မြန်မာနိုင်ငံ ဆန်စပါးအသင်းချုပ်နှင့် European Commission EU ကော်မရှင်မှ တာဝန်ရှိသူများ ဆွေးနွေးနေစဉ် (ဓာတ်ပုံ- MRF)

ဥရောပသမဂ္ဂနိုင်ငံများသို့ မြန်မာနိုင်ငံက သတ်မှတ်အရည်အချင်းမီဆန်များ၊ ပေါ်ဆန်းမွှေးနှင့် ပေါင်းဆန်အပြင် ဆန်ပိုမိုတင်ပို့ နိုင်ရေးအစီအစဉ်များအတွက် မြန်မာနိုင်ငံ ဆန်စပါးအသင်းချုပ်နှင့် European Commission EU  ကော်မရှင်တို့  ဆွေးနွေးလျက်ရှိကြောင်း မြန်မာနိုင်ငံ ဆန်စပါးအသင်းချုပ်မှ သတင်းထုတ်ပြန်ထားသည်။

European Commission ၏ DG Trade မှ Mr.Nikoloas ZAIMIS ဦးဆောင်သော EU ကိုယ်စားလှယ်အဖွဲ့ ငါးဦးတို့သည် မြန်မာနိုင်ငံ ဆန်စပါးအသင်းချုပ်သို့ ဇန်နဝါရီ ၁၇ ရက်က လာရောက်တွေ့ဆုံရာတွင် မြန်မာနိုင်ငံ ဆန်စပါးအသင်းချုပ်မှ ဒုတိယဥက္ကဋ္ဌ ဦးအာယု၊ တွဲဖက်အထွေထွေအတွင်းရေးမှူး ဦးရာဇာမျိုး၊ ဒေါက်တာကျော်ကျော်အောင် နှင့် အပြည်ပြည်ဆိုင်ရာ ဆက်သွယ်ရေးကော် မတီအဖွဲ့ဝင်များက လက်ခံတွေ့ဆုံခဲ့ကြောင်း သိရသည်။

ယင်းသို့ တွေ့ဆုံဆွေးနွေးရာတွင် ဆန်စပါးလုပ်ငန်း ဖွံ့ဖြိုးတိုးတက်လာစေရန် EU နိုင်ငံများမှ EBA ကဲ့သို့ အခွင့်အလမ်းများ ပိုမိုရရှိနိုင်ရေး၊ ရင်းနှီးမြှုပ်နှံမှု၊ နည်းပညာများ၊ စက်ကရိယာများ ကူညီပံ့ပိုးနိုင်ရေးအတွက် ဆွေးနွေးခဲ့ကြောင်း သိရသည်။

ထို့ပြင် မြန်မာနိုင်ငံမှ ဆန်နှင့် ဆန်ကွဲအား EU နိုင်ငံများသို့ ပိုမိုတင်ပို့နိုင်ရေးအတွက် ဆောင်ရွက်သင့်သည့် လုပ်ငန်းစဉ်များ၊ အရည်အသွေးကောင်းဆန်များ၊ သတ်မှတ်အရည်အချင်းမီဆန်များ ပိုမိုတင်ပို့နိုင်ရေးအတွက် ဆောင်ရွက်ရန်အစီအစဉ်များ၊ ပေါ်ဆန်းမွှေးဆန်များ၊ ပေါင်းဆန်များကို ဥရောပသမဂ္ဂနိုင်ငံများသို့ တင်ပို့နိုင်ရေးအတွက် ဆောင်ရွက်သင့်သည့်အစီအစဉ်များ၊ ဆန်ပို့ကုန်မြှင့်တင်ရေးအတွက် EU ကော်မရှင်အနေဖြင့် အကူအညီပေးနိုင်မည့် အစီအစဉ်များကို ဆွေးနွေးခဲ့ကြောင်း သိရသည်။

လက်ရှိဘဏ္ဍာနှစ် ဇန်နဝါရီပထမပတ်အထိ ပြည်ပသို့ ဆန်တန်ချိန် ၂ ဒသမ ၆ သန်း ကျော်အထိတင်ပို့ထားပြီး ယခုနှစ်အတွင်း ပြည်ပသို့ စံချိန်တင်ဆန်တင်ပို့နိုင်ခဲ့သည့်အတွက် ယခင်နှစ်ကာလတူထက် ဝင်ငွေဒေါ်လာ သန်း ၄၈၀ ကျော် ပိုမိုရရှိထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

မြန်မာနိုင်ငံအနေဖြင့် ၂၀၁၇-၂၀၁၈ ဘဏ္ဍာနှစ် ဧပြီ ၁ ရက်မှ လက်ရှိအချိန်အထိ ပြည်ပသို့ ဆန်တင်ပို့မှုတွင် နယ်စပ်ကုန်သွယ်ရေးလမ်းကြောင်းမှ ယခင်နှစ်ကာလတူထက် တန်ချိန်ခုနစ်သိန်းကျော်နှင့် ပင်လယ်ရေကြောင်း ကုန်သွယ်မှုမှ တန်ချိန်ကိုးသိန်းကျော် တင်ပို့ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ လက်ထောက်အတွင်းဝန် ဦးခင်မောင်လွင်က ပြောကြားသည်။

မြန်မာနိုင်ငံအနေဖြင့် ဗြိတိသျှကိုလိုနီခေတ် ၁၉၂၀ မှ ၁၉၄၁ ခုနှစ်ကာများအတွင်း ပြည်ပသို့ ဆန်တန်ချိန် သုံးသန်းအထိ အများဆုံး တင်ပို့နိုင်ခဲ့ကြောင်း၊ လွတ်လပ်ရေးခေတ်နှင့် လွတ်လပ်ရေးနှောင်းပိုင်းကာလများအ တွင်း ပြည်ပသို့ ဆန်တန်ချိန် အများဆုံးတင်ပို့မှုဖြစ် ၁၉၅၆၊ ၁၉၅၇၊ ၁၉၅၉ နှင့် ၁၉၆၀ ခုနှစ်များတွင် ဆန်တန်ချိန် တစ်သန်းသာ တင်ပို့ခဲ့ခြင်းသာရှိခဲ့ကြောင်း မြန်မာနိုင်ငံဆန်စပါးအသင်းချုပ်မှ သိရသည်။

၂၀၁၇-၂၀၁၈ ဘဏ္ဍာနှစ်တွင် ပြည်ပသို့ ဆန်တန်ချိန်နှစ်သန်းတင်ပို့ရန် ရည်မှန်းချက် ထားဆောင်ရွက်ခဲ့ခြင်းဖြစ်ကာ လက်ရှိကာလတွင် အဆိုပါလျာထားချက် ကျော်လွန်တင်ပို့ထားပြီဖြစ်ကြောင်း သိရသည်။