ရန်ကုန်မြို့အတွင်းရှိ အပူစွမ်းအင်သုံး ဓာတ်အားပေးစက်ရုံများသို့ သဘာဝဓာတ်ငွေ့ ပို့လျက်ရှိသော ရတနာဓာတ်ငွေ့ပိုက်လိုင်းအား တစ်စိတ်တစ်ပိုင်း Shut Down ပြုလုပ်မည်ဖြစ်သည့်အတွက် ရန်ကုန်မြောက်ပိုင်း နှင့် တောင်ပိုင်းတို့တွင် အချိန်ပိုင်းဓာတ်အား ပြတ်တောက်နိုင်ကြောင်း ရန်ကုန်လျှပ်စစ် ဓာတ်အားပေးရေးကော်ပိုရေးရှင်းမှ အသိပေးမှုပြုလုပ်ခဲ့သည်။
ယခုလ ၂၇ ရက်မှစ၍ ရန်ကုန်တိုင်းဒေသကြီးအတွင်းရှိ အပူစွမ်းအင်သုံးဓာတ်အားပေး စက်ရုံများသို့ သဘာဝဓာတ်ငွေ့ပေးပို့လျက်ရှိသော ရတနာသဘာဝဓာတ်ငွေ့ပိုက်လိုင်း၏ Partial Shut Down အား ၂၀၁၈ ခုနှစ် ဇန်နဝါရီ ၂ ရက်အထိ ပြုလုပ်မည်ဖြစ်ကြောင်း သိရသည်။
အဆိုပါလုပ်ငန်းဆောင်ရွက်မှုကြောင့် ရန်ကုန်တိုင်းဒေသကြီးအတွင်းရှိ အပူစွမ်းအင်သုံး ဓာတ်အားပေးစက်ရုံများတွင် ဓာတ်အားထုတ်လုပ်မှု ၁၃၅ မဂ္ဂါဝပ်ခန့် လျော့နည်းသွားမည်ဖြစ်ကြောင်း၊ ဓာတ်အားပေးစက်ရုံများမှ လျော့နည်းထုတ်လုပ်မည့်ဓာတ်အားပမာဏများအား ဘီလူးချောင်း (၁)၊ ဘီလူးချောင်း (၂)၊ အထက်ပေါင်းလောင်း၊ ရဲရွာနှင့် ရွှေလီ (၁) ဓာတ်အားပေးစက်ရုံများမှ ပြန်လည်ဖြည့်တင်းမောင်းနှင်ပေးရန် စီစဉ်ထားပြီးဖြစ်ကြောင်း သိရသည်။
သို့သော်လည်း ၂၃၀ ကေဗွီလှိုင်သာယာခွဲရုံတွင် မြောင်းတကာ ဓာတ်အားအဝင် Incoming Over Load ဖြစ်ပေါ်နိုင်ခြင်းကြောင့် လည်းကောင်း၊ လှော်ကားပင်မဓာတ် အားခွဲရုံများတွင် GT နှင့်တွဲဖက်၍ ဓာတ်အားပေးထားသော (၂၃၀/၃၃) Kv, 100 MVA ဝန်အားပိုလာနိုင်ခြင်းကြောင့် လည်းကောင်း၊ ရတနာ သဘာဝဓာတ်ငွေ့ပိုက်လိုင်း Partial Shut Down ပြုလုပ်သည့် နေရက်များ၌ ဝန်အားအများဆုံး အသုံးပြုသည့် နံနက် ၉ နာရီမှ ၁၀ နာရီအထိ တစ်ကြိမ်၊ ညနေ ၅ နာရီမှ ၇ နာရီအထိ တစ်ကြိမ် လှိုင်သာယာ ပင်မဓာတ်အားခွဲရုံနှင့် လှော်ကား ပင်မဓာတ်အားခွဲရုံတို့ရှိ ဓာတ်အားလိုင်းအချို့အား ဖီဒါအလိုက် ဝန်အားလျှော့ချမှုများရှိနိုင်၍ ရန်ကုန်မြောက်ပိုင်းခရိုင်နှင့် တောင်ပိုင်းခရိုင်ရှိ မြို့နယ်အချို့တွင် အချိန်ပိုင်းယာ ယီဓာတ်အားပြတ်တောက်နိုင်ကြောင်း ရန်ကုန် လျှပ်စစ်ဓာတ်အားပေးရေးကော်ပိုရေးရှင်းမှ သိရသည်။
