ရန်ကုန်တိုင်းဒေသကြီး ရွှေလုပ်ငန်းရှင်များအသင်း နှစ်ပတ်လည်အစည်းအဝေးကို တွေ့ရစဉ်

မြန်မာနိုင်ငံတွင် ယခုနှစ်အတွင်း ရွှေအရောင်းအဝယ်ပြုလုပ်ရာတွင် ပြည်တွင်းပြည်ပသို့ တင်သွင်းတင်ပို့ခြင်းကို လုပ်ကိုင်နိုင်မည်ဖြစ်ပြီး စတော့ရွှေဈေးကွက်အထိသို့ တိုးချဲ့ရောင်းချနိုင်မည်ဖြစ်ကြောင်း ဇန်နဝါရီ ၁၃ ရက်ကပြုလုပ်သည့် ရန်ကုန်တိုင်းဒေသကြီး ရွှေလုပ်ငန်းရှင်များအသင်း နဝမအကြိမ်မြောက် နှစ်ပတ်လည် အသင်းသား စုံညီအစည်းအဝေးအခမ်းအနားမှ သိရသည်။

“ရွှေကို ပြည်ပတင်ပို့ခွင့် ပိတ်ပင်ထားတာ ရှိပါတယ်။ အဲဒါကို မြန်မာနိုင်ငံအသင်းအနေနဲ့ရော ကျွန်တော်တို့ ရန်ကုန်တိုင်း အသင်းအနေနဲ့ရော အကြိမ်ကြိမ်ဒီအမိန့်ကို ပယ်ဖျက်ပေးဖို့ တင်ပြထားတာတွေလည်း ရှိပါတယ်။ ရွှေကိုလည်း မကြာခင်အချိန်အတွင်းမှာ ပြည်တွင်းပြည်ပရောင်းဝယ် တင်ပို့နိုင်တော့မယ်လို့ ဒီနှစ်ပိုင်းမှာပဲ ဖြစ်မယ်ဆိုတာကို ကျွန်တော်တို့ ကြားနေပါတယ်။ အမှန်တကယ် ရရှိခဲ့မယ်ဆိုရင် ရန်ကုန်တိုင်း အသင်းအနေနဲ့ကလည်း ဈေးကွက်ကို ရရှိထားပြီး ဖြစ်ပါတယ်။ စတော့ရှယ်ယာ ရွှေဈေးကွက်အထိအောင် ရောင်းဝယ်နိုင်တော့မှာ ဖြစ်ပါတယ်” ဟု ရန်ကုန်တိုင်းဒေသကြီး ရွှေလုပ်ငန်းရှင်များအသင်းဥက္ကဋ္ဌ ဦးမျိုးမြင့်က ပြောကြားသည်။

စီးပွားကူးသန်းဝန်ကြီးဌာန၊ ကုန်သွယ်ရေးဦးစီးဌာနမှ ရွှေတင်သွင်း၊ တင်ပို့ ရောင်းချခြင်းကို ကန့်သတ်ထားပြီး အဆိုပါကန့်သတ်ချက်များကို ဖြေလျှော့ပေးရေးအတွက် မြန်မာနိုင်ငံရွှေလုပ်ငန်းရှင်များအသင်းနှင့် ရန်ကုန်တိုင်းဒေသကြီး ရွှေလုပ်ငန်းရှင်များအသင်းတို့မှ တောင်းဆိုမှုများ ပြုလုပ်ထားခဲ့ပြီးဖြစ်ကြောင်း သိရသည်။

ပြည်တွင်းပြည်ပမှရွှေများကို အရောင်းအဝယ်လုပ်ကိုင်နိုင်ပြီး စတော့ရွှေဈေးကွက် ဖြစ်ပေါ်လာပါက နိုင်ငံတကာမှ ရွှေကုန်သည်များအနေဖြင့် မြန်မာနိုင်ငံတွင် တရားဝင်ရွှေရောင်းဝယ်မှုများ လာရောက်ဆောင်ရွက်နိုင်မည်ဖြစ်ကြောင်း သိရသည်။

“အဓိကတော့ ရွှေသွင်းဖို့ တင်သွင်းဖို့ အတွက်ပေါ့။ ကျွန်တော်တို့ဆီက ရွှေကိုလည်း နိုင်ငံခြားကို တင်ပို့လို့ရမယ်။ နိုင်ငံခြားက ရွှေကိုလည်း တင်သွင်းလို့ရမယ်။ အဲဒီ နည်းဥပဒေထွက်လာရင် နိုင်ငံတကာ ရွှေကုန်သည်တွေက ဒီမှာ ကိုယ့်အိမ်ကိုယ့်ယာလို လာရောင်းကြတော့မှာ” ဟု ဦးမျိုးမြင့်က ပြောကြားသည်။

ပြည်တွင်း၌ ရွှေအရောင်းအဝယ်ပြုလုပ်ရာတွင် စံချိန်စံညွှန်း အလေးချိန်နှင့် အရည်အသွေးသတ်မှတ်ချက်ဖြင့် ရွှေတစ်ကျပ်သားတွင် ၁၆ ဒသမ ၆၀၆ ဂရမ်နှင့် အရည်အသွေးအားဖြင့် ၁၉ ဒသမ ၂၅ သိပ်သည်းစ (Density) ရှိရမည်ဟု သတ်မှတ်ထားပြီး၊ အဆိုပါစံချိန်စံညွှန်းများအတိုင်သာ ရောင်းချသွားရမည်ဖြစ်ကြောင်း ဒီဇင်ဘာ ၉ ရက်ကပြုလုပ်သည့် မြန်မာနိုင်ငံရွှေ လုပ်ငန်းရှင်များအသင်း (၁၅) ကြိမ်မြောက် နှစ်ပတ်လည် အသင်းသားစုံညီ အစည်းအဝေးအခမ်းအနားမှ သိရသည်။

“ကျွန်တော်တို့နိုင်ငံမှာ ချိန်တွယ်တဲ့အခါမှာ တစ်နေရာမှာနဲ့တစ်နေရာ ချိန်တွယ်တဲ့ အလေးချင်း မတူဘူး။ ရန်ကုန်မှာဝယ်တဲ့ တစ်ကျပ်သားကို မန္တလေးမှာ၊ တောင်ကြီးမှာချိန်ရင်  အလေးချိန်မတူဘူး။ တစ်နေရာနဲ့တစ်နေရာ ဝယ်တဲ့အလေးချိန်ချင်း မတူတဲ့အခါ ကျွန်တော်တို့က စံတစ်ခုတစ်နိုင်ငံလုံးဖြစ်ချင်တယ်။ ဖြစ်ချင်တဲ့အခါ တစ်ကျပ်သားကို ၁၆ ဒသမ ၆၀၆ ဂ၇မ်ရှိရမယ်လို့ ကျွန်တော်တို့က သတ်မှတ်လိုက်တယ်။ အဲဒီလို သတ်မှတ်ရတဲ့အကြောင်းရင်းက တစ်နိုင်ငံလုံးကို ဘယ်နေရာပဲသွားဝယ်သွားဝယ် ဒီတစ်ကျပ်သားကို ဝယ်ရင် ဒီစံ ဒီအလေးချိန်အတိုင်း ရှိကိုရှိရမယ်။ အဲဒီလိုစံပေါ့ ပထမသတ်မှတ်လိုက်တာ၊ ဒါအလေးချိန်ပဲ” ဟု မြန်မာနိုင်ငံ ရွှေလုပ်ငန်းရှင်များအသင်းဥက္ကဋ္ဌ ဦးကျော်ဝင်းက မီဒီယာများ၏ မေးမြန်းမှုကို ပြန်လည်ဖြေကြားခဲ့သည်။

ရွှေဗဟိုဈေးကွက်ဖော်ဆောင်ရန်အတွက် မြန်မာနိုင်ငံ ရွှေလုပ်ငန်းရှင်များအသင်းအနေဖြင့် စီမံကိန်းနှင့် ဘဏ္ဍာရေးဝန်ကြီးဌာနနှင့် ရန်ကုန်တိုင်းဒေသကြီး အစိုးရအဖွဲ့များဖြင့် ဆွေးနွေးဆောင်ရွက်လျက်ရှိကြောင်း သိရသည်။

မြန်မာ့ရွှေလုပ်ငန်းကဏ္ဍ ဖွံ့ဖြိုးတိုးတက်လာရေးအတွက် ဘဏ်များ၊ အာမခံအဖွဲ့အစည်းများ၊ ငွေကြေးအဖွဲ့အစည်းများပါဝင်သော ခိုင်မာပြီး စနစ်ကျသည့် ရွှေဗဟိုဈေးကွက်အား တည်ထောင်သင့်ကြောင်း    မြန်မာနိုင်ငံရွှေလုပ်ငန်းရှင်များအသင်းမှ နိုင်ငံတော်သို့ တင်ပြထားကြောင်း သိရသည်။