စည်းကမ်းမဲ့ယာဉ်တစ်စီးအား ကရိန်းယာဉ်ဖြင့် သယ်ဆောင်ရန် ပြုလုပ်နေသည်ကို တွေ့ရစဉ် (ဓာတ်ပုံ-စည်သူ)
ယာဉ်ရပ်နားခွင့်မရှိသည့် နေရာများတွင် ကရိန်းဖြင့် သယ်ဆောင်ခံရသည့် ယာဉ်များပျက်စီးပါက ကရိန်းဝန်ဆောင်မှုလုပ်ငန်းက တာဝန်ယူ ဖြေရှင်းပေးရမည်ဖြစ်ပြီး ဆောင်ရွက်ပေးခြင်းမရှိပါက တိုင်ကြားနိုင်ကြောင်း ရန်ကုန်တိုင်းဒေသကြီးအစိုးရအဖွဲ့ လျှပ်စစ်၊ စက်မှု၊ လက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ဒုတိယအကြိမ် ရန်ကုန်တိုင်းဒေသကြီးလွှတ်တော် ပဉ္စမပုံမှန်အစည်းအဝေး ၂၄ ရက်မြောက်တွင် ပြောကြားသည်။
ရမ်းကုန်းမြို့နယ် မဲဆန္ဒနယ်အမှတ် (၁) လွှတ်တော်ကိုယ်စားလှယ် ဦးရန်ရှင်းက ရန်ကုန်မြို့တော် စည်ပင်သာယာရေးနယ်နိမိတ်အတွင်း ယာဉ်ရပ်နားခြင်းမပြုရန် သတ်မှတ်ထားသော နေရာများတွင် ရပ်နားမိသည့် ယာဉ်များအား ရှင်းလင်းဆွဲယူ ဒဏ်တပ်ရာတွင် အသုံးပြုသည့် ကရိန်းကားများကို မည်သည့်စီးပွားရေးအဖွဲ့အစည်းအား မည်သို့ရွေးချယ် လုပ်ကိုင်ခွင့်ပေးခဲ့ပါသနည်း၊ မည်သို့သော သဘောတူညီချက်၊ စည်းကမ်းချက်များဖြင့် သက်တမ်းမည်မျှလုပ်ကိုင် ခွင့်ပြုထားပါသနည်း၊ အဆိုပါ လုပ်ငန်းအား လုပ်ကိုင်ခွင့်ရရှိသည့် စီးပွားရေးအဖွဲ့အစည်း အနေဖြင့် လုပ်ငန်းလုပ်ကိုင် ဆောင်ရွက်ခွင့်ရသည့်အတွက် နိုင်ငံတော်သို့ အကျိုးအမြတ် ခွဲဝေပေးသွင်းမှု ရှိပါသလား၊ ရှိသည်ဆိုပါက တစ်စီးလျှင် ကျပ်ငွေမည်မျှနှုန်းဖြင့် ပေးသွင်းနေပါသနည်းကို သိရှိလိုကြောင်း မေးခွန်းအား ဝန်ကြီး ဒေါ်နီလာကျော်က ပြန်လည်ဖြေကြားရာတွင် ထည့်သွင်းပြောကြားခဲ့ခြင်းဖြစ်သည်။
“ယာဉ်စည်းကမ်းမဲ့ မော်တော်ယာဉ်များ ကရိန်းယာဉ်ဖြင့် ဆွဲရခြင်းမှာ ၂၀၁၃ ခုနှစ် မြို့တော်စည်ပင်သာယာရေးဥပဒေအရ အများပြည်သူ လမ်းနယ်နိမိတ်များပေါ်တွင် အချိန်ကြာမြင့်စွာ ရပ်တန့်ခြင်း၊ ပြုပြင်ခြင်း၊ ထားရှိခြင်းများ ပါရှိသဖြင့် ဥပဒေဖြင့် အရေးယူခြင်း ဖြစ်ပါတယ်။ ဖယ်ရှားရခြင်းအတွက် ကုန်ကျစရိတ်ကို ယာဉ်ပိုင်ရှင် သို့မဟုတ် ယာဉ်အတွက် တာဝန်ရှိသူက ကျခံရမည်ဟု ပါရှိသဖြင့် ကရိန်းသယ်ဆောင်ခ ဒဏ်ငွေပေးဆောင်ရခြင်း ဖြစ်ပါတယ်။ ကရိန်းယာဉ်ဖြင့် သယ်ယူသွားသော မော်တော်ယာဉ်များ ပွန်းပဲ့ပျက်စီးမှုရှိပါက ဦးကျော်ယဉ် ကရိန်းဝန်ဆောင်မှု လုပ်ငန်းမှ တာဝန်ယူဖြေရှင်း ဆောင်ရွက်ပေးရမှာ ဖြစ်ပါတယ်။ ထိုသို့ ဆောင်ရွက်ပေးခြင်း မရှိပါက ယာဉ်စည်းကမ်းထိန်းသိမ်းရေး ကြီးကြပ်မှုကော်မတီသို့ တင်ပြပြီး တိုင်ကြားနိုင်ပါတယ်။ အဆိုပါလုပ်ငန်း လုပ်ကိုင်ခွင့်ရှိသည့် စီးပွားရေးလုပ်ငန်းက ကရိန်းဝန်ဆောင်မှုလုပ်ငန်းအတွက် ရယူတဲ့ ငွေကျပ်ငါးသောင်းထဲမှ ငွေကျပ်နှစ်သောင်းကို ရန်ကုန်တိုင်းဒေသကြီး အစိုးရအဖွဲ့ကို ပေးသွင်းရပါတယ်။ ကျန်ရှိတဲ့ ကျပ်သုံးသောင်းထဲမှ ၁၀ ရာခိုင်နှုန်းကို ယာဉ်စည်းကမ်းထိန်းသိမ်းရေး ကော်မတီသို့ ပေးသွင်းရပါတယ်” ဟု ဝန်ကြီးဒေါ်နီလာကျော်က ပြောကြားသည်။
ရန်ကုန်မြို့တော် စည်ပင်သာယာ နယ်နိမိတ်အတွင်း ကရိန်းကားဝန်ဆောင်မှုလုပ်ငန်းကို သာကေတမြို့နယ်ရှိ (၃) ရပ်ကွက်ရှိ ဦးကျော်ယဉ် ကရိန်းဝန်ဆောင်မှုလုပ်ငန်းက လုပ်ကိုင်ခွင့်ရရှိထားပြီး ယာဉ်စည်းကမ်း ထိန်းသိမ်းရေးကြီးကြပ်မှုနှင့် သုံးနှစ်စာချုပ်ချုပ်ဆိုထားခြင်းဖြစ်ကြောင်း သိရသည်။
