<

ရှမ်းပြည်နယ်မြောက်ပိုင်း ကျောက်မဲတွင် စစ်ဘေးရှောင် ၁၀၀၀ ကျော်ရောက်ရှိနေပြီး စားနပ်ရိက္ခာလိုအပ်နေ

ရှမ်းပြည်နယ်မြောက်ပိုင်း ကျောက်မဲမြို့တွင် စစ်ဘေးရှောင်စခန်းလေးခုရှိပြီး မိုင်းငေ့ါတွင်လည်း စစ်ဘေးရှောင်များရောက်ရှိနေကာ အားလုံးပေါင်း စစ်ဘေးရှောင်တစ်ထောင်ကျော်တို့သည် စားနပ်ရိက္ခာလိုအပ်လျက်ရှိကြောင်း သိရသည်။

၂၀၁၇ ခုနှစ် ဒီဇင်ဘာလကုန်ခါနီးမှ စတင်ကာထွက်ပြေးလာကြခြင်းဖြစ်ပြီး ယခု ၇ ရက်မြောက်တွင် စစ်ဘေးရှောင်များ ထပ်မံရောက်ရှိလာနေသဖြင့် စားနပ်ရိက္ခာများလိုအပ်နေပြီး။ မိုးရွာသည်မှာ သုံးရက်ရှိပြီ စသဖြင့် စောင်များအခင်းများ လိုအပ်နေကြောင်း ကျောက်မဲသို့ ကူညီကယ်ဆယ်ရေးရောက်ရှိနေသော ကိုသားဇော်က ပြောကြားသည်။ ကျောက်မဲတွင် စစ်ဘေးရှောင်စခန်းလေးခုရှိပြီး ၀ါဆိုကျောင်း။ ဘိုးသာအောင်ဓမ္မာရုံ။ အောင်မင်္ဂလာကျောင်း။ အသစ်ထပ်ဖွင့်သော အောင်မြေသာယာကျောင်းတိုက်တို့တွင် စစ်ရှောင်ပေါင်း တစ်ထောင်ကျော်တို့သည် ခိုလှုံနေကြရပြီး လိုအပ်ချက်များစွာရှိကြောင်း သိရသည်။ ကျောက်မဲနှင့် နမ္မတူနယ်စပ်ဒေသများတွင် တိုက်ပွဲများ ထပ်မံဖြစ်ပွားဖွယ် စိုးရိမ်မှုအခြေအနေတို့ကြောင့် မိုးထဲရေထဲတွင် ထိုသို့ထွက်ပြေးနေကြရခြင်းဖြစ်ကာ ဆက်လက်၍ မိုင်းငေါ့တွင်လည်း စစ်ဘေးရှောင်စခန်းတစ်ခုရှိကြောင်း နယ်စည်းမခြား ပရဟိတအသင်းထံမှ သိရသည်။

“စားနပ်ရိက္ခာတွေ အဓိကလိုအပ်နေတယ်။ မိုးရွာတာသုံးရက်ရှိပြီဆိုတော့ စောင်တွေခြင်ထောင်တွေလည်း လိုအပ်နေတယ်။ ဒီနေ့လည်း ထပ်ရောက်လာတယ်။ စစ်ရှောင်တွေ တစ်ထောင်ကျော်နေပြီ” ဟု ကူညီကယ်ဆယ်ရေးအဖွဲ့မှ ကိုသားဇော်က ပြောကြားသည်။














Copy Protected by Chetan's WP-Copyprotect.