
ရန်ကုန်အဆင့်မြင့် မိုးပျံအမြန်လမ်းမစီမံကိန်း သဘောတူညီချက်အရ ဆောက်လုပ်ရေးဝန်ကြီးဌာနအနေဖြင့် IFC ကို မြန်မာနိုင်ငံ၏ လူဦးရေအများဆုံးနှင့် စီးပွားရေးအချက်အချာအကျသည့် ရန်ကုန်မြို့အတွင်း အဆင့်မြင့်အခွန်ကောက်ခံမှုဖြင့် ပြုပြင်ထိန်းသိမ်းမည့် ၂၀ ဒသမ ၅ ကီလိုမီတာရှည်လျားသော ရန်ကုန်မြို့တောင်ဘက်မှ မြောက်ဘက်သို့ဆက်သွယ်သည့် လေးလမ်းသွား မိုးပျံအမြန်လမ်းမတည်ဆောက်မှုတွင် ဦးဆောင်အကြံပေးအဖြစ် ခန့်အပ်ခဲ့သည်။
အဆိုပါလုပ်ငန်း၏ အစိတ်အပိုင်းတစ်ရပ်အဖြစ် IFC အနေဖြင့် ပြီးပြည့်စုံသောတည်ဆောက်မှု၊ စီမံခန့်ခွဲမှု၊ လုပ်ငန်းလည်ပတ်မှုနှင့် အခြားဝန်ဆောင်မှုများကို စနစ်တကျပြုပြင်ထိန်းသိမ်းပေးနိုင်သည့် အတွေ့အကြုံကောင်းများစွာ ပိုင်ဆိုင်သော အရည်အသွေးပြည့်ဝသည့် ပုဂ္ဂလိကဆောက်လုပ်ရေးကုမ္ပဏီတစ်ခု ရွေးချယ်ရန်အတွက် နိုင်ငံတကာအဆင့်မီ တင်ဒါယှဉ်ပြိုင်မှုတစ်ရပ်ကို ဆောင်ရွက်သွားမည်ဖြစ်သည်။
မိုးပျံအမြန်လမ်းစီမံကိန်းသည် တောင်ဘက်ပိုင်းရှိ ရန်ကုန်ဆိပ်ကမ်းနှင့် သီလဝါအထူးစီးပွားရေးဇုန်၊ မြောက်ပိုင်းရှိ ရန်ကုန်အပြည်ပြည်ဆိုင်ရာလေဆိပ်၊ ရန်ကုန်စက်မှုဥယျာဉ်နှင့် ရန်ကုန်-မန္တလေးအမြန်လမ်းတို့ ချိတ်ဆက်မှု တိုးတက်စေခြင်းဖြင့် စီးပွားရေးဖွံ့ဖြိုးမှုကို ထောက်ကူနိုင်မည့် စီမံကိန်းတစ်ရပ်ဖြစ်ကြောင်း IFC က ထုတ်ပြန်ထားသည်။
