ပို့ကုန်တိုးမြှင့်ရေးနှင့် တန်ဖိုးမြှင့်ထုတ်လုပ်နိုင်မှုကို ဦးစားပေးလုပ်ငန်းအဖြစ် ချေးငွေထုတ်ချေးမည်ဖြစ်သဖြင့် ဆန်စပါးကဏ္ဍအတွင်းမှ ချေးငွေရယူလိုသူများအနေဖြင့် မြန်မာနိုင်ငံဆန်စပါးအသင်းချုပ် (MRF) နှင့်ဆက်သွယ်ရန် မြန်မာနိုင်ငံ ဆန်စပါးအသင်းချုပ်က ထုတ်ပြန်ထားသည်။
ဆန်စပါးလုပ်ငန်းဆောင်ရွက်နေသော SME များ ဖွံ့ဖြိုးတိုးတက်ရေးနှင့် ချေးငွေ ရရှိရေးအတွက် မြန်မာနိုင်ငံဆန်စပါးအသင်းချုပ်အနေဖြင့် နိုင်ငံတော်အစိုးရ စီမံကိန်းနှင့် ဘဏ္ဍာရေးဝန်ကြီးဌာနနှင့် ပူးပေါင်း ဆောင်ရွက်လျက်ရှိကြောင်း သိရှိရသည်။
ချေးငွေရရှိရေးအတွက်ဆောင်ရွက်ရာတွင် ပို့ကုန်တိုးမြှင့်ရေးနှင့် သွင်းကုန်လျှော့ချ အစားထိုးရေးကိုလည်းကောင်း၊ တန်ဖိုးမြှင့် ထုတ်လုပ်နိုင်မှုကိုလည်းကောင်း အခြေခံပြီး ဦးစားပေးလုပ်ငန်းများအား စနစ်တကျ ရွေးချယ်ပြီး စိစစ်ဆောင်ရွက်သွားရန် ရည်ရွယ် ထားကြောင်း သိရသည်။
လုပ်ငန်းများကို အဆင့်ဆင့်စနစ်တကျ ပြင်ဆင်ဆောင်ရွက်သွားမည်ဖြစ်သဖြင့် သက်ဆိုင်ရာ SME များနှင့် အသေးစိတ်ညှိနှိုင်း ပြင်ဆင်ဆောင်ရွက်ရန်လိုအပ်ကြောင်း၊ သို့ဖြစ်သဖြင့် ချေးငွေရယူလိုသူများ မြန်မာနိုင်ငံ ဆန်စပါးအသင်းချုပ်နှင့် ဆက်သွယ်ရန် ထုတ် ပြန်ထားခြင်းဖြစ်သည်။
ဆန်စပါးမျိုးစေ့ထုတ်လုပ်ရန်၊ ဆန်စပါး အခြောက်ခံစက်များ တပ်ဆင်ရန်၊ သိုလှောင်ရုံများ တည်ဆောက်ရန်၊ ဆန်စပါးပြည်ပ တင်ပို့ရောင်းချသော SME Exporter များအတွက် လုပ်ငန်းတိုးချဲ့ရန်၊ ဆန်စက်များ အဆင့်မြှင့်တင်ရန်နှင့် ခေတ်မီဆန်စက်ယူနစ် များတပ်ဆင်ရန်၊ တောင်သူလယ်သမားများ စုဖွဲ့၍ စုပေါင်းစိုက်ပျိုးထုတ်လုပ်ရန်၊ ဖွဲနု ဆီစက်များနှင့် တိရစ္ဆာန်အစာစက်ရုံများ တည်ထောင်ရန်၊ ဆန်ခေါက်ဆွဲ၊ ဆန်ကြာဆံ နှင့် ဆန်မှုန့်စသော တန်ဖိုးမြှင့်ထုတ်လုပ်ရေးလုပ်ရန်၊ စပါးခွံလောင်စာတောင့်များ ထုတ်လုပ်ရန်နှင့် စပါးခွံမှ လျှပ်စစ် ထုတ်လုပ်ရန် စသည့်လုပ်ငန်းများကို လုပ်ကိုင်နေသော SME များအနေဖြင့် ချေးငွေရယူလိုပါက အသင်းချုပ်နှင့် ဆက်သွယ်ရန်နှင့် လက်ရှိဆောင်ရွက်နေခြင်း မဟုတ်သော်လည်း ဆောင်ရွက်ရန် ဆန္ဒရှိပါက မြန်မာနိုင်ငံ ဆန်စပါးအသင်းချုပ်၊ အသေးစားနှင့်အလတ်စားလုပ်ငန်းများ ဖွံ့ဖြိုးတိုးတက်ရေး လုပ်ငန်းကော်မတီသို့ ဆက်သွယ်နိုင်ကြောင်း ထုတ်ပြန်ထားသည်။
မြန်မာနိုင်ငံ ဆန်စပါးအသင်းချုပ်အနေဖြင့် အထက်ပါ လုပ်ငန်းလုပ်ကိုင်လိုသူများအား ချေးငွေရရှိရေး ကူညီဆောင်ရွက်ပေးမည်ဖြစ်ကြောင်း သိရသည်။
အများဆုံး ကျပ်သန်း ၅၀၀ အထိ ထုတ်ချေးနိုင်သည့် JICA SME နှစ်ဆင့်ချေးငွေ စီမံကိန်းတွင် ကုန်ထုတ်လုပ်မှုလုပ်ငန်း၊ လက်လီရောင်းဝယ်ရေးလုပ်ငန်း၊ လက်ကားရောင်းဝယ်ရေး လုပ်ငန်း၊ ဝန်ဆောင်မှုလုပ်ငန်း စသည့် လုပ်ငန်းခြောက်ခုမှာ ချေးငွေရယူနိုင်ပြီး မြန်မာ့လယ်ယာဖွံ့ဖြိုးရေးဘဏ်မှ ချေးငွေရယူရန် အရည်အသွေးပြည့်မီမှုရှိသော လယ်သမားများ အဆိုပါချေးငွေရယူနိုင်သည့်လုပ်ငန်းများတွင် အကျုံး မဝင်ကြောင်း SME နှစ်ဆင့်ချေးငွေစီမံကိန်း ပထမအဆင့် ဆောင်ရွက်နေမှုနှင့်စပ်လျဉ်း၍ သတင်းထုတ်ပြန်ချက်တွင် ဖော်ပြထားသည်။
