၂၀၁၇ ခုနှစ် ဒီဇင်ဘာလအထိ သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနမှ ခွင့်ပြုမိန့်ထုတ်ပေးထားသော အကြီးစားဓာတ်သတ္တုလုပ်ကွက် ၁၅၀ ရှိပြီး ကျောက်မီးသွေးတူးဖော်ထုတ်လုပ်ရေး လုပ်ကွက်အများဆုံးဖြစ်ကြောင်း သိရသည်။
သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနမှ ဓာတ်သတ္တုလုပ်ကွက်များကို ခွင့်ပြုမိန့်ထုတ်ပေးရာတွင် အကြီးစားလုပ်ကွက်၊ အသေးစားလုပ်ကွက်၊ စမ်းသပ်လုပ်ကွက်၊ စမ်းသပ်/ဖြစ်မြောက်နိုင်စွမ်းလုပ်ကွက်၊ လက်လုပ်လက်စားလုပ်ကွက်၊ အသေးစားဆင့်တက်လုပ်ကွက်ဟူ၍ အမျိုးအစားများခွဲကာ ခွင့်ပြုပေးခဲ့ခြင်းဖြစ်သည်။
သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနမှ ခွင့်ပြုမိန့်ထုတ်ပေးထားသည့် ဓာတ်သတ္တုလုပ်ကွက်များတွင် အကြီးစားလုပ်ကွက် ၁၅၀၊ အသေးစားလုပ်ကွက် ၇၈၇ ကွက်၊ စမ်းသပ်လုပ်ကွက် ၃၆၃ ကွက်၊ စမ်းသပ်/ဖြစ်မြောက်၂၄ ကွက်၊ လက်လုပ်လက်စားလုပ်ကွက် ၃၇ ကွက်၊ အသေးစားဆင့်တက် ၉၂ ကွက်ပါဝင်ကြောင်း သိရသည်။
အကြီးစားဓာတ်သတ္တုရှာဖွေ တူးဖော်ထုတ်လုပ်ရေးလုပ်ကွက် ၁၅၀ တွင် ကျောက်မီးသွေးလုပ်ကွက် ၄၈ ခုဖြင့်အများဆုံးဖြစ်ပြီး ထုံးကျောက်လုပ်ကွက် ၄၂ ခု၊ သံကျောက်လုပ်ကွက်သုံးခု၊ သံကြွယ်ဘောက်ဆိုဒ် လုပ်ကွက်နှစ်ခု၊ မာဘယ်လုပ်ကွက် ၁၀ ခု၊ ဂရက်နိုက် လုပ်ကွက်သုံးခု၊ မြေစေးလုပ်ကွက် နှစ်ခု၊ ဖန်ချက်သဲလုပ်ကွက် နှစ်ခု၊ ဂေါဒန်လုပ်ကွက် ခြောက်ခု၊ ကြွေကျောက်လုပ်ကွက် သုံးခု၊ ခဲလုပ်ကွက် လေးခု၊ ခဲမဖြူ-အဖြိုက်နက် လုပ်ကွက် ၁၁ ခု၊ ကြေးနီလုပ်ကွက် နှစ်ခု၊ ခနောက်စိမ်းလုပ်ကွက်တစ်ခု၊ သွပ်လုပ်ကွက် တစ်ခု၊ ဘရိုက်တီး လုပ်ကွက်သုံးခု၊ ရွှေလုပ်ကွက်ငါးခု၊ နီကယ်လုပ်ကွက်တစ်ခု၊ သလင်းလုပ်ကွက်တစ်ခုရှိကြောင်း သိရသည်။
တိုင်းဒေသကြီးနှင့် ပြည်နယ်အလိုက် ခွင့်ပြုမိန့်ထုတ်ပေးထားသည့် ဓာတ်သတ္တုလုပ်ကွက်များမှာ ကချင်ပြည်နယ်တွင် ၁၂၃ ကွက်၊ ကယားပြည်နယ်တွင် ၂၅ ကွက်၊ ကရင်ပြည်နယ်တွင် ၆၄ ကွက်၊ ချင်းပြည်နယ်တွင် ခုနစ်ကွက်၊ စစ်ကိုင်းတိုင်းဒေသကြီးတွင် ၂၂၁ ကွက်၊ တနင်္သာရီတိုင်းဒေသကြီးတွင် ၁၀၆ ကွက်၊ နေပြည်တော်တွင် သုံးကွက်၊ ပဲခူးတိုင်းဒေသကြီးတွင် သုံးကွက်၊ မကွေးတိုင်းဒေသကြီးတွင် ၆၅ ကွက်၊ မန္တလေးတိုင်းဒေသကြီးတွင် ၄၄၉ ကွက်၊ မွန်ပြည်နယ်တွင် ၂၅ ကွက်၊ ရခိုင်ပြည်နယ်တွင် လုပ်ကွက်လေးကွက်၊ ရှမ်းပြည်နယ် (တောင်ပိုင်း) တွင် ၁၅၈ ကွက်၊ ရှမ်းပြည်နယ် (မြောက်ပိုင်း) တွင် ၉၈ ကွက်၊ ရှမ်းပြည်နယ် (အရှေ့ပိုင်း) တွင် ၉၉ ကွက်၊ ဧရာဝတီတိုင်းဒေသကြီးတွင် နှစ်ကွက်၊ ရန်ကုန်တိုင်းဒေသကြီးတွင် တစ်ကွက် စုစုပေါင်း ၁၄၅၃ ကွက်ရှိကြောင်း သိရသည်။
