ပြည်ပ၌သာမက ပြည်တွင်း ငါးဖမ်းလုပ်ငန်းများတွင်လည်း လူကုန်ကူးမှုဖြစ်ပွားမှုများကြောင့် ပူးပေါင်းတားဆီးကြရန် လူကုန်ကူးရဲတပ်ဖွဲ့ တိုက်တွန်း

ပြည်ပ၌သာမက ပြည်တွင်း ငါးဖမ်းလုပ်ငန်းများတွင်လည်း လူကုန်ကူးမှုဖြစ်ပွားမှုများကြောင့် ပူးပေါင်းတားဆီးကြရန် လူကုန်ကူးရဲတပ်ဖွဲ့ တိုက်တွန်း
Published 6 January 2018

လူကုန်ကူးမှုများမှာ ပြည်ပ၌သာမက ပြည်တွင်း ငါးဖမ်းလုပ်ငန်းများတွင်လည်း ဖြစ်ပွားလာမှုများကြောင့်လူကုန်ကူးမှုများကို  ပူးပေါင်းတားဆီးကြရန် လူကုန်ကူးမှု တားဆီး နှိမ်နင်းရေးရဲတပ်ဖွဲ့က သက်ဆိုင်ရာတာဝန် ရှိသူများ၊ ဌာနဆိုင်ရာများ၊ လူမှုအဖွဲ့အစည်းများနှင့် ပြည်သူလူထုတစ်ရပ်လုံး ပူးပေါင်းပါဝင်တားဆီးပေးရန် ၎င်းတို့၏ လူမှုကွန်ရက်စာမျက်နှာမှတစ်ဆင့် ဇန်နဝါရီ ၅ ရက်တွင် တိုက်တွန်းသည်။

လူကုန်ကူးမှုရဲတပ်ဖွဲ့၏ တိုက်တွန်းကြောင်း ထုတ်ပြန်ချက်တွင် လွန်ခဲ့သော လေးငါးနှစ်ခန့်က လူကုန်ကူးမှုဟုဆိုလျှင် အိမ်နီးချင်းနိုင်ငံများတွင် ဦးတည်ဖြစ်ပွားတတ်သဖြင့် တရုတ်၊ ထိုင်း၊ မလေးရှား၊ အင်ဒိုနီးရှား မည်သည့်နိုင်ငံများတွင် ဖြစ်ပွားသနည်းဟု မေးတတ်ကြသော်လည်း လက်ရှိတွင် ပြည် တွင်း၌လည်း လူကုန်ကူးမှုများ ဦးတည်ဖြစ်ပွားနေသဖြင့် အရေးယူမှုများ ရှိခဲ့ကြောင်း၊ ပြည်တွင်းလူကုန်ကူးမှုထဲတွင် ပြည်တွင်းငါးဖမ်းလုပ်ငန်းများတွင်လည်း လူကုန်ကူးမှုများ ဖြစ်ပွားကြောင်း၊ ဧရာဝတီတိုင်း၊ ဖျာပုံခရိုင်၊ နောက်မီး၊ ခါးပြတ်၊ ဗန္တာပင်၊ မြစ်တန်း၊ ချောင်း စုစသည့် ကျေးရွာများ၊ မွန်ပြည်နယ်၊ ရေး မြို့နယ်၊ အစင် စသည့် ကျေးရွာများတွင် အဖြစ်များကြောင်း၊ အဆိုပါဒေသများတွင် မိုးရာသီအကုန် ပွင့်လင်းရာသီခုနစ်လအတွင်း ကမ်းနီး၊ ကမ်းဝေး ငါးဖမ်းလုပ်ငန်းခွင်ဝင်ကြကြောင်း၊ ငါးဖမ်းလှေများ ကျားဖေါင်များ များလာသကဲ့သို့ လှေလုပ်သားများလည်း အများကြီး လိုအပ်လာကြောင်း၊ ထို့ကြောင့် လုပ်ငန်းရှင်များသည် လှေလုပ်သားများရရှိရန် အပြိုင်အဆိုင် စုဆောင်းကြသည့်အခါ ပွဲစားများကို အားကိုးကြရာမှ မသမာသည့်ပွဲစားများသည် လုပ်ငန်းသဘာကို ကြိုတင်၍ သေချာရှင်းပြ ခြင်းမရှိဘဲ လူစုဆောင်းကြသည့်အတွက် ပြဿနာများ ဖြစ်လာကြောင်း အစရှိသည်တို့ ပါရှိသည်။

ထို့ပြင် ပွဲစားများသည် လုပ်ငန်းရှင်ထံမှ ကြိုတင်ငွေများ ထုတ်ယူသကဲ့သို့ လှေလုပ်သားများ၏ လုပ်အားခများကိုလည်း ဖြတ်တောက်ကာ ကိုယ်ကျိုးသုံးကြကြောင်း၊ ယင်းသို့စု ဆောင်းခံရသည့် လှေလုပ်သားများသည် လုပ်ခလစာမရဘဲ ပင်လယ်ထဲ၌ လနှင့်ချီ၍ အလုပ်လုပ်ကြရကြောင်း၊ ထို့ကြောင့် အလုပ်ရှင် အလုပ်သမားအကြား ခိုင်မာသည့် သဘောတူ စာချုပ်များစည်းမျဉ်းစည်းကမ်းများလုပ်ရန် လိုအပ်လာကြောင်း၊ ယင်းအပြင် အလုပ်ရှင်နှင့် အလုပ်သမား တွေ့ဆုံဆွေးနွေးကာ အလုပ်သမားငှားရမ်းခြင်းများ၊ တရားဝင် ပြည်တွင်း အလုပ်သမားစုဆောင်းသည့် အေဂျင်စီများမှတစ်ဆင့် အလုပ်သမားငှားရမ်းမှုများလုပ်ရန် လိုလာကြောင်း၊ လွန်ခဲ့သော ၂၀၁၅ ခုနှစ်တွင် အင်ဒိုနီးရှားပင်လယ်ပြင်တွင် ထိုင်းငါးဖမ်းလှေများမှ လူကုန်ကူးခံရသည့် မြန်မာရေလုပ် သားများအကြောင်းကို AP သတင်းဌာနက ဖော်ထုတ်ခဲ့သောကြောင့်၊ ဥရောပနိုင်ငံများက ကျွန်ပြုခံရသူများ၏ အသက်၊ ချွေး၊ သွေး များဖြင့် ထုတ်လုပ်ထားသည့် ထိုင်းနိုင်ငံမှရေထွက်ပစ္စည်းများကို ဝယ်နေမိသည့်အတွက် စိစစ်မှုများ၊ ကန့်သတ်မှုများ လုပ်ခဲ့သဖြင့် ထိုင်းနိုင်ငံ၏စီးပွားရေး ထိခိုက်ခဲ့ရကြောင်း၊ ကမ္ဘာတွင်  တရုတ်၊ နော်ဝေပြီးလျှင် ထိုင်းနိုင်ငံသည် တတိယရေထွက်ပစ္စည်း တင်ပို့သည့် နိုင်ငံဖြစ်ကြောင်း၊ ယင်းကဲ့သို့ ဖြစ်စဉ်မျိုးများ ရှိခဲ့သည့်အတွက် မြန်မာနိုင်ငံအတွင်း ပြည်တွင်းငါး ဖမ်းလုပ်ငန်းများတွင်လည်း လူကုန်ကူးမှုများ မဖြစ်စေဖို့အတွက် ကာကွယ်တားဆီးသွားရမည်ဖြစ်ကြောင်း၊ ထို့ကြောင့် လူကုန်တား ရဲတပ်ဖွဲ့က သက်ဆိုင်ရာ တာဝန်ရှိသူများ၊ ဌာနဆိုင်ရာများ၊ လူမှုအဖွဲ့အစည်းများနှင့် ပြည်သူလူထုတစ်ရပ်လုံးက ပူးပေါင်းပါဝင်ကာ တားဆီးပေးဖို့ တိုက်တွန်းကြောင်း သတင်း ထုတ်ပြန်ခဲ့သည်။

Most Read

Most Recent