ဒုတိယတပ်မတော် ကာကွယ်ရေးဦးစီးချုပ်နှင့် တရုတ်ပြည်သူ့လွတ်မြောက်ရေးတပ်မတော်၊ တောင်ပိုင်းစစ်နယ်ဝန်းကွပ်ကဲမှုဌာနချုပ်၏ ဒုတိယဌာနချုပ်မှူးတို့ အဖွဲ့ဝင်များနှင့်အတူ စုပေါင်းဓာတ်ပုံရိုက်စဉ် (ဓာတ်ပုံ-တပ်မတော်ကာကွယ်ရေးဦးစီးချုပ်ရုံး)

ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီး စိုးဝင်းသည် ဒီဇင်ဘာ ၁၈ ရက်နံနက်ပိုင်းက တရုတ်ပြည်သူ့လွတ်မြောက်ရေးတပ်မတော်၊ တောင်ပိုင်းစစ်နယ်ဝန်းကွပ်ကဲမှုဌာနချုပ်၏ ဒုတိယဌာနချုပ်မှူးနှင့် ပူးတွဲစစ်ဦးစီးဌာနအကြီးအကဲ Lieutenant General Chen Zhaohai ဦးဆောင်သော ကိုယ်စားလှယ်အဖွဲ့အား နေပြည်တော်ရှိ ဘုရင့်နောင်ရိပ်သာ ဧည့်ခန်းမဆောင်၌ လက်ခံတွေ့ဆုံခဲ့ကြောင်း တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်သည်။

ထိုသို့တွေ့ဆုံရာတွင် မြန်မာ-တရုတ် နှစ်နိုင်ငံသည် နှစ်ပေါင်းများစွာရှည်လျားသည့် ဆက်ဆံရေးရှိခဲ့ပြီး တည်ရှိပြီးသော ဆွေမျိုးပေါက်ဖော်ဆက်ဆံရေးနှင့်အတူ နှစ်နိုင်ငံ ဘက်စုံမဟာဗျူဟာ မိတ်ဖက်ဆက်ဆံရေးအဖြစ် ဆောင်ရွက်လျက်ရှိသည့် အခြေအနေများ၊ နှစ်နိုင်ငံတပ်မတော်အကြီးအကဲများ၏ တွေ့ဆုံဆွေးနွေးဆုံးဖြတ်ချက်များကို အကောင်အထည်ဖော်ရေးဆိုင်ရာ ကိစ္စရပ်များ၊ နှစ်နိုင်ငံနယ်နိမိတ်ချင်း ရှည်လျားစွာထိစပ်နေပြီး နယ်စပ်ပြဿနာများတွင် အစိုးရချင်း၊ တပ်မတော်ချင်း ချစ်ကြည်ရင်းနှီးပွင့်လင်းစွာ ပူးပေါင်းဖြေရှင်းဆောင်ရွက်သွားမည့် အခြေအနေများအား ဆွေးနွေးခဲ့ကြောင်း သိရသည်။

ထို့ပြင် နယ်စပ်ဒေသ တည်ငြိမ်အေးချမ်းရေးအတွက် နှစ်နိုင်ငံအစိုးရနှင့် တပ်မတော်နှစ်ရပ်အကြားတွင် ရင်းနှီးပွင့်လင်းစွာဖြင့် အပြန်အလှန်ယုံကြည်မှု၊ လေးစားမှုနှင့် ရိုးသားမှုများအပေါ်အခြေခံလျက် ပူးပေါင်းဆောင်ရွက်နိုင်ရေးဆိုင်ရာ ကိစ္စရပ်များ၊ နှစ်နိုင်ငံတပ်မတော်နှစ်ရပ်အကြား အပြန်အလှန်လေးစားမှု၊ ယုံကြည်မှု၊ ချစ်ကြည်မှုများဖြင့် ဆက်ဆံဆောင်ရွက်နေမှု အခြေအနေများ၊ မြန်မာ့တပ်မတော်၏ အိမ်နီးချင်းနိုင်ငံ တပ်မတော်များနှင့် ချစ်ကြည်ရင်းနှီးမှု ပိုမိုတိုးတက်ကောင်းမွန်စေရေးအတွက် အထူးအလေးထား ဆောင်ရွက်နေမှုအခြေအနေများကိုလည်း အပြန်အလှန်ဆွေးနွေးခဲ့ကြောင်း သတင်းထုတ်ပြန်ချက်အရ သိရသည်။

အဆိုပါတွေ့ဆုံပွဲသို့ ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီး စိုးဝင်းနှင့်အတူ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများတက်ရောက်ကြပြီး တရုတ်ပြည်သူ့လွတ်မြောက်ရေးတပ်မတော်၊ တောင်ပိုင်းစစ်နယ်ဝန်းကွပ်ကဲမှုဌာနချုပ်၏ ဒုတိယဌာနချုပ်မှူးနှင့် ပူးတွဲစစ်ဦးစီးဌာနအကြီးအကဲ Lieutenant General Chen Zhaohai နှင့်အတူ ပူးတွဲစစ်ဦးစီးဌာန ဒုတိယအကြီးအကဲ Major General Xiang နှင့် တာဝန်ရှိသူများတက်ရောက်ခဲ့ကြောင်း သိရသည်။

တရုတ်ပြည်သူ့လွတ်မြောက်ရေးတပ်မတော်၊ တောင်ပိုင်းစစ်နယ်ဝန်းကွပ်ကဲမှုဌာနချုပ်၏ ဒုတိယဌာနချုပ်မှူးနှင့် ပူးတွဲစစ်ဦးစီးဌာန အကြီးအကဲ Lieutenant General Chen Zhaohai ဦးဆောင်သော ကိုယ်စားလှယ်အဖွဲ့သည် ချစ်ကြည်ရေးခရီးစဉ်အဖြစ် ဒီဇင်ဘာ ၁၇ ရက်နံနက်ပိုင်းက လေကြောင်းခရီးဖြင့် မြန်မာနိုင်ငံသို့ရောက်ရှိနေခြင်းဖြစ်ပြီး ခရီးစဉ်အတွင်း ရန်ကုန်မြို့၊ နေပြည်တော်နှင့် မန္တလေးမြို့တို့ရှိ အထင်ကရနေရာများအား လှည့်လည်လေ့လာသွားမည်ဖြစ်ကြောင်း သတင်းထုတ်ပြန်ချက်အရ သိရသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် တရုတ်ပြည်သူ့သမ္မတနိုင်ငံ ဗဟိုစစ်ကော်မရှင်အဖွဲ့ဝင်နှင့် ပူးတွဲစစ်ဦးစီးဌာနစစ်ဦးစီးချုပ် Gen.Li Zuocheng ၏ ဖိတ်ကြားချက်အရ နိုဝင်ဘာ ၂၁ ရက်မှ ၂၆ ရက်ထိ တရုတ်နိုင်ငံသို့ နောက်ဆုံးသွားရောက်ထားသည်။ တပ်မတော်ကာကွယ်ရေးဦးစီးချုပ်အား တရုတ်နိုင်ငံခရီးစဉ်အတွင်း တရုတ်ပြည်သူ့လွတ်မြောက်ရေးတပ်မတော် တာဝန်ရှိသူများအပြင် တရုတ်နိုင်ငံသမ္မတ ရှီကျင်းပင်ကိုယ်တိုင် လက်ခံတွေ့ဆုံခဲ့သည်။