စီးပွားရေးဆိုင်ရာ ပြုပြင်ပြောင်းလဲမှု နှေးကွေးနေခြင်းနှင့် ပတ်သက်ပြီး စီးပွားရေး အသိုက်အဝန်းမှ အချို့သော လုပ်ငန်းများအနေဖြင့် စိုးရိမ်ကြောင့်ကြမှုများ ဖြစ်ပေါ်နေရကြောင်း Oxford Business Group က ဇန်နဝါရီ ၁၈ ရက်တွင် သတင်းထုတ်ပြန်သည်။

အဆိုပါ ထုတ်ပြန်ချက်ကို ၂၀၁၇ ခုနှစ် ဒီဇင်ဘာလအတွင်း ကုန်သည်စက်မှုအသင်း ချုပ်(UMFCCI) နှင့် အတိုင်ပင်ခံ လုပ်ငန်းတစ်ခုဖြစ်သည့် Roland Berger တို့ ပြုလုပ်ခဲ့သည့် စစ်တမ်းအရ စီးပွားရေးအသိုက်အဝန်းအတွင်း ယုံကြည်မှုများ သိသိသာသာ ကျဆင်းနေသည်ဟု ဖော်ပြခဲ့သည့်စစ်တမ်းကို ကိုးကားထုတ်ပြန်ခဲ့ခြင်း ဖြစ်သည်။

Roland Berger စစ်တမ်းအရ အကျိုးအမြတ်ရရှိနေသည့် ရေတိုစီးပွားရေးလုပ်ငန်း ပမာဏသည် ၂၀၁၆ ခုနှစ် နှောင်းပိုင်းတွင် ၇၃ ရာခိုင်နှုန်းရှိခဲ့ရာမှ ၄၉ ရာခိုင်နှုန်းအထိ ကျဆင်းသွားပြီး ထိုသို့ကျဆင်းလာမှုသည် နိုင်ငံတော်အစိုးရ၏ ရှင်းလင်းပြတ်သားမှု မရှိသော စီးပွားရေးဆိုင်ရာမူဝါဒများကြောင့် ဖြစ်ပေါ်နေသည်ဟု ဝေဖန်သူများက ထောက်ပြခဲ့သည်။ သို့သော် ထိုသို့စိုးရိမ်ကြောင့်ကြမှုများ ရှိနေသော်လည်း ၈၈ ရာခိုင်နှုန်းသော စီးပွားရေးလုပ်ငန်းရှင်များသည် မြန်မာနိုင်ငံအနေနှင့် တောင့်တင်းသည့် ပြည်တွင်းဈေးကွက်အလားအလာ ပိုင်ဆိုင်ထားသဖြင့်များ မကြာမီကာလနှင့် ရေရှည်တွင် ဖြစ်ပေါ်လာနိုင်သည့် အကြောင်းခြင်းရာများနှင့် ပတ်သက်၍ အကောင်းမြင်မှုများရှိနေသည်ဟု ဖော်ပြထားသည်။

ယင်းထင်မြင်ယူဆချက်နှင့် ပတ်သက်၍ မြန်မာနိုင်ငံဆိုင်ရာ ဗြိတိသျှကုန်သည်ကြီး များအသင်း၏ဥက္ကဋ္ဌ Peter Beynon က လက်ရှိတွင် ဖွံ့ဖြိုးတိုးတက်မှုများ ဖြစ်ပေါ်နေသော်လည်း အဆိုပါတိုးတက်မှုများအား အထောက်အကူဖြစ်စေမည့် လုပ်ဆောင်ချက်များ ပိုမိုလုပ်ဆောင်ပေးရန် လိုအပ်နေကြောင်း ပြောကြားသည်။

“မြန်မာနိုင်ငံရဲ့ စီးပွားရေးအသိုက်အဝန်းကို ပိုမိုကောင်းမွန်လာအောင် ပြုလုပ်ပေးနိုင်ဖို့အတွက် အစိုးရအနေနဲ့ စီးပွားရေးဆိုင်ရာ ပြုပြင်ပြောင်းလဲမှုတွေ၊ ဖြေလျှော့မှုတွေကို ပိုမိုမြန်ဆန်စွာ ပြုလုပ်ပေးနိုင်ဖို့ လိုအပ်ပါတယ်။ အထူးသဖြင့် အစိုးရတာဝန်ရှိသူတွေ အနေနဲ့ အာမခံလုပ်ငန်း၊ ဘဏ်လုပ်ငန်း၊ ဘဏ်မဟုတ်တဲ့ အခြားသောဘဏ္ဍာရေးပိုင်းဆိုင်ရာ အဖွဲ့အစည်းတွေနဲ့ အသေးစားငွေ ကြေးလုပ်ငန်းစတဲ့ ကဏ္ဍတွေမှာ ပြုပြင်ပြောင်းလဲမှုတွေ ပိုပြီးမြန်မြန်ဆန်ဆန်ဖြစ်ပေါ်လာအောင် အဓိက ထားလုပ်ဆောင်သင့်ပါတယ်” ဟု Peter Beynon က ဆိုသည်။

ထို့ပြင် ကမ္ဘာ့ဘဏ်မှ ထုတ်ပြန်ခဲ့သည့် ၂၀၁၈ ခုနှစ်အတွက် စီးပွားရေးလုပ်ကိုင်ရန် အလွယ်ကူဆုံးနိုင်ငံများ စာရင်းတွင် မြန်မာ နိုင်ငံအနေနှင့် နိုင်ငံပေါင်း ၁၉၀ အနက် အဆင့် ၁၇၁ တွင် ရောက်ရှိနေခဲ့ခြင်းသည် အထက်ပါ စိုးရိမ်ကြောင့်ကြမှုများရှိနေသည့် အချက်ကို ပိုမိုပေါ်လွင်နေစေခဲ့သည်ဟု ထပ်ဆင့်ကိုးကားဖော်ပြခဲ့သည်။

ထို့ပြင် ရခိုင်ပြည်နယ်တွင် ဖြစ်ပေါ်ခဲ့ သည့် မငြိမ်သက်မှုများနှင့် နှေးကွေးသည့် စီးပွားရေးပြုပြင်ပြောင်းလဲမှုများကြောင့် စိုးရိမ်ကြောင့်ကြမှုများ ဖြစ်ပေါ်နေသော်လည်း လွန်ခဲ့သည့်နှစ်အနည်းငယ်အတွင်း ဖြစ်ပေါ်ခဲ့သည့် အကောင်းဘက်ဦးတည်သော လုပ်ဆောင်ချက်များကြောင့် မြန်မာနိုင်ငံ၏ စီးပွားရေးအခြေအနေသည် လတ်တလောနှင့် များမကြာမီကာလများအတွင်း ဆက်လက်အရှိန်ရအားကောင်းနေမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။