မွန်ဒေသလုံးဆိုင်ရာဒီမိုကရေစီပါတီနှင့် မွန်အမျိုးသားပါတီတို့ ပထမဆုံးအကြိမ်အဖြစ် ပူးတွဲကြေညာချက်ထုတ်ပြန်

မွန်ဒေသလုံးဆိုင်ရာဒီမိုကရေစီပါတီနှင့် မွန်အမျိုးသားပါတီတို့ ပထမဆုံးအကြိမ်အဖြစ် ပူးတွဲကြေညာချက်ထုတ်ပြန်
Published 4 January 2018

မွန်ဒေသလုံးဆိုင်ရာ ဒီမိုကရေစီပါတီနှင့် မွန်အမျိုးသားပါတီတို့ ပထမဆုံးအကြိမ်အဖြစ် ပူးတွဲကြေညာချက်တစ်စောင်ကို ဇန်နဝါ ရီ ၃ ရက်နေ့စွဲဖြင့် ထုတ်ပြန်လိုက်သည်။

အဆိုပါကြေညာချက်တွင် နှစ်ပါတီ ကိုယ်စားလှယ်သုံးဦးစီသည် တစ်လလျှင်တစ်ကြိမ် တွေ့ဆုံသွားမည်ဖြစ်ပြီး အကြောင်းအရာရှိပါက ပါတီအချင်းချင်းဆက်သွယ်ပြီး တွေ့ဆုံသွားမည်ဖြစ်ကြောင်း၊ အမျိုးသားနိုင်ငံရေးနှင့်ပတ်သက်၍ နှစ်ပါတီပူးပေါင်း ဆောင်ရွက်သွားမည်ဖြစ်ကြောင်း၊ နှစ်ပါတီပေါင်းစည်းရေးအတွက် အကြိမ်ကြိမ်တွေ့ဆုံဆွေးနွေးရေးကို ဆက်လက်ဆောင်ရွက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ထို့ပြင် နှစ်ပါတီဖွဲ့စည်းပုံစည်းမျဉ်းကို ညှိနှိုင်းနိုင်ရန်အတွက် လဲလှယ်လေ့လာသွားမည်ဖြစ်ကြောင်း၊ (၇၁) ကြိမ်မြောက် မွန်အမျိုးသားနေ့အတွက် နှစ်ပါတီပူးပေါင်းပြီး ကြေညာချက်ထုတ်ပြန်သွားမည်ဖြစ်ကြောင်း၊ (၂၁) ရာစုပင်လုံညီလာခံနှင့် ပတ်သက်၍ လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကို နှစ်ပါတီပူးပေါင်းဆောင်ရွက်နိုင်ရန် ဆက်လက်ဆွေးနွေးသွားမည်ဖြစ်ကြောင်းနှင့် မွန်ပြည်သူ့ညီလာခံနှင့်ပတ်သက်၍ ပါတီအလိုက် အသီးသီးသဘောထား ထုတ်ပြန်သွားမည်ဖြစ်ကြောင်း ဖော်ပြပါရှိသည်။

“မွန်အမျိုးသားပါတီနဲ့မွန်ဒေသလုံးဆိုင်ရာ ဒီမိုကရေစီပါတီတို့ဟာ နှစ်ပါတီပေါင်းစည်းရေး ဆောင်ရွက်နေတာကိုလည်း မွန်ပြည်သူတွေကို သိစေချင်ပါတယ်။ အဓိက နှစ်ပါတီပူးတွဲထုတ်ပြန်ချက်ထုတ်ရတဲ့ ရည်ရွယ်ချက်ကအဲဒါပါပဲ” ဟု မွန်အမျိုးသားပါတီ အတွင်းရေးမှူး (၂) နိုင်စိုးမြင့်က ပြောကြားသည်။

“မနေ့က (ဇန်နဝါရီ ၂ ရက်) မွန်ဒေသလုံးဆိုင်ရာ ဒီမိုကရေစီပါတီက ပါတီထိပ်သီးခေါင်းဆောင်ပိုင်းရယ်၊ မွန်အမျိုးသားပါတီက ပါတီထိပ်သီးခေါင်းဆောင်ပိုင်းတွေ တွေ့ဆုံပြီးတော့ သဘောတူညီချက်တွေကို ကြေညာချက်အနေနဲ့ ထုတ်ပြန်တာဖြစ်ပါတယ်” ဟု မွန်ဒေသလုံးဆိုင်ရာ ဒီမိုကရေစီပါတီ တွဲဖက်အတွင်းရေးမှူး နိုင်စံတင်က ပြောကြားသည်။

ဇန်နဝါရီ ၂ ရက်မွန်းလွဲပိုင်းက မွန်ဒေသလုံးဆိုင်ရာ ဒီမိုကရေစီပါတီမှ ဒုတိယဥက္ကဋ္ဌ နိုင်ချမ်းတွဲ့၊ ပါတီဗဟိုကော်မတီဝင် နိုင်မောင်မောင်၊ ပါတီတွဲဖက်အတွင်းရေးမှူး နိုင်စံတင်တို့နှင့် မွန်အမျိုးသားပါတီမှ ဒုတိယဥက္ကဋ္ဌ နိုင်တင်အောင်၊ ပါတီအတွင်းရေးမှူး (၁) နိုင်လယိတမ၊ ပါတီအတွင်းရေးမှူး (၂) နိုင်စိုးမြင့်၊ ပါတီဗဟိုကော်မတီဝင် နိုင်ခေစိုက်နှင့် မိကျဲကျဲညီတို့ မွန်နှစ်ပါတီ ပေါင်းစည်းရေးကိစ္စနှင့်ပတ်သက်ပြီး မော်လမြိုင်မြို့တွင် တွေ့ဆုံဆွေးနွေးခဲ့သည်။

မွန်နိုင်ငံရေးပါတီနှစ်ပါတီ ပေါင်းစည်းရေးအတွက် မွန်ဒေသလုံးဆိုင်ရာဒီမိုကရေစီပါတီ ကိုယ်စားလှယ်သုံးဦးနှင့် မွန်အမျိုးသားပါတီ ကိုယ်စားလှယ်သုံးဦးတို့ နိုဝင်ဘာ ၈ ရက်က ပထမဦးဆုံးအကြိမ်အဖြစ် မော်လမြိုင်မြို့တွင် အလွတ်သဘော တွေ့ဆုံဆွေးနွေးခဲ့ကြပြီး ပါတီပေါင်းစည်းရေးအတွက် အကြိမ်ကြိမ်ညှိနှိုင်းဆောင်ရွက်သွားရန်၊ နှစ်ဖက်ကိုယ်စားလှယ်သုံးဦးစီက တစ်လတစ်ကြိမ် တွေ့ဆုံသွားရန်နှင့် ကြားကာလအတွင်း၌လည်း အရေးပေါ်ကိစ္စများရှိလာပါက ချိတ်ဆက်တွေ့ဆုံသွားရန်နှင့် အမျိုးသားရေးကိစ္စများကို အတူတကွ ပူးပေါင်းလုပ်ဆောင်သွားရန် စသည့်အချက်သုံးချက်ကို သဘောတူညီမှုရရှိခဲ့ကြကြောင်း သိရသည်။

မွန်ပြည်သူများ၏ ဆန္ဒသဘောထားများအပေါ်မူတည်ပြီး မွန်ပြည်သူများအကျိုး သယ်ပိုးနိုင်မည့် အင်အားကောင်း၍ ကိုယ်စားပြုမှုရှိသော မွန်နိုင်ငံရေးပါတီတစ်ရပ် ပေါ်ထွက်လာစေရေး ဆွေးနွေးအဖြေရှာရန် ရည်ရွယ်ကာ ရှိရင်းနိုင်ငံရေးပါတီများ အပါအဝင် မွန်လူထုအလွှာအသီးသီးမှ စုံညီစွာပါဝင်မည့် မွန်ပြည်သူ့ညီလာခံတစ်ရပ်ကို မွန်ညီညွတ်ရေးအဖွဲ့က ကမကထပြုပြီး မွန်ပြည်သူများ၏အားဖြင့် ၂၀၁၈ ခုနှစ် ဇန်နဝါရီ ၁၃ ရက်နှင့် ၁၄ ရက်များတွင် မော်လမြိုင်မြို့ရှိ သာသနာ (၂၅၀၀) ဓမ္မာရုံ၌ ကျင်းပမည်ဖြစ်ကြောင်း မွန်ညီညွတ်ရေးအဖွဲ့က ဒီဇင်ဘာ ၁၅ ရက်တွင် ထုတ်ပြန်ကြေညာထားသည်။

မွန်နိုင်ငံရေးပါတီများ ပေါင်းစည်းနိုင်ရေးနှင့်ပတ်သက်ပြီး ဒီဇင်ဘာ ၂၈ ရက်က မွန်ပြည်နယ် ချောင်းဆုံမြို့နယ် ကမာမိုကျေးရွာတွင် ပြုလုပ်ခဲ့သည့် ဆဋ္ဌမအကြိမ်မြောက် မွန်လူငယ်နေ့ အထိမ်းအမှတ်အခမ်းအနားတွင် မွန်လူငယ်များက ဆန္ဒပြုလက်မှတ် ကောက်ခံခြင်းများပြုလုပ်ခဲ့ပြီး ဇန်နဝါရီလအတွင်းပြုလုပ်မည့် မွန်ပြည်သူ့ညီလာခံသို့ တင်သွင်းမည်ဖြစ်သည်။

မွန်တိုင်းရင်းသား နိုင်ငံရေးပါတီဖြစ်သည့် မွန်ဒီမိုကရေစီပါတီနှင့် မွန်ဒေသလုံးဆိုင်ရာ ဒီမိုကရေစီပါတီတို့ကိုပူးပေါင်းရန် မွန်ဒီမိုကရေစီပါတီအား မွန်အမျိုးသားပါတီအဖြစ် ၂၀၁၄ ခုနှစ်တွင် အမည်ပြောင်းလဲကာ မွန်ဒေသလုံးဆိုင်ရာဒီမိုကရေစီပါတီမှ ပါတီပူးပေါင်းလိုသူများက မွန်အမျိုးသားပါတီသို့ ပါဝင်ခဲ့ကြသည်။

သို့ရာတွင် မွန်ဒေသလုံးဆိုင်ရာဒီမိုကရေစီပါတီမှ ပါတီပူးပေါင်းခြင်းမပြုလိုသူများက မွန်ဒေသလုံးဆိုင်ရာဒီမိုကရေစီပါတီအား ဖျက်သိမ်းခြင်းမရှိဘဲ ပါတီအား ဆက်လက်ရပ်တည်ခဲ့သဖြင့် လက်ရှိတွင်လည်း မွန်တိုင်းရင်းသားနိုင်ငံရေးပါတီမှာ နှစ်ပါတီအဖြစ် ဆက်လက်ရပ်တည်လျက်ရှိပြီး ပါတီပေါင်းစည်းရေးမှာလည်း ဆွေးနွေးနေဆဲဖြစ်သည်။

မွန်ဒေသလုံးဆိုင်ရာဒီမိုကရေစီပါတီသည် ၂၀၁၀ ပြည့်နှစ် အထွေထွေရွေးကောက်ပွဲတွင် မွန်ပြည်နယ်နှင့် ကရင်ပြည်နယ်အတွင်း မဲဆန္ဒနယ် ၃၄ နေရာ ဝင်ရောက်ယှဉ်ပြိုင်ခဲ့ရာ ပြည်သူ့လွှတ်တော်သုံးနေရာ၊ အမျိုးသားလွှတ်တော်လေးနေရာနှင့် ပြည်နယ်လွှတ်တော် ကိုးနေရာရရှိခဲ့သော်လည်း ၂၀၁၅ ခုနှစ် အထွေထွေရွေးကောက်ပွဲတွင် မဲဆန္ဒနယ် ၃၅ နေရာ ဝင်ရောက်ယှဉ်ပြိုင်ခဲ့သော်လည်း မွန်ပြည်နယ်တွင် ပြည်နယ်လွှတ်တော်ကိုယ်စားလှယ် တစ်နေရာသာ အနိုင်ရရှိခဲ့သည်။

မွန်အမျိုးသားပါတီအနေဖြင့် ၂၀၁၀ ပြည့်နှစ် အထွေထွေရွေးကောက်ပွဲတွင် ဝင်ရောက်ယှဉ်ပြိုင်ခဲ့ခြင်းမရှိဘဲ ၂၀၁၅ ခုနှစ် အထွေထွေရွေးကောက်ပွဲတွင် မဲဆန္ဒနယ် ၅၃ နေရာ ဝင်ရောက်ယှဉ်ပြိုင်ခဲ့ရာ အမျိုးသားလွှတ်တော်တစ်နေရာနှင့် ပြည်နယ်လွှတ်တော် နှစ်နေရာသာ အနိုင်ရရှိခဲ့သည်။

Most Read

Most Recent