ရန်ကုန်တိုင်းဒေသကြီး သင်္ဃန်းကျွန်းမြို့နယ်အတွင်းရှိ အခြေခံပညာကျောင်း တစ်ကျောင်း၏ ကျောင်းဆင်းချိန်ကို တွေ့ရစဉ်
ဆရာအတတ်သင် ဌာနများဖြစ်သော ပညာရေးကောလိပ် ၂၃ ကျောင်းမှ နှစ်စဉ်မွေးထုတ်လျက်ရှိသည့် ဆရာ၊ ဆရာမ အရေအတွက်သည် အခြေခံပညာဦးစီးဌာနတွင် လစ်လပ်လျက်ရှိသော မူလတန်းပြဆရာ လိုအပ်ချက်ကို ဖြည့်ဆည်းပေးနိုင်ခြင်းမရှိကြောင်း သိရသည်။
ပညာရေးကောလိပ် ၂၃ ကျောင်းမှ နှစ်စဉ် ဆရာ၊ ဆရာမအရေအတွက် ၁၂၀၀ ဝန်းကျင်သာ မွေးထုတ်ပေးနိုင်သည်ဖြစ်ရာ ယင်းပမာဏသည် တစ်နိုင်ငံလုံး အတိုင်းအတာအရ အခြေခံပညာကျောင်းများတွင် လိုအပ်လျက်ရှိသည့် မူလတန်းပြဆရာအရေအတွက်ကို လုံလောက်အောင် ဖြည့်ဆည်းပေးနိုင်မှု မရှိရာ အခြေခံပညာကျောင်းများတွင် မူလတန်းပြဆရာ၊ ဆရာမလိုအပ်ချက်ကို ပြည့်မီအောင် ခန့်ထားနိုင်ခြင်းမရှိသည့်အတွက် ပြင်ပမှ ဘွဲ့တစ်ခုခုရရှိသူများကို နေ့စားလပေး စနစ်ဖြင့်ခန့်ထားသဖြင့် ဆရာအတတ်ပညာ သင်ကြားရေးနည်းပညာ၊ ပညာရေးသဘော တရားများကို နားလည်သဘောပေါက်ရန် လိုအပ်ချက်များရှိနေကြောင်း သိရသည်။
“အခြေခံပညာကဏ္ဍမှာ သင်ကြားမှုပုံစံ၊ သင်ကြားနည်းစနစ်တွေလည်း ပြောင်းလဲလာပါပြီ။ အရင်တုန်းကဆို ဆရာဗဟိုပြု သင်ကြားရာကနေ အခုချိန်မှာ ကလေးဗဟို ပြုစနစ်တွေနဲ့ ပြောင်းလဲသင်ကြားမှုတွေ ရှိလာပါပြီ။ အခမဲ့ပညာရေးစနစ်ကို ကျင့်သုံးလာတဲ့အတွက် အခုချိန်မှာ ကျောင်းသားဦးရေဟာ အရင်ကထက် ပိုများလာပါတယ်။ ကျောင်းသားဦးရေ များပြားလာတဲ့အလျောက် ဆရာလိုအပ်ချက်ကလည်း ပိုများလာတယ်။ ပညာရေးကောလိပ်တွေက နှစ်စဉ်မွေးထုတ်ပေးနိုင်တဲ့ ဆရာ၊ ဆရာမအရေအတွက်ဟာ နှစ်စဉ်လိုအပ်ချက်ကို ပြည့်မီအောင် မဖြည့်ဆည်းပေးနိုင်ပါဘူး။ ဒါ့ကြောင့် ဆရာလိုအပ်ချက်ကို ပြည့်မီအောင် အရည်အသွေးပြည့်မီတဲ့ ဆရာတွေဖြစ်အောင် ပြုစုပျိုးထောင်ဖို့က လိုအပ်ချက်တစ်ခုလို ဖြစ်နေပါပြီ” ဟု ပညာရေးဝန်ကြီးဌာန အခြေခံပညာဦးစီးဌာနမှ အဆင့်မြင့်အရာရှိတစ်ဦးက ပြောကြားသည်။
အဆင့်မြင့်ပညာဦးစီးဌာန ဆရာအတတ်ပညာနှင့် လေ့ကျင့်ရေးဌာနသည် လုပ်ငန်းခွင် အကြိုသင်တန်းများအဖြစ် လုပ်ငန်းခွင်အကြို ဆရာအတတ်ပညာ ဒီပလိုမာသင်တန်း (Diplomar in Teacher Education) နှင့် လုပ်ငန်းခွင်အကြို မူလတန်းဆရာ အတတ်ပညာသင်တန်း (Pre - service Primary Teacher Training) သင်တန်းများကို သက်ဆိုင်ရာ ပညာရေးကောလိပ်များတွင် ပို့ချပေးပြီး သင်တန်းတက်ရောက်ပြီးသူများအား အခြေခံပညာကျောင်းများတွင် ယခုအခါ မူလတန်းပြများအဖြစ် ခန့်အပ်လျက်ရှိကြောင်း သိရသည်။
အခြေခံပညာကျောင်းများတွင် လိုအပ်သော ဆရာ၊ ဆရာမများ ဖြည့်ဆည်းခန့်ထားနိုင်ရေးအတွက် လုပ်ငန်းခွင်အကြိုဆရာ အတတ်သင်တန်းများ ဖွင့်လှစ်ပေးပြီး အလုပ်ခန့်ထားပေးခြင်း ဆောင်ရွက်နိုင်ရန်၊ အခြေခံပညာကျောင်းများရှိ ဆရာ၊ ဆရာမများအား အရည်အသွေးတိုးမြှင့်ရေးအတွက် လုပ်ငန်းခွင်သင်တန်းများ ဖွင့်လှစ်ပြီး သင်တန်းတက်ရောက်ပြီးသူများအား ရာထူးတိုးခန့်ထားခြင်း ဆောင်ရွက်နိုင်ရန်၊ အခြေခံပညာကျောင်းများအတွက် အရည်အသွေးပြည့်ဝသော ဆရာ၊ ဆရာမ များမွေးထုတ်ပြီး ဆရာအဖြစ် အသိအမှတ်ပြုသည့် လက်မှတ်ဖြင့် ခန့်ထားဆောင်ရွက်နိုင်ရန်၊ အခြေခံပညာကျောင်းများအတွက် ဆရာ၊ ဆရာမများကို ၎င်းတို့၏ လုပ်ငန်းစွမ်းဆောင်ရည်နှင့် ဆရာအတတ်ပညာ ကျွမ်းကျင်မှုကို ရရှိစေသည့် ဆရာများစွမ်းဆောင်ရည် တို့ဖြင့်အကဲဖြတ်၍ ရာထူးတိုးမြှင့်ပေးခြင်း၊ ရာထူးပြောင်းရွှေ့ခြင်း၊ အသိအမှတ်ပြု ဂုဏ်ပြုခြင်းနှင့် ဆုချီးမြှင့်ခြင်းလုပ်ငန်းများ ဆောင်ရွက်ရန်၊ ဆရာ၊ ဆရာမများ၏ တတ်ကျွမ်းမှုကိုအခြေပြုပြီး ခန့်ထားခြင်းမူနှင့် ခန့်ထားပြီးသော ဆရာ၊ ဆရာမအတွက် နိုင်ငံဝန်ထမ်းနည်းဥပဒေကို အခြေပြုပြီး ပြောင်းရွှေ့ခြင်းမူများ ပြုစုဆောင်ရွက်နိုင်ရန် ပညာရေးဝန်ကြီးဌာန အဆင့်မြင့်ပညာဦးစီးဌာန ဒုတိယညွှန်ကြားရေးမှူးချုပ် ဒေါက်တာမေစန်းရီက ဆရာ၊ ဆရာမများခန့်ထားမှုနှင့် ပတ်သက်သည့် စာတမ်း၌ အကြံပြုထားသည်။
