<

ကချင်ပြည်နယ်အတွင်း လျှပ်စစ်နှင့် သဘာဝပတ်ဝန်းကျင်ဆိုင်ရာ စီမံကိန်းများတွင် ဒေသခံဌာနေတိုင်း ရင်းသားများ ပိုင်ဆိုင်ခွင့်၊ ဆုံးဖြတ်ပိုင်ခွင့်နှင့်စီမံခန့်ခွဲပိုင်ခွင့် ပါဝင်စေရန် ကချင်နိုင်ငံရေးပါတီများ တောင်းဆို

ကချင်ပြည်နယ်တွင်း လျှပ်စစ်နှင့် သဘာဝပတ်ဝန်းကျင်ဆိုင်ရာ စီမံကိန်းများတွင် ဒေသ ခံဌာနေတိုင်းရင်းသားများ ပိုင်ဆိုင်ခွင့်၊ ဆုံးဖြတ်ပိုင်ခွင့်နှင့် စီမံခန့်ခွဲပိုင်ခွင့်ပါဝင်စေရန် ကချင်နိုင်ငံရေးပါတီများက ဇန်န၀ါရီ ၅ ရက်တွင် သဘောထားထုတ်ပြန်ကာ  တောင်းဆိုခဲ့ သည်။

ဇန်န၀ါရီ ၅ ရက်တွင် မြစ်ကြီးနားမြို့ Palm Spring ဟိုတယ်တွင် IFC နိုင်ငံတကာ ဘဏ္ဍာရေးကော်ပိုရေးရှင်းနှင့်နိုင်ငံတကာအဖွဲ့တို့က ဧရာဝတီမြစ်အထက်ပိုင်း၊ အလယ်ပိုင်း၊ အောက်ပိုင်းဒေသများတွင် မဟာဗျူ ဟာမြောက် သဘာဝပတ်ဝန်းကျင် လေ့လာဆန်းစစ်မှု အလုပ်ရုံဆွေးနွေးပွဲပြုလုပ်နေစဉ် ကချင်နိုင်ငံရေးပါတီများ ပူးပေါင်းဆောင်ရွက်ရေးကော်မတီက သဘောထားထုတ်ပြန်ချက် လေးချက်နှင့်အတူ ထုတ်ပြန်ခဲ့ခြင်းဖြစ်သည်။

ယင်းသဘောထားထုတ်ပြန်ချက်တွင် ပြည်တွင်းစစ်ဖြစ်နေသော ကချင်ပြည်နယ်တွင် နိုင်ငံတကာအဖွဲ့အစည်းများမှ အကြီးစား စွမ်းအင်ထုတ်လုပ်မှုစီမံကိန်းများကို ရည်ရွယ်သည့် မဟာဗျူဟာမြောက် လေ့လာဆန်းစစ်ရေးအဖွဲ့အား ကချင်နိုင်ငံရေးပါတီများ ပူးပေါင်းဆောင်ရွက်ရေးကော်မတီက ပြင်းထန်စွာ ကန့်ကွက်ပါကြောင်း၊ သဘာဝပတ်ဝန်းကျင်နှင့် ဆန်းစစ်လေ့လာမှုလုပ်ငန်းကို နိုင်ငံတကာအဖွဲ့အစည်းများနှင့် တစ်ဖက်သတ်လုပ်ဆောင်ခြင်းသည် လွဲမှားသောလုပ်ရပ်ဖြစ်ကြောင်း၊ ပြည်နယ်တွင်း လျှပ်စစ်စွမ်းအင်နှင့် သဘာဝပတ်ဝန်းကျင်ဆိုင်ရာ စီမံကိန်းများတွင် ဒေသခံဌာနေတိုင်းရင်းသားများ၏ ပိုင်ဆိုင်ခွင့်၊ ဆုံးဖြတ်ပိုင်ခွင့်နှင့် စီမံခန့်ခွဲပိုင်ခွင့်တို့ကို လုပ်ငန်းအကောင်အထည်ဖော်မှုအဆင့်ဆင့်တွင် ပါဝင်စေရန်၊ စစ်မြေတလင်းတွင် အကြီးစားစီမံကိန်းကို ထောက်ပံ့မည့်အစား စစ်ပြေးဒုက္ခသည်များကူညီခြင်း နှင့် ငြိမ်းချမ်းစွာဖြေရှင်းခြင်းတို့ကို ဦးစားပေး ဆောင်ရွက်ရန် တိုက်တွန်းကြောင်း သဘောထားထုတ်ပြန်ခဲ့သည်။

ကချင်ဒီမိုကရက်တစ်ပါတီ (KDP) မှ ဦးဂျော်ဆန်းနော်က ‘‘ကျွန်တော်တို့ထုတ်ပြန် ချက်ထုတ်ရတာက IFC နိုင်ငံတကာဘဏ္ဍာရေး ကော်ပိုရေးရှင်းနှင့် နိုင်ငံတကာအဖွဲ့အစည်းတွေ ခုနစ်ဖွဲ့လောက်က Palm Spring ဟိုတယ်မှာ ဧရာဝတီနှင့်ပတ်သက်ပြီး လေ့လာဆန်းစစ်ချက် ၀ပ်ရှော့လုပ်တယ်။ မနှစ်ကလည်းလာတယ်။ ကျွန်တော်တို့ ကန့်ကွက်ခဲ့တယ်။ အခုက ကျွန်တော်တို့လည်း မနေ့ကမှ သိရတာ။ မြစ်ဆုံစီမံကိန်းကို စိုးရိမ်လို့ ထုတ်ပြန်ချက်ထုတ်ရတာပါ။ ဒီဝပ်ရှော့မှာလည်း နိုင်ငံရေးပါတီခေါင်းဆောင်၊ ဒေသခံတိုင်းရင်း သားခေါင်းဆောင်တွေမပါဘူး။ ဒေသခံမပါ ဘူး။ ဒီနေ့ဆန္ဒပြဖို့ လုပ်ပေမဲ့ ငြိမ်းစုစီ မတင်ရတော့ မလုပ်ရဘူး။ အဓိကတော့ နိုင်ငံတကာ အသိုင်းအ၀ိုင်းတွေနဲ့ ချဉ်းကပ်ပြီး ကချင်ပြည်နယ်အတွင်းမှာ စီမံကိန်းကြီးတွေအတွက်  ကြိုးပမ်းလာတာလို့မြင်တယ်။ မနှစ်ကလည်းလာတယ်။ ဒါကြောင့် ကန့်ကွက်တဲ့ထုတ်ပြန်ချက် ထုတ်လိုက်တာပါ။ မြစ်ဆုံစီမံကိန်းကို လူထုက ရွေးချယ်လိုက်တဲ့ အစိုးရသစ်လက်ထက်မှာ အပြီးတိုင်ရပ်ဆိုင်းဖို့ အမြန်ဆုံးဖြတ်ချက်ချဖို့ လိုနေပါပြီ’’ဟုပြောကြားသည်။

၂၀၁၇ ခုနှစ် ဇန်န၀ါရီ ၃၁ ရက်တွင် IFC နိုင်ငံတကာ ဘဏ္ဍာရေးကော်ပိုရေးရှင်းက မြန်မာ့ရေအားလျှပ်စစ်ကဏ္ဍအတွက် မဟာဗျူဟာမြောက် သဘာဝပတ်ဝန်းကျင် လေ့လာဆန်းစစ်မှုလမ်းပြမြေပုံ အလုပ်ရုံ ဆွေးနွေးပွဲကို မြစ်ကြီးနားမြို့ Palm Spring  ဟိုတယ်တွင်ပြုလုပ်ခဲ့သည်။ယင်းအချိန်က မြစ်ဆုံဒေသမှရွှေ့ပြောင်းကျေးရွာသားများနှင့် နိုင်ငံရေးပါတီများက ဆန္ဒပြကန့်ကွက် ခဲ့သည်။

ကချင်ပါတီများ ပူးပေါင်းရေးကော်မတီ  (KPCC) က IFC အဖွဲ့အပေါ်သဘောထား ကြေညာချက်ထုတ်ပြန်ခဲ့ပြီး ထုတ်ပြန်ချက်တွင် ကချင်ပြည်နယ်အတွင်း စစ်မက်များဖြစ် ပွားနေပြီး စစ်ရှောင်သူများစွာရှိနေခြင်း၊ နိုင်ငံတကာအဖွဲ့အစည်းများအနေဖြင့် နိုင်ငံရေးပဋိပက္ခများကို ဖြေရှင်းပေးရန်ထောက်ခံမှုပြု ခြင်းသာ ဖြစ်သင့်ပါကြောင်း၊ ဒေသခံများမှာ ယင်းတို့၏ဇာတိမြေများပေါ်တွင် ယင်းတို့၏ သဘောဆန္ဒမပါဘဲ ပြုလုပ်ခဲ့သော ကြီးမားသောစီမံကိန်းများကြောင့် သဘာဝပတ်ဝန်းကျင်များ ပျက်စီးခဲ့ရပြီး မူလအခွင့်အရေးများ ဆုံးရှုံးနေချိန်တွင် စီမံကိန်းနှင့် ပတ်သက်သည်များကို ရှေ့တန်းတင်သင့်သည့်အချိန်မဟုတ်ကြောင်း၊ တိုင်းပြည် တည်ငြိမ်အေးချမ်းမှသာ ကမ္ဘာဘဏ်များအနေဖြင့် ကြီးမားသော စီမံကိန်းကြီးများကို လေ့လာထောက်ပံ့သင့်ပါကြောင်း သဘောထားထုတ်ပြန်ခဲ့သည်။

ယင်းအချိန်ကမူ သင်တန်းပေးလာသည့် ပြောရေးဆိုခွင့်ရှိသူများက IFC အနေဖြင့် မြစ်ဆုံစီမံကိန်းတွင် ပါဝင်ပတ်သက်ခြင်း မရှိကြောင်း၊ IFC လုပ်ငန်းစဉ်မှာ သဘာဝပတ်ဝန်းကျင်ဆိုင်ရာထိခိုက်မှု၊ လူမှုပတ်ဝန်းကျင် ထိခိုက်မှုများကို ပြန်လည်စဉ်းစားပေးရန် ဆုံးဖြတ်ချက်ချနိုင်မည့်သူများအား စံချိန်စံညွှန်း များကို အမြဲတမ်း စဉ်းစားနိုင်ရန်ဖြစ်ကြောင်း၊  မည်သည့်စီမံကိန်းပဲဖြစ်ဖြစ် ဆိုးကျိုးများကို လူအများမသိကြ၍ ပဋိပက္ခများ ဖြစ်လာသည့်အကြောင်းရင်းများကိုသိရန် ဆွေးနွေးပွဲ များ လာရောက်ပြုလုပ်ခြင်းဖြစ်ကြောင်း ပြောကြားခဲ့သည်။

 

January 5, 2018














Copy Protected by Chetan's WP-Copyprotect.