မြန်မာနိုင်ငံ စားသုံးသူကာကွယ်ရေးအသင်း၏ ထုတ်ပြန်ချက်နှင့် ပတ်သက်ပြီး မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်းက ကန့်ကွက်ကြောင်း သဘောထားထုတ်ပြန်

မြန်မာနိုင်ငံ စားသုံးသူကာကွယ်ရေးအသင်း၏ ထုတ်ပြန်ချက်နှင့် ပတ်သက်ပြီး မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်းက ကန့်ကွက်ကြောင်း သဘောထားထုတ်ပြန်
Published 7 January 2018

မြန်မာနိုင်ငံစားသုံးသူ ကာကွယ်ရေးအသင်း၏ ထုတ်ပြန်သည့် ပြည်တွင်း ပဲစားသုံးမှု မြှင့်တင်ပွဲများနှင့် ပတ်သက်ပြီး သဘောထား ထုတ်ပြန်ချက်အား မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်း အနေဖြင့် လုံးဝလက်ခံနိုင်ခြင်း မရှိဘဲ ကန့်ကွက်ကြောင်း ဇန်နဝါရီ ၆ ရက်တွင် ထုတ်ပြန်ခဲ့သည်။

ထုတ်ပြန်ချက်တွင် စားသုံးသူရေးရာဦးစီးဌာနမှ တာဝန်ရှိသူများအနေဖြင့် စားသုံးသူကို ကာကွယ်ရမည့်အစား၊ ပဲစိုက်တောင်သူနှင့် တာဝန်ရှိသူများအနေဖြင့် စားသုံးသူကို ကာကွယ်ရမည့်အစား ပဲစိုက်တောင်သူနှင့် ပဲကုန်သည်များ၏ မျက်နှာတစ်ခုတည်းကို ကြည့်ပြီး ပြည်တွင်း ပဲစားသုံးမှုမြှင့်တင်ပွဲများ ပွဲတော်များကို ဦးဆောင်ကျင်းပနေခြင်းကို ရပ်ဆိုင်းရန် မြန်မာနိုင်ငံ စားသုံးသူကာကွယ်ရေးအသင်းက ကန့်ကွက်ကြောင်း သဘောထားကြေညာချက်စာအား ၂၀၁၇ ဒီဇင်ဘာ ၂၆ ရက်စွဲဖြင့် ထုတ်ပြန်ထားကြောင်း၊ ယင်းထုတ်ပြန်ချက်တွင် “ဂျပန်နိုင်ငံနှင့် ဥရောပနိုင်ငံများတွင် ပဲဈေးကွက်များ ရှိသော်လည်း မြန်မာနိုင်ငံမှ စိုက်ပျိုးထုတ်လုပ်နေသည့် ပဲများမှာ လက်ခံနိုင်သော ပမာဏထက် ပိုးသတ်ဆေးဓာတ်ကြွင်းများ ပိုမိုများပြားနေ၍ ဝယ်ယူမှု မရှိကြောင်း၊ သက်ဆိုင်ရာ တာဝန်ရှိသူများအနေဖြင့် ပဲစိုက်တောင်သူမျာအား ဘေးကင်းလုံခြုံ စိတ်ချ၍ အရည်အသွေး ပြည့်မီသော ပဲများ ထုတ်လုပ်နိုင်စေရန်၊ ပဲစိုက်ပျိုးရာတွင် မလိုအပ်ဘဲ ပိုးသတ်ဆေး သုံးစွဲနေမှုကို ရှောင်ကြဉ်ခြင်း၊ အော်ဂဲနစ် စိုက်ပျိုးနည်း၊ သဘာဝဓာတ်မြေသြဇာဖြင့် စိုက်ပျိုးထုတ်လုပ်နိုင်ရန် ပညာပေးခြင်း၊ ပဲကုန်သည်များအနေဖြင့် ပဲသိုလှောင်ရာတွင် ပိုးသတ်ဆေးပြားများကိုအသုံးမပြုဘဲ သဘာဝနည်းစနစ်များဖြင့် ပိုးသတ်စေရန်၊ သိုလှောင်နည်းများကို ပညာပေးခြင်းတို့ကို ဆောင်ရွက်ရမည့်အစား ဈေးကွက်နှင့် အရောင်းအဝယ် ကျဆင်းမှုကြောင့် ရောင်းမကုန်သော ပဲစားပွဲတော်များ၊ ပဲစားသုံးမှု မြှင့်တင်ပွဲများ ပြုလုပ်နေသည်ကို တွေ့ရှိရပါကြောင်း” စသည်တို့ကို မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်းမှ ကန့်ကွက်ကြောင်း ဖော်ပြထားသည်။

အဆိုပါ ဖော်ပြချက်များနှင့် ပတ်သက်ပြီး စိုက်ပျိုးရေးမွေးမြူရေးနှင့် ဆည်မြောင်းဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်းနှင့် ရန်ကုန်တိုင်းဒေသကြီး ကုန်သည်များနှင့် စက်မှုလုပ်ငန်းရှင်များအသင်းတို့မှ အသင်းဝင် လုပ်ငန်းရှင်များ ပူးပေါင်းပြီး ဥရောပနိုင်ငံများမှ GAP, GHP, GMP နည်းစနစ်များအတိုင်း ပဲစိုက်တောင်သူများ စတင်စိုက်ပျိုးချိန်မှ ပြည်ပတင်ပို့ချိန်အထိ လုပ်ငန်းစဉ် တစ်လျှောက်လုံးတွင် ပိုးသတ်ဆေး ဓာတ်ကြွင်းများ မပါရှိစေရန်အတွက် အသိပညာပေး ဆောင်ရွက်စေပြီး ထွက်ရှိသော ပိုးသတ်ဆေး ဓာတ်ကြွင်းကင်းစင်သည့် ပဲများအား ဂျပန်၊ ဥရောပနှင့် အနောက်နိုင်ငံ ဈေးကွက်များသို့ တင်ပို့ရောင်းချလျက်ရှိကြောင်း ဖော်ပြထားသည်။

ထို့ပြင် မြန်မာနိုင်ငံမှ ထွက်ရှိသည့် ပဲမျိုးစုံ၏ ရာခိုင်နှုန်း ၇၀ ကျော် ဝယ်ယူနေသည့် အိန္ဒိယနိုင်ငံမှ ပဲတင်သွင်းမှုအား ကန့်သတ်ကုန်စည်အဖြစ် ၂၀၁၈ မတ် ၃၀ ရက်အထိ သတ်မှတ်ခြင်းသည် ပဲများ၌ ပိုးသတ်ဆေး ဓာတ်ကြွင်းများ ကျန်ရှိခြင်းကြောင့် မဟုတ်ဘဲ အိန္ဒိယတောင်သူများ၏ အကျိုးစီးပွားကို ကာကွယ်ရန် အိန္ဒိယနိုင်ငံသို့ ပဲတင်ပို့နေသော ကမ္ဘာ့နိုင်ငံများအားလုံးတို့မှ မတ်ပဲ၊ ပဲစင်းငုံ နှင့် ပဲတီစိမ်း တင်သွင်းခွင့် တန်ချိန် ကန့်သတ်ခဲ့ခြင်းဖြစ်ကြောင်း၊ မြန်မာနိုင်ငံအနေဖြင့် ပဲမျိုးစုံအား စားသုံးသည့် အလေ့အထ နည်းပါးလျက်ရှိပြီး ပဲမျိုးစုံတွင် အသားဓာတ်၊ သံဓာတ် နှင့် အခြားအာဟာရဓာတ်များ ပြည့်ဝစွာပါဝင်ခြင်း၊ စားသုံးမှု ကုန်ကျစရိတ်မှာ အသားစားသုံးမှုနှင့် နှိုင်းယှဉ်ပါက ကုန်ကျစရိတ် နည်းပါးသည့်အပြင် ကျန်းမာရေးအတွက် များစွာ အထောက်အကူပြုသဖြင့် ပဲစားသုံးမှု အလေ့အထကောင်းများ ရရှိစေနိုင်ရန်အတွက် ပြည်တွင်း ပဲစားသုံးမှု မြှင့်တင်ပွဲများကို စီစဉ်ဆောင်ရွက်ပေးနေခြင်း ဖြစ်ကြောင်း ထုတ်ပြန်ချက်တွင် ဖော်ပြထားသည်။ ဆန်းထူးအောင်

 

 

Most Read

Most Recent