KIA/ TNLA အကြမ်းဖက် သောင်းကျန်းသူအဖွဲ့များက ရေနံနှင့်သဘာဝဓာတ်ငွေ့ပိုက်လိုင်း လုံခြုံရေးဆောင်ရွက်နေသည့် စခန်းများအား နှောင့်ယှက်ပစ်ခတ်သည့် ဖြစ်စဉ်ပြမြေပုံကို တွေ့ရစဉ်
ရှမ်းပြည်နယ်(မြောက်ပိုင်း)၊ နမ့်ခမ်းမြို့နယ်အတွင်းရှိ မြန်မာနိုင်ငံမှ တရုတ်နိုင်ငံသို့ သွယ်တန်းထားသည့် ရေနံနှင့်သဘာဝဓာတ် ငွေ့ပိုက်လိုင်း လုံခြုံရေးဆောင်ရွက်နေသော စခန်းများအား ဒီဇင်ဘာ ၂၁ ရက်တွင် ကချင်လက်နက်ကိုင်အဖွဲ့ (KIA) နှင့် တအာင်းလက်နက်ကိုင်အဖွဲ့ (TNLA) တို့က လာရောက်တိုက်ခိုက်ခဲ့ကြောင်း တပ်မတော်ကာကွယ်ရေး ဦးစီးချုပ်ရုံးမှ သတင်းထုတ်ပြန်သည်။
တပ်မတော်ကာကွယ်ရေးဦးစီးချုပ်ရုံး၏ သတင်းထုတ်ပြန်မှုတွင် ဒီဇင်ဘာ ၂၁ ရက် နံနက် ၆ နာရီခွဲခန့်တွင် နမ့်ခမ်းမြို့နယ်၊ ကောင်းကတ်ကျေးရွာအုပ်စု၊ ဟိုနားကျေးရွာ အနီးရှိ ရေနံနှင့် သဘာဝဓာတ်ငွေ့ပိုက်လိုင်း လုံခြုံရေးဆောင်ရွက်နေသည့် လုံခြုံရေးစခန်းအား KIA နှင့် TNLA အဖွဲ့တို့ ပူးပေါင်းအင် အားအချို့က လက်နက်ကြီး၊ လက်နက်ငယ်များဖြင့် လည်းကောင်း၊ နံနက် ၇ နာရီ မိနစ် ၄၀ ခန့်တွင် ပန်ယုတ်ကျေးရွာအုပ်စု၊ လွယ်ချက်ကျေးရွာအနီးရှိ လုံခြုံရေးစခန်းအား KIA နှင့် TNLA အင်အား ၅၀ ခန့်က နေရာသုံးနေရာမှ လက်နက်ကြီး၊ လက်နက်ငယ်များဖြင့် လည်းကောင်း ပစ်ခတ်တိုက်ခိုက်ခဲ့သဖြင့် မိမိဘက်မှ ပြန်လည်တိုက်ခိုက်ခဲ့ရာ နံနက် ၈ နာရီ မိနစ် ၂၀ ခန့်တွင် အနောက်ဘက်နှင့် အရှေ့ဘက်သို့ အသီးသီးဆုတ်ခွာသွားခဲ့ကြောင်း ဖော်ပြထားသည်။
KIA နှင့် TNLA အဖွဲ့က ယခုကဲ့သို့ ရေနံနှင့် သဘာဝဓာတ်ငွေ့ပိုက်လိုင်း လုံခြုံရေးဆောင်ရွက်နေသော စခန်းများအား နှောင့်ယှက်တိုက်ခိုက်ခဲ့ခြင်းသည် မြန်မာ-တရုတ် နှစ်နိုင်ငံ၏ ရှိရင်းစွဲ ချစ်ကြည်ရင်းနှီးမှုကို ထိခိုက်ပျက်ပြားစေရန် ရည်ရွယ်၍ လုပ်ဆောင်ခဲ့ခြင်းဖြစ်ကြောင်းဟု သတင်းထုတ်ပြန်မှုတွင် ရေးသားထားသည်။
တအာင်းလက်နက်ကိုင်အဖွဲ့ (TNLA) သတင်းနှင့်ပြန်ကြားရေးဌာန၏ ဒီဇင်ဘာ ၂၁ ရက် ထုတ်ပြန်မှုတွင် TNLA ၏ တပ်မဟာ ၁ နယ်မြေ နမ့်ခမ်းမြို့နယ်၌ ဒီဇင်ဘာ ၂၁ ရက် နံနက်တွင် TNLA တပ်ရင်း ၄၇၈ နှင့် မြန်မာ့တပ်မတော်တို့ နှစ်နေရာ ထိတွေ့တိုက်ခိုက်မှု ဖြစ်ပွားခဲ့ကြောင်း ဖော်ပြထားသည်။
ယင်းတိုက်ပွဲဖြစ်စဉ်မှာ ကောင်းကတ်ကျေးရွာနှင့် ပန်ဟန်ကျေးရွာကြား၌ လည်းကောင်း၊ အထက်ပန်ယုတ်ကျေးရွာနှင့် အောက်ပန်ယုတ်ကျေးရွာကြား၌လည်းကောင်း နှစ်ဖက်ထိတွေ့တိုက်ပွဲ ဖြစ်ပွားခဲ့ကြောင်း၊ မြန်မာ့တပ်မတော်သည် TNLA ၏ လှုပ်ရှားသည့် တောတွင်းအထိ ထက်ကြပ်မကွာလိုက်လံ ထိုးစစ်ဆင်ခြင်းကြောင့် နှစ်ဖက်ရင်ဆိုင် တိုက်ပွဲဖြစ်ပွားရခြင်းဖြစ်ကြောင်း TNLA ၏သတင်းထုတ်ပြန်မှုတွင် ပါရှိသည်။
