<

တနင်္သာရီမြို့နယ် တနင်္သာရီမြို့ဟောင်းကို ရှေးဟောင်းနေရာတည်ရှိရာဇုန်နှင့် ကာကွယ်ထိန်းသိမ်းထားသော ဇုန်အဖြစ် သတ်မှတ်

ရှေးဟောင်းအသုံးအဆောင်များကို တွေ့ရစဉ်

တနင်္သာရီမြို့နယ် တနင်္သာရီမြို့ဟောင်းကို ရှေးဟောင်းနေရာတည်ရှိရာဇုန်နှင့် ကာကွယ်ထိန်းသိမ်းထားသော ဇုန်အဖြစ် သတ်မှတ်ကြေညာလိုက်ပြီဖြစ်ကြောင်း သိရသည်။

တနင်္သာရီတိုင်းဒေသကြီး မြိတ်ခရိုင် တနင်္သာရီမြို့နယ်အတွင်း တည်ရှိသည့် တနင်္သာရီမြို့ဟောင်းအား တိုင်းဒေသကြီး အစိုးရအဖွဲ့မှ ဇန်န၀ါရီ ၁၁ရက် စွဲ၊ အမိန့်ကြေညာစာမှတ် ၁/၂၀၁၈ ၊ တိုင်းဒေသကြီး အစိုးရအဖွဲ့အစည်းအဝေး အမှတ်စဉ် ( ၁၈/  ၂၀၁၇ )အပိုဒ် ( ၆၃ )ဆုံးဖြတ်ချက်အရ ရှေးဟောင်းနေရာတည်ရှိရာဇုန်နှင့် ကာကွယ်ထိန်းသိမ်းထားသော ဇုန်အဖြစ် သတ်မှတ်လိုက်ခြင်းဖြစ်ကြောင်း သိရသည်။ မြိတ်မြို့မှ မိုင် ၅၀ အကွာတွင် တည်ရှိသော တနင်္သာရီမြို့ရှိ ရှေးဟောင်းယဉ်ကျေးမှုမြို့ဟောင်းအား တိုင်းဒေသကြီး အစိုးရအဖွဲ့အနေဖြင့် ထိန်းသိမ်းစောင့်ရှောက်ရန် အစီအစဉ် ရှိ၊ မရှိ မေးခွန်းကို ဒုတိယအကြိမ်တိုင်းဒေသကြီးလွှတ်တော် ဒုတိယပုံမှန်အစည်းအဝေးတွင် တနင်္သာရီမဲဆန္ဒနယ် အမှတ်(၂)မှ တိုင်းဒေသကြီး လွှတ်တော်ကိုယ်စားလှယ် ဦးရဲမြင့်ဆွေက (ကြယ်ပွင့်ပြ) မေးခွန်းမေးမြန်းခဲ့ကြောင်း သိရသည်။

“တနင်္သာရီမြို့ဟောင်းကို တိုင်းဒေသကြီးအစိုးရအဖွဲ့ကနေ အမိန့်ကြေညာစာ ထုတ်ပြန်ပြီး ရှေးဟောင်းနေရာတည်ရှိတဲ့ဇုန်နှင့် ကာကွယ်ထိန်းသိမ်းတဲ့ဇုန်အဖြစ် သတ်မှတ်လိုက်တဲ့အတွက် ကျွန်တော်တို့အနေနဲ့ အတိုင်းမသိ ၀မ်းသာမိပါတယ်။ ဒီလိုရှေးဟောင်းဇုန်တွေ သတ်မှတ်လိုက်ပြီးရင် ဆက်လက်ဆောင်ရွက်ရမှာကတော့ အမိန့်ကြေညာစာမှာဖော်ပြထားတဲ့ နယ်နိမိတ်သတ်မှတ်ချက်တွေအတိုင်း သက်ဆိုင်ရာဌာနတွေနဲ့ ဆောင်ရွက်သွားမှာ ဖြစ်ပါတယ်။ ဒီလိုရှေးဟောင်းဇုန် သတ်မှတ်လိုက်တဲ့ အကြောင်းကို  ပြည်သူလူထုတွေ ကျယ်ကျယ်ပြန့်ပြန့် သိရှိသွားအောင် ရှင်းလင်းတင်ပြခြင်း အခမ်းအနားကိုလည်း ပြုလုပ်သွားမှာ ဖြစ်ပါတယ်” ဟုတနင်္သာရီမြို့နယ်အုပ်ချုပ်ရေးမှူး ဦးဥာဏ်လင်းအောင်က ပြောကြားသည်။

တနင်္သာရီမြို့ဟောင်းအား ယဉ်ကျေးမှု ဇုန်အမျိုးအစားနှစ်မျိုး သတ်မှတ်ထားပြီး AZ (Ancient site Zone) နှင့်  PZ ( Protected and pteserved Zone) တို့ဖြစ်ကြောင်း သိရသည်။ “တနင်္သာရီမြို့ဟောင်းကို ရှေးဟောင်းယဉ်ကျေးမှုဇုန်အဖြစ် တိုင်းဒေသကြီး အစိုးရမှ စာထုတ်ပေးလိုက်တာတွေ့ရပါတယ်။ ဒီလိုသတ်မှတ်လိုက်တဲ့အတွက် အတိုင်းမသိ ၀မ်းသာမိပါတယ်။ တနင်္သာရီတိုင်းရဲ့ မူလဖြစ်တည်တဲ့နေရာလည်းဖြစ်တယ်။ ယဉ်ကျေးမှုဇုန်အဖြစ် သတ်မှတ်ပေးလိုက်တာဟာ တနင်္သာရီတိုင်းသားအားလုံး ၁၀ မြို့နယ် သားအားလုံးရဲ့ အောင်ပွဲအဖြစ် ယူဆပါတယ်။ ဒီလိုအပျော်မျိုးကို ကျွန်တော်တို့လွယ်လွယ်နဲ့ရခဲ့တာ မဟုတ်ပါဘူး။ အခုလို သတ်မှတ်လိုက်တဲ့ နေရာမှာ AZ နှင့် PZ ဆိုပြီး ဇုန်နှစ်မျိုးသတ်မှတ်ပါတယ် AZ က မင်းဆက်ပေါင်း ၂၈၈ ဆက် ထီးနန်းစီုးစံခဲ့တဲ့ တနင်္သာရီ မင်းနေပြည်ရဲ့ အတွင်းပိုင်းကို သတ်မှတ်တာပါ AZ မှာက မြို့ရိုး၊ နန်းတော်ကုန်း၊ ဖွားအောင်သာ ကျောက်တိုင်အထိ သတ်မှတ်ပြီး မြို့ရိုးရဲ့ ပေ ၉၀ အကွာမှာ နောက်ထပ် ကျူးကျော်ဝင်ရောက်မှုတွေ၊ ရုံးတွေ ဆောက်လုပ်တာတွေ မလုပ်နိုင်တော့ဘူး မြို့ရိုးရဲ့ အပြင် ဘက်ကိုကျတော့ တနင်္သာရီမြစ်ကြီးရဲ့ ကမ်းခြေအထိ၊ နောက်တစ်ဖက်က တနင်္သာရီမြစ်ငယ်ရဲ့ ကမ်းခြေအထိကို သတ်မှတ်ထားပါတယ်။ အတွင်းသားကို ကာကွယ်ဖို့ဆိုပြီး PZ ကို သတ်မှတ်ထားပါတယ်။ မြို့ရိုးကနေ တစ်မိုင်ပတ်လည်ကို သတ်မှတ်လိုက်ပါတယ်” ဟု တနင်္သာရီမြို့နယ် စာပေယဉ်ကျေးမှုအမွေအနှစ် ထိန်းသိမ်းမြှင့်တင်ရေးဥက္ကဋ္ဌ ဦးသန်းစိုးဝင်းက ပြောကြားသည်။

တနင်္သာရီမြို့နယ်မှာ ရှေးဟောင်းအမွေအနှစ်များစွာရှိသော်လည်း မြန်မာနိုင်ငံတွင် သိရှိသူ အလွန်နည်းပါးကြောင်း မြို့နယ်အတွင်းရပ်ကွက် နှစ်ခုသာရှိသည့်မြို့ဖြစ်ကြောင်း သိရသည်။ ယဉ်ကျေးမှုထိန်းသိမ်း ရေးဇုန်အဖြစ် သတ်မှတ်လိုက်သော်လည်း လက်ရှိဒေသခံများအနေဖြင့် နေရာပြောင်းရွှေ့ပေးရန် လိုအပ်မည်မဟုတ်ဘဲ အမွေအနှစ်များကို ကာကွယ်ထိန်းသိမ်းပေးရန် လိုအပ်မည်ဖြစ်ကြောင်း သိရသည်။

“တနင်္သာရီမြို့ကို ရှေးဟောင်းယဉ်ကျေးမှုဇုန်အဖြစ် တိုင်းဒေသကြီးအစိုးရက သတ်မှတ်လိုက်တဲ့အတွက် မြို့နယ်သူ၊ မြို့နယ်သားများကိုယ်စား အထူးဝမ်းသာမိပါတယ်။ ဒီလိုသတ်မှတ်ပေးလိုက်တဲ့အတွက် တနင်္သာရီမြို့ကို အနယ်နယ်အရပ်ရပ်က သိလာမှာဖြစ်တဲ့အပြင် ကမ္ဘာသိအဆင့်ထိ ရောက်လာမှာဖြစ်ပြီး ဧည့်သည်တော်များ လာရောက်ကြည့်ရှုလေ့လာကြမှာ ဖြစ်တဲ့အတွက် တိုးတက်လာပါ့လိမ့်မယ်။ နောက်တစ်ခုက ဒီလိုလာတဲ့အခါမှာ ကုန်ပစ္စည်းတွေ၊ ရှေးဟောင်းအမွေအနှစ်တွေကို ထုတ်ဖော်ပြသခွင့်ရပါမယ်။ လက်ရှိရပ်ကွက် နှစ်ခုရှိရာကနေ မြို့သစ်တွေလည်း တိုးချဲ့တည်ဆောက်ပေးဖို့ မျှော်လင့်ပါတယ်” ဟု ချောင်းကြီးရပ်ကွက်မှ ရပ်မိရပ်ဖတစ်ဦးဖြစ်သူ ဦးလှမြင့်မှ ပြောကြားသည်။ တနင်္သာရီတိုင်းဒေသကြီးအတွင်း ရှေးမြို့ဟောင်း ခုနှစ်မြို့ရှိပြီး ဒေသမှတ်တမ်းများအရ ရှေးအကျဆုံးမှာ သာဂရမြို့ဟောင်း (ထားဝယ်) ဖြစ်ပြီး ယဉ်ကျေးမှုဇုန်အဖြစ် ၂၀၁၂ ခုနှစ် ဖေဖော်ဝါရီလတွင် သတ်မှတ်ခဲ့ကာ တနင်္သာရီမြို့ဟောင်းကို ၂၀၁၈ ခုနှစ် ဇန်န၀ါရီ၁၁ ရက်တွင် သတ်မှတ်ပေးခဲ့ခြင်းဖြစ်ကြောင်း သိရသည်။

တနင်္သာရီမြို့ကို ခရစ်နှစ် ၁၂၇၇ ခုနှစ် တည်ထောင်ခဲ့သည်ဟု ဒေသမှတ်တမ်းတွင် ဖော်ပြထားပြီး ပုဂံခရစ်နှစ် ၁၁၇၆ ခုနှစ်၊ ၁၁၉၄ ခုနှစ်၊ ၁၁၉၆ ခုနှစ်များတွင် ရေးထိုးခဲ့သည့် ကျောက်စာများတွင် မြန်မာပိုင်နက်အဖြစ် ဖော်ပြထားခဲ့ကြောင်း သိရသည်။ မြို့ရိုး၊ ကျောက်စာ၊ အုတ်၊ ဒင်္ဂါးများ၊ လူအသုံး အဆောင်များ၊ ရှေးဟောင်းနဂါးလှေများနှင့် အထောက်အထားများစွာမှာ တနင်္သာရီမြို့ ဟောင်းတွင်တည်ရှိနေပြီး ကာကွယ်ထိန်းသိမ်းမှုများ လုပ်ဆောင်သွားရမည်ဖြစ်ကြောင်း ဒေသခံများက ပြောကြားသည်။

January 13, 2018














Copy Protected by Chetan's WP-Copyprotect.