မကွေးတိုင်းအတွင်းရှိ ရေသန့်စက်ရုံတစ်ရုံအား စစ်ဆေးနေစဉ်

မကွေးတိုင်းအတွင်း FDA ထောက်ခံချက်မရှိဘဲ ထုတ်လုပ်နေသည့် ရေသန့်စက်ရုံများ တွေ့ရှိခဲ့ပြီး အဆိုပါ စက်ရုံများကို သက်ဆိုင်ရာ မြို့နယ်အုပ်ချုပ်ရေးမှူးများနှင့် ပူးပေါင်းပြီး ထုတ်လုပ်နေမှုများကို တားမြစ်မှုများ ပြုလုပ်သွားမည်ဖြစ်ကြောင်း တိုင်း FDA တာဝန်ခံ ဒေါက်တာပြည့်ထူးက ပြောကြားသည်။

မကွေးတိုင်းဒေသကြီးအတွင်း စားသောက်ကုန်လုပ်ငန်းများနှင့် ပတ်သက်ပြီး အစားအသောက်နှင့် ဆေးဝါးကွပ်ကဲရေးဌာနမှ လိုက်လံစစ်ဆေးမှုများ ပြုလုပ်လျက်ရှိပြီး လတ်တလော စစ်ဆေးမှုများအရ မြို့နယ်တချို့တွင် FDA ထောက်ခံချက်မရှိဘဲ ရေသန့်ထုတ်လုပ်မှုများ ရှိနေပြီး အဆိုပါစက်ရုံများကို မြို့နယ်အုပ်ချုပ်ရေးမှူးများမှတစ်ဆင့် တားမြစ်မှုများ ပြုလုပ်သွားမည်ဖြစ်ကြောင်း သတင်းရရှိသည်။

“ရေသန့်စက်ရုံတွေကတော့ အဓိက ဆာဗေးဆင်းတဲ့ သဘောမျိုးနဲ့ စစ်တာပါ။ ရေသန့်စက်ရုံတွေမှာ ဘာတွေလိုအပ်နေလဲ၊ ပြင်ဆင်မှုတွေကို ကျွန်တော်တို့ ဓာတ်ပုံတွေပြန်တင်ခိုင်းတယ်။ နောက်တစ်ခုကကျတော့ ထောက်ခံချက်မယူဘဲနဲ့ ထုတ်နေတဲ့ စက်ရုံတွေရှိသလား။ ကျွန်တော်တို့ တောင်တွင်းမှာ စစ်ခဲ့တုန်းကဆိုရင် နှစ်ခုသုံးခုလောက် တွေ့ခဲ့တယ်။ ဒါတွေကို မြို့နယ်အုပ်ချုပ်ရေးမှူးကို စာထုတ်ပြီးတားခိုင်းပါမယ်။ အခု အကြမ်းဖျင်း တွေ့ရှိခဲ့ပုံအရ ဆိုရင်တော့ ဒီလိုစက်ရုံ ၁၀ ခုလောက်တော့ ရှိပါတယ်။ အတိအကျ ဆိုရင်တော့ မြို့နယ်တွေအားလုံး စစ်ပြီးမှ ပြောလို့ရပါမယ်” ဟု မကွေးတိုင်းဒေသကြီး အစားအသောက်နှင့် ဆေးဝါးကွပ်ကဲရေးဌာန (FDA) တာဝန်ခံ ဒေါက်တာပြည့်ထူးက ပြောကြားသည်။

ယခင်ကာလများနှင့် နှိုင်းယှဉ်ပါက မကွေးတိုင်းဒေသကြီးအတွင်း စားသောက်ကုန် လုပ်ငန်းများ အနေဖြင့် FDA ၏တားမြစ်ထားသည့် အချက်များကို လိုက်နာမှုအား ကောင်းလာကြောင်းလည်း ၎င်းကဆက်လက် ပြောကြားသည်။

မကွေးတိုင်း FDA မှ ရေသန့်စက်ရုံများအပြင် မုန့်ဖိုများ၊ ပဲပြားစက်ရုံများ၊ ဖျော်ရည်စက်ရုံများကို လိုက်လံစစ်ဆေးမှုများ ပြုလုပ်လျက်ရှိပြီး စက်ရုံတချို့တွင် ယခင်စစ်ဆေးခဲ့စဉ်နှင့် ကွာခြားသည့် သန့်ရှင်းမှုမရှိသည့် အခြေအနေများလည်း တွေ့ရှိခဲ့ရကြောင်း သိရသည်။