အာရှပစိဖိတ် ဧရိယာတွင် အကြီးဆုံးဖြစ်သော ရန်ကုန်တိုင်းဒေသကြီး မင်္ဂလာဒုံမြို့နယ် ထောက်ကြန့်မြို့ စစ်သင်္ချိုင်းရှိ ပင်မအဆောက်အအုံမှ အမိုးများအား နှစ်ပေါင်း ၆၀ အတွင်း ပထမဆုံးအကြိမ် အကြီးစား ပြင်ဆင်မှုများ ပြုလုပ်ရာ လက်ရှိအချိန်တွင် ရာခိုင်နှုန်း ၅၀ ခန့် ပြီးစီးပြီဖြစ်ကြောင်း ဓနသဟာရ စစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာထံမှ ဒီဇင်ဘာ ၁၂ ရက်က သိရသည်။
၁၉၅၇ ခုနှစ်က စတင်ဖွင့်လှစ်ခဲ့သည့် ထောက်ကြန့်စစ်သင်္ချိုင်းရှိ ပင်မအဆောက်အအုံမှ အမိုးများသည် လက်ရှိအချိန်တွင် မိုးယိုခြင်းများ ရှိလာသောကြောင့် အကြီးစား ပြင်ဆင်မှုများကို အောက်တိုဘာ ၁၆ ရက်က စတင်ပြီး နိုင်ငံခြား ကန်ထရိုက်များဖြင့် ပြုလုပ်ခြင်းဖြစ်သည်။
“ရာခိုင်နှုန်း ၅၀ ပြီးပြီလို့ ပြောလို့ရတာပေါ့။ သူက နှစ်ပိုင်းရှိတယ်လေ။ တောင်ဘက်နဲ့ မြောက်ဘက်။ အမိုးကို သန့်ရှင်းရေးလုပ်ပြီး အမိုးကြမ်းကို ခွာ/ရေဆေး သန့်ရှင်းရေးလုပ်ပြီး အကြမ်းထည် ရှင်းလင်းတယ်။ ပြီးတော့မှ ပြန်ခင်းရမှာ။ အခုက အကြမ်းထည် အကုန်ပြီးသွားပါပြီ” ဟု ဓနသဟာရစစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာ ဦးသက်မွန်က ပြောကြားသည်။
ထောက်ကြန့် စစ်သင်္ချိုင်း ပင်မအဆောက်အအုံ၏ အမိုးများအား ပြင်ဆင်မှုများ ပြုလုပ်ရန်အတွက် ငြမ်းတည်ဆောက်ခြင်း လုပ်ငန်းများကို ပြီးခဲ့သည့် အောက်တိုဘာ ၁၆ ရက် မတိုင်ခင် တစ်ပတ်အလိုက စတင်လုပ်ဆောင် ခဲ့ခြင်းဖြစ်ပြီး ပြင်ဆင်မှု လုပ်ငန်းများသည် ဇန်နဝါရီလကုန်တွင် ပြီးစီးမည်ဖြစ်ကြောင်း ဦးသက်မွန်က ပြောကြားသည်။
အကြီးစားပြုပြင်မှုများ လုပ်ဆောင်နေချိန်အတွင်း ပင်မအဆောက်အအုံကို ပိတ်ပင်ထားသော်လည်း တခြားနေရာများကို လေ့လာခွင့်ပြုထားပြီး စစ်သင်္ချိုင်း ဖွင့်ချိန်ကိုလည်း ယခင်အချိန်များအတိုင်း ထားရှိပေးထားသဖြင့် လာရောက်လည်ပတ် လေ့လာသူဦးရေသည် ပုံမှန်အတိုင်း ရှိနေကြောင်း သိရသည်။
လက်ရှိအချိန်တွင် မြန်မာနိုင်ငံ၌ ထောက်ကြန့်စစ်သင်္ချိုင်း၊ သံဖြူဇရပ် စစ်သင်္ချိုင်းနှင့် ဟံသာဝတီ စစ်သင်္ချိုင်း ဆိုသည့် စစ်သင်္ချိုင်း သုံးခုရှိရာ ဓနသဟာရ စစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာ အပါအဝင် စုစုပေါင်း ၁၈ ဦးဖြင့် ပြုပြင်ထိန်းသိမ်း လျက်ရှိကြောင်း သိရသည်။
တစ်ကမ္ဘာလုံးရှိ နိုင်ငံပေါင်း ၁၅၃ နိုင်ငံတွင် စစ်သင်္ချိုင်းပေါင်း ၂၅၀၀၀ ရှိရာ မြန်မာနိုင်ငံက ထောက်ကြန့် စစ်သင်္ချိုင်းသည် အာရှပစိဖိတ် ဧရိယာတွင် အကြီးဆုံးဖြစ်ကြောင်း ဓနသဟာရ စစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာ ဦးသက်မွန်ထံမှ သိရသည်။
ဒုတိယကမ္ဘာစစ် အတွင်းက မြန်မာနိုင်ငံ အထက်ပိုင်းတွင် ကျဆုံးခဲ့သည့် စစ်သားများအတွက် ထောက်ကြန့် စစ်သင်္ချိုင်းတွင် အမှတ်တရ ထားခြင်းဖြစ်ပြီး စစ်သင်္ချိုင်းရှိ ပင်မအဆောက်အအုံတွင် အမည်ပေါင်း ၂၇၀၀၀ ကို အမည်ရေးထိုးထားကာ မြေပြင်ရှိ အုတ်ဂူစာရင်းမှာ ၆၃၇၄ ဂူရှိ၍ သိမ်ဇရပ်စစ်သင်္ချိုင်းတွင် သေမင်းတမံ ရထားလမ်း တစ်လျှောက် ကျဆုံးခဲ့သည့် စစ်သားများကို အမှတ်တရ ထားခြင်းဖြစ်ပြီး ၃၇၇၁ ဦးရှိကာ ဟံသာဝတီ စစ်သင်္ချိုင်းတွင် ရန်ကုန်အကျဉ်းထောင်မှ စစ်သားများအတွက် အမှတ်တရထားခြင်းဖြစ်ပြီး ဦးရေ ၁၅၀၀ နီးပါး စာရင်းရှိကြောင်း သိရသည်။
လက်ရှိအချိန်တွင် ထောက်ကြန့်စစ်သင်္ချိုင်းသို့ ဧည့်သည်ဝင်ရောက်မှုမှာ ပုံမှန်ရက်များတွင် လူဦးရေ ၁၀၀ မှ ၂၀၀ အတွင်းရှိပြီး အခါကြီးရက်ကြီးနှင့် အစိုးရရုံးပိတ်ရက်များတွင် လူဦးရေ ၄၀၀ မှ ၅၀၀ အတွင်းရှိ ကြောင်း သိရသည်။
