သီလဝါအထူးစီးပွားရေးဇုန်ရှိ လျှပ်စစ်ဓာတ်အားပေးစက်ရုံအား သြဂုတ် ၂ ရက်က တွေ့ရစဉ် (ဓာတ်ပုံ-ရွှန်းလဲ့ဝင်း)
သီလဝါအထူးစီးပွားရေးဇုန် Zone A နှင့် Zone B ၌ နိုင်ငံတကာကုမ္ပဏီ ၈၄ ခုက အမေရိကန်ဒေါ်လာ တစ်ဘီလျံကျော် လာရောက်ရင်းနှီးမြှုပ်နှံထားကြောင်း သိရသည်။
သီလဝါ အထူးစီးပွားရေးဇုန်မှာ ၂၀၁၂ ခုနှစ်တွင် မြန်မာ-ဂျပန် နှစ်နိုင်ငံအစိုးရလက် မှတ်ရေးထိုး အကောင်အထည်ဖော် ဆောင်ရွက်ခဲ့ခြင်းဖြစ်သည်။ ရန်ကုန်မြို့နှင့် ၂၃ ကီလိုမီတာ အကွာအဝေးတွင် တည်ရှိသည့် သီလဝါအထူးစီးပွားရေးဇုန် ဧရိယာ စုစုပေါင်းသည် ဟက်တာ ၂၄၀၀ ရှိပြီး လက်ရှိတွင် ဖွံ့ဖြိုးရေးလုပ်ငန်းများ ဆောင်ရွက်ပြီး စတင်လည်ပတ်နေပြီဖြစ်သည့် အကျယ်အဝန်း ဟက်တာ ၄၀၀ ရှိသည့် Zone A နှင့် ဖွံ့ဖြိုး ရေးလုပ်ငန်းများ ဆောင်ရွက်ဆဲဖြစ်သည့် (Zone B Phase 1) ဟူ၍ ခွဲခြားဆောင်ရွက်နေခြင်း ဖြစ်သည်။
ဟက်တာ ၄၀၀ ကျယ်ဝန်းပြီး စက်ရုံ၊ အလုပ်ရုံများ စတင်လည်ပတ်နေပြီဖြစ်သည့် သီလဝါအထူးစီးပွားရေးဇုန် Zone A တွင် လက်ရှိ နိုင်ငံတကာကုမ္ပဏီ ၇၉ ခုက လာရောက်ရင်းနှီးမြှုပ်နှံထားပြီး ဖြစ်သည်။ ယင်းကဲ့သို့ ကုမ္ပဏီ ၇၉ ခု လာရောက်ရင်းနှီးမြှုပ်နှံထားပြီး ဖြစ်သော်လည်း မြေနေရာလွတ်များ ကျန်ရှိနေကြောင်း သိရသည်။
သီလဝါအထူးစီးပွားရေးဇုန် Zone A ၌ ရင်းနှီးမြှုပ်နှံမည့် ကုမ္ပဏီများအတွက် မြေနေရာများရောင်းချပေးရန် ကျန်နေကြောင်း မြန်မာ-ဂျပန် သီလဝါဖွံ့ဖြိုးမှု ကုမ္ပဏီလီမိတက် (MJTD) မှ သတင်းရရှိသည်။
“Zone A နဲ့ Zone B မှာ အမေရိကန်၊ ဥရောပနဲ့ အာဆီယံနိုင်ငံတွေက ကုမ္ပဏီ စုစုပေါင်း ၈၄ ခုက လာရောက်ရင်းနှီးမြှုပ်နံှထားပါတယ်။ Zone A မှာ လက်ရှိ နိုင်ငံတကာ ကုမ္ပဏီ ၇၉ ခုနဲ့ Zone B မှာ နိုင်ငံတကာ ကုမ္ပဏီငါးခုက အမေရိကန်ဒေါ်လာ တစ်ဘီလျံကျော် လာရောက်ရင်းနှီးမြှုပ်နှံထားတာ ဖြစ်ပါတယ်” ဟု မြန်မာ-ဂျပန် သီလဝါဖွံ့ဖြိုးမှု ကုမ္ပဏီလီမိတက် (MJTD) မှ President & ECO ဖြစ်သူ YANAO Takashi က ပြောကြားသည်။
သီလဝါအထူးစီးပွားရေးဇုန် Zone B ၏ ပထမအဆင့် ဟက်တာ ၁၀၀ စီမံကိန်းအား ၂၀၁၇ ခုနှစ် ဖေဖော်ဝါရီတွင် စတင်ခဲ့ခြင်းဖြစ်ပြီး လာမည့် ၂၀၁၈ ခုနှစ် နှစ်ဆန်းပိုင်းတွင် စီမံကိန်းလုပ်ငန်းများ ပြီးစီးရန် ဆောင်ရွက်နေကာ လက်ရှိတွင် စီမံကိန်း တည်ဆောက်ရေးလုပ်ငန်းများ လုပ်ကိုင်နေဆဲဖြစ်ကြောင်း သိရသည်။
သီလဝါ အထူးစီးပွားရေးဇုန် စီမံကိန်းအား ၂၀၁၂ ခုနှစ်တွင် မြန်မာ-ဂျပန် နှစ်နိုင်ငံ အစိုးရလက်မှတ်ရေးထိုး ဆောင်ရွက်ခဲ့ခြင်း ဖြစ်ကာ ၂၀၁၃ ခုနှစ်တွင် မြန်မာ-ဂျပန် သီလဝါဖွံ့ဖြိုးမှုကုမ္ပဏီလီမိတက် (MJTD) အား မြန်မာနိုင်ငံမှ ၅၁ ရာခိုင်နှုန်း၊ ဂျပန်နိုင်ငံဘက်မှ ၄၉ ရာခိုင်နှုန်းပါဝင်ခဲ့ပြီး စတင်တည်ထောင်ခဲ့သည်။ အဆိုပါ မြန်မာ-ဂျပန် သီလဝါဖွံ့ဖြိုးမှု ကုမ္ပဏီလီမိတက်တွင် မြန်မာဘက်မှ မြန်မာအစိုးရ၊ မြန်မာကုမ္ပဏီ ကိုးခုနှင့် တစ်ဦးချင်းအစုရှယ်ယာပိုင်ရှင်များ ပါဝင်ရင်းနှီးမြှုပ်နှံထားခြင်း ဖြစ်သည်။
ဂျပန်နိုင်ငံဘက်မှ ၄၉ ရာခိုင်နှုန်းရင်း နှီးမြှုပ်နှံမှုတွင် JICA မှ ၁၀ ရာခိုင်နှုန်း၊ ဂျပန်ကုမ္ပဏီများဖြစ်သည့် Mitsubishi Marubeni ၊Sumitomo Corporation နှင့် ဂျပန်နိုင်ငံမှ ဘဏ်သုံးခုတို့ ပူးပေါင်းပါဝင်ထားခြင်းဖြစ်ကြောင်း သိရသည်။
