လျှပ်စစ်ဓာတ်အား ထုတ်လုပ်ရောင်းချခြင်း လုပ်ငန်းအပါအဝင် နိုင်ငံခြား၊ နိုင်ငံသား ရင်းနှီးမြှုပ်နှံမှုလုပ်ငန်းကိုးခု မြန်မာနိုင်ငံ ရင်းနှီးမြှုပ်နှံမှုကော်မရှင်၏ ခွင့်ပြုချက်ရရှိခဲ့ကြောင်း ကော်မရှင်၏ ထုတ်ပြန်ချက်အရ သိရသည်။

ဒီဇင်ဘာ ၂၂ ရက်ကပြုလုပ်ခဲ့သည့် မြန်မာနိုင်ငံရင်းနှီးမြှုပ်နှံမှု ကော်မရှင်အစည်းအဝေး (၁၇/၂၀၁၇)  မှ အဆိုပါရင်းနှီးမြှုပ်နှံမှု လုပ်ငန်းများကိုခွင့်ပြုပေးခဲ့ခြင်းဖြစ်ကြောင်း သိရသည်။ ခွင့်ပြုခဲ့သည့် ရင်းနှီးမြှုပ်နှံမှုလုပ်ငန်းများတွင် ရာခိုင်နှုန်းပြည့် နိုင်ငံခြားရင်းနှီးမြှုပ်နှံမှု လုပ်ငန်းနှစ်ခု၊ မြန်မာနိုင်ငံသား ရင်းနှီးမြှုပ်နှံမှုလုပ်ငန်း ငါးခုနှင့် ဖက်စပ်ရင်း နှီးမြှုပ်နှံမှု လုပ်ငန်းနှစ်ခုပါဝင်ကြောင်း သိရသည်။

မြန်မာနိုင်ငံရင်းနှီးမြှုပ်နှံမှု ကော်မရှင် ခွင့်ပြုမိန့်ရခဲ့သည့် လုပ်ငန်းအမျိုးအစားများတွင် မျိုးကြက်ခြံနှင့် ကြက်သားပေါက်ထုတ်လုပ် ရောင်းချခြင်းလုပ်ငန်း၊ မျိုးကြက်မွေးမြူခြင်းနှင့် မျိုးကြက်ဥရောင်းချခြင်း လုပ်ငန်း၊ ဟိုတယ်ဝန်ဆောင်မှုလုပ်ငန်း၊ Apartment များ တည်ဆောက်၍ပြန်လည်ရောင်းချခြင်း နှင့် ငှားရမ်းခြင်း လုပ်ငန်း၊ ဆက်သွယ်ရေးကွန်ရက် အထောက်အကူပြု တာဝါတိုင်တည်ဆောက်ခြင်းနှင့် ပြင်ဆင်မွမ်းမံခြင်း လုပ်ငန်း၊ ရန်ကုန်မြို့တွင်း လမ်းသုံး ပရိဘောဂဒီဇိုင်း ရေးဆွဲ၊ ထုတ်လုပ်၊ တပ်ဆင် လုပ်ငန်း လုပ်ကိုင်ခြင်း၊ ပြုပြင်ထိန်းသိမ်းခြင်းနှင့် ထိုလမ်းသုံး ပရိဘောဂများတွင်ကြော်ငြာခြင်း၊ ခဲသတ္တု သန့်စင်ရောင်းချခြင်းလုပ်ငန်း၊ ၂၃ မဂ္ဂါဝပ် ကျောက်မီးသွေးသုံး လျှပ်စစ်ဓာတ်အားပေး စက်ရုံတည်ဆောက်၍ လျှပ်စစ်ဓာတ်အား  ထုတ်လုပ်ရောင်းချခြင်းလုပ်ငန်း၊ ၉၉ မဂ္ဂါဝပ်ရှိ ချီဖွေငယ် ရေအားလျှပ်စစ် ဓာတ်အားပေးစက်ရုံ တည်ဆောက်၍ လျှပ်စစ်ဓာတ်အား ထုတ်လုပ်ရောင်းချခြင်းလုပ်ငန်းတို့ ပါဝင်ကြောင်း သိရသည်။

၂၃ မဂ္ဂါဝပ်ကျောက်မီးသွေးသုံး လျှပ်စစ်ဓာတ်အားပေးစက်ရုံ တည်ဆောက်၍ လျှပ်စစ်ဓာတ်အား ထုတ်လုပ်ရောင်းချခြင်းလုပ်ငန်းကို မင်းခေတ်သစ်သတ္တုတူးဖော်ရေး ကုမ္ပဏီလီမိတက်က ရှမ်းပြည်နယ် (အ ရှေ့ပိုင်း) တာချီလိတ်မြို့နယ် မိုင်းဟဲ ကျေး ရွာအုပ်စုရှိ မြေဧက ၄၀ တွင်  မြန်မာနိုင်ငံသား ရင်းနှီးမြှုပ်နှံမှုလုပ်ငန်းအဖြစ် ဆောင်ရွက်သွားမည်ဖြစ်ကြောင်း သိရသည်။

၉၉ မဂ္ဂါဝပ်ရှိ ချီဖွေငယ် ရေအားလျှပ်စစ် ဓာတ်အားပေးစက်ရုံ တည်ဆောက်၍ လျှပ်စစ်ဓာတ်အား ထုတ်လုပ်ရောင်းချခြင်း လုပ်ငန်းကို ချီဖွေငယ်ရေအားလျှပ်စစ် ကုမ္ပဏီလီမိတက်က ကချင်ပြည်နယ် ချီဖွေမြို့၏ အရှေ့တောင်ဘက် ၁၁ မိုင်ခန့်အကွာနှင့် အရှေ့ဘက် ၁၈ ကီလိုမီတာအကွာ ချီဖွေချောင်းအနီး ရစ်ဂျော်ကျေးရွာအုပ်စုရှိ မြေ  ၂၂၂ ဒသမ ၁၇ ဧက တွင် ဖက်စပ်ရင်းနှီးမြှုပ်နှံမှု လုပ်ငန်းအဖြစ် ဆောင်ရွက်သွားမည်ဖြစ်ကြောင်း သိရသည်။

အဆိုပါ ခွင့်ပြုမိန့်ရရှိခဲ့သည့် ရင်းနှီးမြှုပ်နှံမှု လုပ်ငန်းများကို သက်ဆိုင်ရာတိုင်းဒေသကြီး/ ပြည်နယ်အစိုးရအဖွဲ့၊ လုပ်ငန်းနှင့် ဆက်စပ်သည့် ပြည်ထောင်စုဝန်ကြီးဌာနများ/အဖွဲ့အစည်းများမှ သဘောထားမှတ်ချက်များ၊ စိစစ်ခွင့်ပြုချက်များအပေါ် အခြေခံကာ မြန်မာနိုင်ငံရင်းနှီးမြှုပ်နှံမှုကော်မရှင် အစည်းအဝေးမှ စိစစ်ခွင့်ပြုပေးခဲ့ခြင်းဖြစ်ကြောင်း သိရသည်။ မြန်မာနိုင်ငံရင်းနှီးမြှုပ်နှံမှု ကော်မရှင်၏(၁၇/၂၀၁၇) အစည်းအဝေးက ခွင့်ပြုခဲ့သည့် ရင်းနှီးမြှုပ်နှံမှုလုပ်ငန်းများမှ အလုပ်အကိုင်အခွင့်အလမ်း ၂၈၇၀ ခု ဖန်တီးပေးနိုင်ခဲ့ကြောင်း ကော်မရှင်က ထုတ်ပြန်ခဲ့သည်။