စစ်တွေ အထွေထွေရောဂါကု ဆေးရုံကြီးကို စံပြဆေးရုံကြီးအဖြစ် အဆင့်မြှင့်တင်ရေး Master Plan ရေးဆွဲဆောင်ရွက်မည်

စစ်တွေ အထွေထွေရောဂါကု ဆေးရုံကြီးကို စံပြဆေးရုံကြီးအဖြစ် အဆင့်မြှင့်တင်ရေး Master Plan ရေးဆွဲဆောင်ရွက်မည်
Published 14 January 2018

စစ်တွေမြို့ရှိ အထွေထွေရောဂါကုဆေးရုံကြီး အရေးပေါ်နှင့် ပြင်ပလူနာဌာနကို တွေ့ရစဉ်

ရခိုင်ပြည်နယ်ရှိ စစ်တွေအထွေထွေ ရောဂါကုဆေးရုံကြီးကို စံပြဆေးရုံအဖြစ် ဘက်စုံအဆင့်မြှင့်တင်မည်ဖြစ်ပြီး အဆင့်မြှင့်တင်ရေး လုပ်ငန်းများအတွက် Master Plan ရေးဆွဲဆောင်ရွက်မည်ဖြစ်ကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။

ကျန်းမာရေးနှင့် အားကစားဝန်ကြီးဌာနအနေဖြင့် ရခိုင်ပြည်နယ်အတွင်းရှိ ဆေးရုံများ၊ ကျေးလက်ကျန်းမာရေးဌာန/  ဌာနခွဲများအား နှစ်စဉ်ရန်ပုံငွေချထားမှုအပေါ် မူတည်၍ အဆင့်မြှင့်တင်ခြင်းများ ဆောင်ရွက်လျက်ရှိပြီး စစ်တွေအထွေထွေရောဂါ ကုဆေးရုံကြီး အဆင့်မြှင့်တင်ရန် Master Plan ရေးဆွဲကာ ဆောင်ရွက်လျက်ရှိကြောင်း၊ စစ်တွေ အထွေထွေရောဂါကုဆေးရုံကြီးတွင် သွေးလှူဘဏ်ရှိကြောင်းနှင့် နိုင်ငံအနေဖြင့် ဆေးရုံတိုင်းတွင် သွေးလှူဘဏ်ထားရှိရန် မတတ်နိုင်သည့်အပြင် သွေးလှူဘဏ်တစ်ခု တည်ထောင်ရန်မှာ စရိတ်များစွာကုန်ကျသော်လည်း မောင်တောခရိုင်အတွင်းရှိ အရေးပေါ်လူနာများအား သွေးသွင်းကုသနိုင်ရန်အတွက် ဘူးသီးတောင်မြို့နယ်၌ သွေးလှူဘဏ်ငယ်တစ်ခုတည်ထောင်ရန် စီစဉ်ထားကြောင်း သိရသည်။

အဆင့်မြှင့်တင်ရေးလုပ်ငန်းများကို နော်ဝေနိုင်ငံနှင့် ပူးပေါင်းလုပ်ဆောင်သွားမည်ဖြစ်ပြီး အဆိုပါကိစ္စနှင့်ပတ်သက်၍ ၂၀၁၇ ခုနှစ် နိုဝင်ဘာ ၈ ရက်က နေပြည်တော်တွင် နော်ဝေနိုင်ငံသံအမတ်ကြီး H.E.Ms Tone Tinnes နှင့်အဖွဲ့သည် ကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီးနှင့် အဖွဲ့တို့ တွေ့ဆုံဆွေးနွေးခဲ့ကြောင်း၊ ရခိုင်ပြည်နယ်တွင် နေထိုင်သူများအားလုံး ကျန်းမာရေး စောင့်ရှောက်မှုပေးနိုင်ရန်နှင့် စစ်တွေပြည်သူ့ဆေးရုံ ဘက်စုံအဆင့်မြှင့်တင်ရေးနှင့်ပတ်သက်၍ ဆွေးနွေးခဲ့ပြီး နော်ဝေနိုင်ငံဘက်မှ ဆောင်ရွက်လိုသည့်ကိစ္စများကို ဆွေးနွေးတင်ပြခဲ့ကြောင်းနှင့် ကျန်းမာရေးဝန်ကြီးဌာနဘက်မှလည်း စစ်တွေဆေးရုံကို ဘက်စုံအဆင့်မြှင့်တင်သည့် လုပ်ငန်းများ ဆောင်ရွက်ရာတွင်ကျန်းမာရေးနှင့် အားကစားဝန်ကြီးဌာန၊ ရခိုင်ပြည်နယ် အစိုးရအဖွဲ့၊ အလှူရှင်အဖွဲ့အစည်းများ ပါဝင်သည့် အဖွဲ့တစ်ဖွဲ့ဖွဲ့စည်းကာ ပူးပေါင်းလုပ်ဆောင်နိုင်ရေး စီစဉ်ပေးမည်ဖြစ်ကြောင်း သိရသည်။

ယင်းသို့ ဆွေးနွေးမှုများမတိုင်မီ ကျန်းမာရေးနှင့် အားကစားဝန်ကြီးဌာနအနေဖြင့် စစ်တွေပြည်သူ့ဆေးရုံ၌ ဆရာဝန်အင်အား နည်းနေသည့်အတွက် OPD ဆရာဝန်အရေအတွက် တိုးမြှင့်ခန့်ထားပေးရန် စီစဉ်ထားပြီးဖြစ်ကြောင်း၊ ကျန်းမာရေးဝန်ကြီးဌာန၊ ပြည်ထောင်စုဝန်ကြီးသည် သြဂုတ် ၃၀ ရက်က စစ်တွေမြို့ အထွေထွေရောဂါကုဆေးရုံကြီး၏ ပြင်ပလူနာဌာနနှင့်အရေးပေါ် လူနာကုသဆောင်၊ ဧည့်ကြိုဌာနများသို့ ကြည့်ရှုစစ်ဆေးခဲ့ကြောင်း၊ စစ်တွေပြည်သူ့ဆေးရုံ၊ ပြည်နယ်ကုသရေး ဦးစီးဌာနနှင့်ပြည်နယ်      ပြည့်သူ့ကျန်းမာရေးဦးစီးဌာနတို့မှ ဝန်ထမ်းများနှင့်တွေ့ဆုံပြီး ဆေးရုံအတွက် လိုအပ်သော ဆေးနှင့်ဆေးပစ္စည်းများ ဝယ်ယူရာတွင် အလေအလွင့်မရှိရေး၊ ရခိုင်ပြည်နယ်တစ်ခုလုံး၏ ကျန်းမာရေးဝန်ထမ်း အရေအတွက် လိုအပ်ချက်များကို စိစစ်ပြီး ဝန်ထမ်းအမျိုး အစားအလိုက် ရာထူးတက်လမ်းများ မြှင့်တင်ရေး ၊ ဆေးနှင့်ဆေးပစ္စည်း မှာယူဖြန့်ဖြူးသည့် စနစ်တစ်ခုတည်ထောင်ပြီး ဆေးရုံအဆင့်အလိုက် ဆေးဝယ်ယူနိုင်မှုကိစ္စများ၊ တစ်နိုင်ငံလုံးရှိ ဆေးရုံကြီးများ၏ ပြင်ပလူနာဌာနများတွင် ကျန်းမာရေးစောင့်ရှောက်မှု ဆောင်ရွက်နေမှုများကို ပြန်လည်စိစစ်ပြီး လိုက်လျောညီထွေဖြစ်စေမည့် စနစ်တစ်ခုတည်ဆောက်ရန် ဆောင်ရွက်နေကြောင်း၊ စစ်တွေဆေးရုံ၏ လတ်တလောဆရာဝန် အင်အားမှာ လူနာအရေအတွက်နှင့်စာလျှင် အလွန်နည်းနေသည်ကို တွေ့ရသဖြင့် အမြန်ဆုံးဖြည့် ဆည်းပေးမည်ဖြစ်ကြောင်းနှင့် ရောဂါရှာဖွေရေး လုပ်ငန်းအတွက် လိုအပ်ချက်များကို ဖြည့်ဆည်းပေးသွားမည်ဖြစ်ကြောင်း ပြောကြားသည်။

Most Read

Most Recent