၂၀၁၇ ခုနှစ်အတွင်း ပြည်ခရိုင်တွင် တိုင်ကြားထားသည့် လယ်ယာမြေအမှုတွဲ ၁၂၈ ခုရှိပြီး ဖြေရှင်းပေးရန် ကြန့်ကြာမှုနှင့် လက်တွေ့ အကောင်အထည်ဖော်နိုင်မှု အားနည်းဟု လွှတ်တော်ကိုယ်စားလှယ်များ ပြောကြား

၂၀၁၇ ခုနှစ်အတွင်း ပြည်ခရိုင်တွင် တိုင်ကြားထားသည့် လယ်ယာမြေအမှုတွဲ ၁၂၈ ခုရှိပြီး ဖြေရှင်းပေးရန် ကြန့်ကြာမှုနှင့် လက်တွေ့ အကောင်အထည်ဖော်နိုင်မှု အားနည်းဟု လွှတ်တော်ကိုယ်စားလှယ်များ ပြောကြား
Published 7 January 2018

၂၀၁၇ ခုနှစ်အတွင်း ပြည်မြို့နယ်တွင် တိုင်ကြားထားသည့် လယ်ယာမြေအမှုတွဲပေါင်း ၁၂၈ ခုရှိပြီး ဖြေရှင်းပေးရန် ကြန့်ကြာမှုနှင့် လက်တွေ့ အကောင်အထည်ဖော်နိုင်မှု အားနည်းနေကြောင်း တိုင်းဒေသကြီးလွှတ်တော် ကိုယ်စားလှယ်များက ပြောကြားသည်။

“ကြန့်ကြာနေတဲ့ သဘောက ခရိုင်တွေ မြို့နယ်တွေမှာ ဦးစီးအရာရှိ လက်ထောက်ညွှန်ကြားရေးမှူးတွေပေါ့။ တိုင်းလည်းကျရော ဒုညွှန်တွေဖြစ်ကုန်တော့ ဆွေးနွေးရတာ နည်းနည်းလေး အကျပ်အတည်းလေး ဖြစ်မလားလို့။ နောက်တစ်ခု တိုင်းကော်မတီဝင်တွေကလည်း ကိုယ်တို့ဆိုရင် ခရိုင်ကော်မတီဝင် ဆိုပေမယ့် လူခွဲပြီး စစ်ရတယ်။ သုံးယောက်ရှိရင် ဘယ်မြို့နယ် တစ်ယောက်ကို နှစ်မြို့နယ် အဲဒါကျတော့ နည်းနည်းလေး အမှုဖြစ်စဉ်တွေကို သိသေးတယ်။ သူတို့ကျတော့ ကွင်းဆင်းခြင်း မရှိတော့ ဒီအစီရင်ခံစာ ရေးတဲ့အပေါ်မှာ ဆုံးဖြတ်ရင် ကြန့်ကြာသွားမယ် ထင်တယ်။ နောက်တစ်ခုက တောင်သူကိုယ်စားလှယ်၊ လွှတ်တော်ကိုယ်စားလှယ်တွေ မသိဘဲနဲ့ ပြီးခဲ့တဲ့ အမှုတွဲ တော်တော်များများ တိုင်းရောက်သွားတာ ရှိတယ်။ ခရိုင်ကနေ ကိုယ်စားလှယ်တွေ မသိဘဲနဲ့ တိုင်းကို တင်လိုက်တဲ့ အမှုတွဲလေးတွေ ရှိတယ်” ဟု လယ်ယာမြေနှင့်အခြားမြေများ သိမ်းဆည်းခံရမှုများ ပြန်လည်စိစစ်ရေးကော်မတီ (ပြည်ခရိုင်) အဖွဲ့ဝင် ပြည်မြို့နယ် တိုင်းဒေသကြီး လွှတ်တော်ကိုယ်စားလှယ် ဦးသက်ဝင်းလှိုင် က ပြောကြားသည်။

အဆိုပါ တိုင်ကြားထားသည့် ၁၂၈ မှုတွင် ၇၈ မှုမှာ စိစစ်ပြီး တိုင်းမြေ/စစ်ကော်မတီသို့ တင်ပြခဲ့ပြီး အမှု ၅၀ မှာ အချက်အလက် စာရင်းဇယားနှင့် ပုံစံမဝင်ခြင်းများကြောင့် ပြန်လည်ချထားပေးခဲ့ကြောင်း လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေးကော်မတီ (ပြည်ခရိုင်) မှ သိရသည်။

“ကော်မတီတစ်ခုလုံးရဲ့ လုပ်ဆောင်ချက်အနေနဲ့ အားရပါတယ်။ ဒါပေမဲ့ အဆင့်ဆင့်ရဲ့ ပြန်လည်ပြီးတော့ ဘက်ပေါင်းစုံ၊ ရှုထောင့်ပေါင်းစုံကနေ ပြန်ပြီးတော့ စဉ်းစားတဲ့အခါမှာတော့ ကြန့်ကြာမှုတွေ အများကြီး ဖြစ်တယ်။ ကျွန်တော်တို့ မြေပြင်မှာတော့ လက်တွေ့အကောင်အထည်ဖော်နိုင်မှု အားနည်းနေပါသေးတယ်” ဟု ပြည်မြို့နယ် တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက ပြောကြားသည်။

မြေ/စစ်ကော်မတီ၏ သုံးသပ်ချက်များတွင် စီမံကိန်းလုပ်ဆောင်ခြင်း မရှိ၍ ပြန်ပေးသင့်ကြောင်း သုံးသပ်သော်လည်း သိမ်းဆည်းထားသည့် သက်ဆိုင်ရာဌာနများ အနေဖြင့် မဆောက်လုပ်သေးသော စီမံကိန်းများကို အကြောင်းပြမှုရှိကြောင်း၊ မြေစာရင်းဌာန အနေဖြင့်လည်း ပြန်လည်စိစစ်မှုတွင် အားနည်းနေကြောင်း ၎င်းက ဆက်လက်ပြောကြားသည်။

သိမ်းဆည်းထားမှုတွင် တပ်မတော်နှင့် စိုက်ပျိုးရေးဌာနတို့က အများဆုံး သိမ်းဆည်းခဲ့ပြီး ပြည်မြို့နယ်တွင် အနောက်လက်ခုပ်ပင်အုပ်စု၊ ထမ္မကောက်အုပ်စုတို့တွင် သိမ်းဆည်းထားမှု များပြားပြီး ခေတ်အဆက်ဆက် ဖြေရှင်းနိုင်မှု မရှိကြောင်း၊ တိုင်ကြားမှုများတွင် ဗဟို၊ တိုင်း ခရိုင်တို့သို့ တိုက်ရိုက်တိုင်ကြားမှုများလည်း ရှိကြောင်း သိရသည်။

Most Read

Most Recent