ဖမ်းဆီးခံ ရိုက်တာသတင်းထောက် ဝလုံး (ခ) သက်ဦးမောင်မောင်နှင့် ကျော်စိုးဦး (ခ) မိုးအောင်တို့ ပြန်လည်လွတ်မြောက်ရေးအတွက် မြန်မာသတင်းသမားများ ကာကွယ်ရေးကော်မတီ (PCMJ) က သတင်းလွတ်လပ်ခွင့် အမှောင်ကျခြင်း ဖော်ပြသည့် အမည်းရောင် လှုပ်ရှားမှုနှင့် ကန့်ကွက်ဆန္ဒပြမှုများ လုပ်ဆောင်မည်ဖြစ်ကြောင်း ဒီဇင်ဘာ ၁၅ ရက်တွင် သတင်းထုတ်ပြန်သည်။
PCMJ ၏ ထုတ်ပြန်ချက်တွင် တောင်းဆိုချက်နှစ်ချက် တောင်းဆိုခဲ့ပြီး သတင်းထောက်နှစ်ဦးကို အစိုးရလျှို့ဝှက်အက်ဥပဒေပုဒ်မ ၃ ဖြင့် ဖမ်းဆီးအရေးယူထားမှုသည် သတင်းလွတ်လပ်ခွင့်ကို ထိခိုက်သော မတရားဖမ်းဆီးမှုဖြစ်ကြောင်း၊ သတင်းထောက် နှစ်ဦးသည် သတင်းသမားများသာဖြစ်ပြီး သူလျှိုများ မဟုတ်ဘဲ နိုင်ငံတော်အကျိုးစီးပွား ဖျက်ဆီးသည့်သူများ မဟုတ်သဖြင့် သတင်းထောက်နှစ်ဦးစလုံးကို ခြွင်းချက်မရှိ ချက်ချင်းလွှတ်ပေးရန် လိုအပ်ကြောင်းနှင့် ဒီမိုကရေစီနှင့် လျော်ညီသော သတင်းလွတ်လပ်ခွင့်ပေးရန်၊ ကျင့်ဝတ်နှင့်ညီသော သတင်းရေးသားခြင်းနှင့် သတင်းရယူမှုများအပေါ် အစိုးရနှင့်အာဏာပိုင် အဖွဲ့အစည်းများက ဥပဒေ အမျိုးမျိုးသုံး၍ ဖမ်းဆီး အရေးယူမှုများအားလုံး ချက်ချင်းရပ်ဆိုင်းရန် PCMJ က တောင်းဆိုလိုက်သည်။
အဆိုပါ တောင်းဆိုချက်များရရှိရန် PCMJ က လှုပ်ရှားမှုအဆင့် သုံးဆင့်ဖြင့် ဆောင်ရွက်မည်ဖြစ်ပြီး ပထမအဆင့်တွင် သတင်းလွတ်လပ်ခွင့် အမှောင်ကျခြင်း ဖော်ပြသည့်အနေဖြင့် အမည်းရောင်လှုပ်ရှားမှုကို ဒီဇင်ဘာ ၁၆ ရက်တွင် စတင်မည်ဖြစ်သည်။
အမည်းရောင် လှုပ်ရှားမှုတွင် အမည်းရောင် အင်္ကျီများ ဝတ်ဆင်ခြင်းဖြင့် ပါဝင်နိုင်ပြီး အမည်းရောင်လှုပ်ရှားမှုများကို တစ်နိုင်ငံလုံး သတင်းသမားများ ပါဝင်ကြရန် တိုက်တွန်းလိုက်ကာ အဆိုပါ အမည်းရောင်လှုပ်ရှားမှုကို သတင်းသမား နှစ်ဦးစလုံး လွတ်မြောက်မှသာလျှင် ရပ်ဆိုင်းမည်ဖြစ်ကြောင်း ထုတ်ပြန်သည်။ ဒုတိယအဆင့်တွင် သတင်းသမားများ ဖမ်းဆီးထိန်းသိမ်းခံရမှုအပေါ် တရားဝင်ကန့်ကွက် ဆန္ဒပြခြင်း၊ ဆုတောင်းပွဲများ ကျင်းပခြင်းနှင့် ပြည်သူလူထုကို ရှင်းပြခြင်းများ ဆောင်ရွက်မည်ဖြစ်ကြောင်းနှင့် တတိယအဆင့်အနေဖြင့် တောင်းဆိုချက်များအတွက် အရပ်ဘက် လူ့အဖွဲ့အစည်းများနှင့် ပူးပေါင်းပြီး ပြည်သူလူထု အင်အားဖြင့် ပူးတွဲ အကောင်အထည်ဖော်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
