ပြည်ပနိုင်ငံမှ လျှပ်စစ်ဓာတ်အား ဝယ်ယူရန်အတွက် လျှပ်စစ်နှင့် စွမ်းအင်ဝန်ကြီးဌာနက လေ့လာဆွေးနွေးမှုများ ပြုလုပ်နေပြီး လာအိုနိုင်ငံနှင့် လျှပ်စစ်ဓာတ်အားဝယ်ယူရေးဆိုင်ရာ နားလည်မှု စာချွန်လွှာရေးထိုးမည်ဖြစ်ကြောင်း လက်ထောက်အတွင်းဝန် ဦးမင်းမင်းဦးက ပြောကြားသည်။
“လာအိုနဲ့လည်း မကြာခင်မှာ MoU ထိုးဖို့ လုပ်နေတယ်။ အခုလောလောဆယ် MoU ထိုးတာကတော့ နှစ်ဦးနှစ်ဖက်ဓာတ်အား အပြန်အလှန် ရောင်းချဖို့အတွက် ဆွေးနွေးဖို့ သဘောတူတဲ့ စာချုပ်ဖြစ်မှာပေါ့” ဟု လက်ထောက်အတွင်းဝန် ဦးမင်းမင်းဦးက ပြောကြားသည်။
အဆိုပါ MoU ရေးထိုးပြီးနောက်နှစ် နိုင်ငံဓာတ်အား ဝယ်ယူနိုင်ရေးနှင့် ပတ်သက်ပြီး အသေးစိတ် အချက်အလက်များကို ဆက်လက် ဆွေးနွေးရဦးမည်ဖြစ်ကြောင်း ၎င်းက ပြောကြားသည်။
“အသေးစိတ်တွေက အများကြီးရှိတယ်။ ဟိုဘက်က ဓာတ်အားစနစ်နဲ့ ကျွန်တော်တို့ဆီက ဓာတ်အားစနစ်တူညီမှ ရောင်းချလို့ရတာ။ တူညီအောင် ဘယ်လိုလုပ်မလဲ။ ကျွန်တော်တို့က ဘယ်လောက်ဝယ်ပြီး ဘယ်လောက်ဖြန့်မလဲ။ သူတို့ရောင်းချတဲ့ ဓာတ်အားသည် ဈေးနှုန်းကို ဒီအရောက် ဘယ်လိုသတ်မှတ်မလဲ။ အဲဒီလိုမျိုးတွေ အများကြီးရှိသေးတယ်” ဟု လက်ထောက်အတွင်းဝန် ဦးမင်းမင်းဦးက ပြောကြားသည်။
မြန်မာနိုင်ငံအနေဖြင့် ၂၀၃၀ ပြည့်နှစ်တွင် တစ်နိုင်ငံလုံး အတိုင်းအတာဖြင့် မီးလင်းနိုင်ရေးအတွက် အမျိုးသားလျှပ်စစ်ဓာတ်အား စီမံကိန်း NEP ကို ချမှတ်ဆောင်ရွက်နေရာတွင် ကျောက်မီးသွေးနှင့် ရေအားလျှပ်စစ်စီမံကိန်းများကို ဒေသခံပြည်သူများက ကန့်ကွက်မှုများ ရှိနေကြောင်း၊ ယင်းစိန်ခေါ်မှုများကို ကျော်လွှားနိုင်ရန်အတွက် လျှပ်စစ်နှင့် စွမ်းအင်ဝန်ကြီးဌာန အနေဖြင့် လိုအပ်သော ဓာတ်အားကို ပြည်ပမှ ဝယ်ယူဖြည့်တင်းရန် လေ့လာဆွေးနွေးမှုများ ပြုလုပ်နေခြင်းဖြစ်သည်။
“ရေအားတို့ ကျောက်မီးသွေးတို့ဆိုရင် ဒေသခံတွေက ကန့်ကွက်မှုတွေ ရှိတာကြောင့် စိန်ခေါ်မှုတွေရှိတာပေါ့။ စိန်ခေါ်မှုတွေကို ကျော်လွှားနိုင်ဖို့အတွက် အခုဘာတွေလုပ်နေပြီလဲဆိုရင် ပြည်ပကနေ ဓာတ်အားဝယ်ယူဖို့အတွက်၊ လာအိုတရုတ်အိန္ဒိယတို့ကနေ ကျွန်တော်တို့နိုင်ငံကို ဓာတ်အားဝယ်ယူဖို့အတွက် လာရောက် ကမ်းလှမ်းနေတာရှိတယ်။ အဲဒါတွေအပေါ်မှာ ကျွန်တော်တို့က အတွေ့အကြုံ မရှိတဲ့အတွက် ဆွေးနွေးနေတဲ့အဆင့် ရှိတယ်” ဟု ဦးမင်းမင်းဦးက ပြောကြားသည်။
“ကျွန်တော်တို့ အတွေ့အကြုံ မရှိသေးတဲ့အတွက် လေ့လာနေတယ်။ နိုင်ငံဖြတ်ကျော်ကလည်း လေ့လာတယ်။ ဘယ်လိုစာချုပ်တွေ လုပ်ရတယ်။ Technically ဘယ်လိုလုပ်ရတယ်။ တစ်နိုင်ငံနဲ့ တစ်နိုင်ငံဓာတ်အားစနစ်တွေ Harmonize ဖြစ်အောင် ဘယ်လိုလုပ်ရမလဲ။ ဒါတွေကို လေ့လာနေတဲ့အဆင့်ပဲ ရှိသေးတယ်။ ဓာတ်အားခနှုန်းထားကတော့ ဒါတွေကို ညှိနှိုင်းဆွေးနွေးပြီး နှစ်ဦးနှစ်ဖက် ဆွေးနွေးပြီး သဘောတူတဲ့ ဈေးနှုန်းသတ်မှတ်ပြီး ရောင်းမှာပေါ့နော်။ ကျွန်တော်တို့လည်း လက်ခံနိုင်တဲ့ဈေးနှုန်းဆိုရင် ကျွန်တော်တို့ဝယ်မယ်။ ပြည်သူတွေကို ဖြန့်မယ်” ဟု ဦးမင်းမင်းဦးက ပြောကြားသည်။
ထို့ပြင် သဘာဝဓာတ်ငွေ့ကို အစားထိုးရန်အတွက် ပြည်ပမှ LNG များ တင်သွင်းပြီး LNG ဖြင့် ဂက်စ်တာဘိုင်များလည်ပြီး ဓာတ်အားထုတ်လုပ် ဖြန့်ဖြူးပေးရန် အစီအစဉ်ရှိကြောင်း သိရသည်။
“လတ်တလောမှာက LNG နဲ့ အဖွဲ့တွေ လာဆွေးနွေးနေတာရှိတယ်။ ပြီးရင်လည်း တခြားနည်းလမ်းပြည်ပကနေ ဓာတ်အားဝယ်ယူတဲ့ဟာကိုလည်း လေ့လာနေတယ်။ ဆွေးနွေးနေတဲ့အဆင့်ကို ရောက်တယ်။ တခြားတော့ ဆိုလာတို့၊ ပြန်လည် ပြည့်ဖြိုးမြဲစွမ်းအင်တို့နဲ့ ပတ်သက်ပြီး တချို့ပရောဂျက်လေးတွေ လုပ်နေတာတွေရှိတယ်။ နောက်ပြီးတော့ လက်ရှိအကောင်အထည်ဖော်နေတဲ့ ရေအားလျှပ်စစ်စီမံကိန်းတွေကိုလည်း ဦးစားပေး အဆင့်သတ်မှတ်ပြီး ၂၀၃၀ ရည်မှန်းချက်ကိုမီအောင် ကြိုးစားနေတယ်” ဟု လက်ထောက်အတွင်းဝန် ဦးမင်းမင်းဦးက ပြောကြားသည်။
