မြိတ်မြို့ရှိ အပြည်ပြည်ဆိုင်ရာ အဆင့်မီ ငါးလေလံဈေးကြီးကို တွေ့ရစဉ်

မြိတ်ကျွန်းစုအတွင်း ငါးလေလံဈေးတစ်ခု ဥပဒေအတိုင်း ပေါ်ထွက်လာစေရန် လွှတ်တော်ကိုယ်စားလှယ်များနှင့် ပြည်သူလူထု တွေ့ဆုံဆွေးနွေးမှု ပြုလုပ်ခဲ့ပြီး ထားဝယ်ခရိုင်၊ သရက်ချောင်းမြို့နယ်တွင် ငါးလေလံဈေး တစ်ခုအား ဥပဒေမဲ့ စင်ပြိုင်တည်ဆောက်ရန် ကြိုးစားနေမှုအပေါ် ပြည်သူများကြားတွင် ဝေဖန်မှု မြင့်တက်နေကြောင်း သိရသည်။

မြိတ်မြို့တွင်ရှိသည့် အပြည်ပြည်ဆိုင်ရာ အဆင့်မီ ငါးလေလံဈေးကြီးအား ဥပဒေအတိုင်း လည်ပတ်ခွင့် ရှိနေစေရန် ဆောင်ရွက်ပေးရမည့်အစား ငါးဈေးကွက်မရှိ၊ ပင်လယ်ငါးမရှိသော သရက်ချောင်းမြို့နယ်တွင် တိုင်းဒေသကြီး အစိုးရမှ နောက်ထပ်ငါးလေလံဈေး တစ်ခုကို အကောင်အထည်ဖော်ရန် ကြိုးစားနေကြောင်း သိရသည်။

မြိတ်မြို့ရှိ အပြည်ပြည်ဆိုင်ရာ ငါးလေလံဈေးမှာ အရှေ့တောင်အာရှတွင် တစ်ခုတည်းသော အကြီးဆုံး ငါးလေလံဈေး တစ်ခုဖြစ်ပြီး MIC မှ ဒေါ်လာသန်း ၇၀ ရင်းနှီး မြှုပ်နှံခွင့်ရထားကာ ယခုလက်ရှိတွင် ဒေါ်လာသန်း ၂၀ ရင်းနှီးမြှုပ်နှံ ငွေလွှဲရန် စောင့်ဆိုင်းနေရကြောင်း သိရသည်။

အစိုးရအနေဖြင့် ဥပဒေအတိုင်း မဆောင်ရွက်ပေးဘဲ ကျွန်းစုနှင့် သရက်ချောင်းတွင် ငါးလေလံဈေးများ၊ ငါးတင်ငါးချ ဆိပ်ကမ်းများ တည်ဆောက်ပေးရန် ကြိုးစားနေသည့်အတွက် လွှတ်တော်ကိုယ်စားလှယ်များ၊ ဒေသခံများ၊ လုပ်ငန်းရှင်များတွေ့ဆုံခဲ့ကာ ဒီဇင်ဘာ ၆ ရက်က မြိတ်မြို့၊ ပုလဲရတနာခန်းမတွင် ဆွေးနွေးမှုများ ပြုလုပ်ခဲ့ကြောင်း သိရသည်။

တနင်္သာရီတိုင်းဒေသကြီး ဝန်ကြီးချုပ်အနေဖြင့် ကန့်သတ်ရင်းနှီးမြှုပ်နှံမှုတစ်ခု ဖြစ်သည့် ငါးလေလံဈေး၊ ငါးတင်ငါးချ ဆိပ်ကမ်းများကို ဥပဒေအတိုင်း ဆောင်ရွက်ရန် လိုအပ်နေပြီး ရှိပြီးသား ငါးဈေးလေလံဈေးကို မျက်ကွယ်ပြုကာ စင်ပြိုင်တည်ဆောက်ရန် ကြိုးစားနေကြောင်း၊ မြိတ်ဒေသခံများနှင့် လုပ်ငန်းရှင်များက အဆိုပါ အစည်းအဝေးတွင် ဝေဖန်ဆွေးနွေးမှုများ လုပ်ခဲ့ကြောင်း သိရသည်။

“ဥပဒေအတိုင်း လုပ်ကိုင်ဖို့ အင်မတန် အရေးကြီးပါတယ်။ သရက်ချောင်းမှာ လုပ်တဲ့ကိစ္စက ဆန္ဒနည်းနည်း စောသွားတယ်လို့ ထင်ပါတယ်။ ဘာလို့လည်းဆိုတော့ ကျွန်မတို့ ငါးတင်ငါးချ ဆိပ်ကမ်း ငါးလေလံဈေး ဆိုတာက လုပ်ချင်တိုင်း လုပ်လို့မရပါဘူး။ ကန့်သတ်ရင်းနှီးမြှုပ်နှံမှုထဲမှာ ပါတယ်။ ကန့်သတ်ရင်း နှီးမြှုပ်နှံမှုထဲမှာ ပါတဲ့အတွက် တိုင်းဒေသကြီး ဝန်ကြီးချုပ် ဦးဆောင်ပါဝင်တဲ့ မြန်မာနိုင်ငံ ရင်းနှီးမြှုပ်နှံမှု ကော်မရှင်ကတောင် ခွင့်ပြုမိန့် ပေးလို့မရပါဘူး။ ဗဟိုအထိ တင်ရပါတယ်။ သက်ဆိုင်ရာ ဝန်ကြီးဌာနတွေကနေ ဖြစ်တည်နေတဲ့ သယံဇာတ အခြေအနေ၊ ဒေသရဲ့ အခြေအနေ၊ အကျယ်အဝန်းတွေကို တွက်ချက်ပြီး ခွင့်ပြုပေးတာပါ။ လူတိုင်းက ပိုက်ဆံရှိလို့ ငါးတင်ငါးချ ဆိပ်ကမ်းလုပ်မယ်ဆိုရင် နိုင်ငံတော်က လုပ်ငန်းရှင်လောက် ပိုက်ဆံမရှိဘူး။ ဝန်ထမ်းတွေ မခန့်ထားနိုင်ဘူး။ အဲဒီအချိန်မှာ ပရမ်းပတာကြီး အခွန်ဘယ်လိုကောက်မလဲ၊ လူဝင်မှု ကြီးကြပ်မှု ဘယ်လိုလိုက်ပြီး ထိန်းမလဲ၊ တရားမဝင် ကုန်သွယ်မှု ဘယ်လိုထိန်းမလဲ၊ လွှတ်တော်မှာ ဆွေးနွေးသွားတာလည်း ဒီအဓိပ္ပာယ်ပါပဲ။ နယ်သာလန်နိုင်ငံကလည်း လာရောက်ပြီး သင်တန်းပေးတယ်လို့ သိရပါတယ်။ ဒါက အီးယူစနစ် အမှန်ပါပဲ ကျွန်မတို့ ရင်းနှီးမြှုပ်နှံမှုက တရုတ်လည်း မဟုတ်ဘူး။ ထိုင်းလည်း မဟုတ်ဘူး။ အနောက်နိုင်ငံ ပြင်သစ်ကပါ။ ကျွန်မတို့ အနေနှင့် လွန်ခဲ့တဲ့ ၁၇ နှစ်ကတည်းက အီးယူစနစ်နှင့်အညီ လာရောက်လုပ်ဆောင် ထားတာပါ။ ငါးတင် ငါးချ ဆိပ်ကမ်း လုပ်မယ် ဒီလိုလုပ်တာကလည်း နိုင်ငံတော်ကပဲ လုပ်ခွင့်ရှိတယ်။ လုပ်ငန်းရှင်တွေအနေနဲ့ လုပ်ခွင့်မရှိပါဘူး။ နိုင်ငံတော်ကနေ ကျသင့်တဲ့ အခွန်အခ၊ ဘယ်ငါးမျိုးကို ဘယ်ငါးဖမ်းကွက်ကနေ ဖမ်းဆီးလာသလဲ ဖမ်းဆီးတဲ့သူက ဘယ်သူလဲဆိုပြီး စစ်မယ်ပြီးမှ ငါးလေလံဈေးတွေ၊ အအေးခန်းတွေကို ဆက်သွားရမယ်။ စည်သွတ်စက်ရုံတွေ စသဖြင့် သွားရမှာပါ။ ကျွန်မတို့ ငါးလေလံဈေးကို လာရောင်းရမယ်ဆိုပြီး ပြောထားတာ မဟုတ်ပါဘူး။ ဒီအဓိပ္ပာယ်လေးကို မလွဲမှားစေချင်ပါဘူး” ဟု အပြည်ပြည်ဆိုင်ရာ ငါးလေလံဈေးမှ MD ဒေါ်ဌေးဌေးဝင်းက ပြောကြားသည်။

အပြည်ပြည်ဆိုင်ရာ ငါးလေလံဈေးမှာ MIC မှ ရင်းနှီးမြှုပ်နှံခွင့် ဒေါ်လာသန်း ၇၀ ရရှိထားပြီး လက်ရှိ အနေအထားတွင် ဒေါ်လာ ၁၀ သန်းသာ ရင်းနှီးထားရသေးကာ နောက်ထပ် ဒေါ်လာသန်း ၆၀ ကိုပြည်ပမှငွေလွှဲရရှိရန် စောင့်ဆိုင်းနေရကြောင်း သိရသည်။

“ဝန်ကြီးချုပ်အနေနှင့် သရက်ချောင်းမှာ ငါးလေလံဈေးဖွင့်ဖို့အတွက် လုပ်တယ်ပြီးတော့ အဲဒီလိုလုပ်တဲ့ စီမံကိန်းကို တိုင်းလွှတ်တော်ကနေ ဖြတ်သလားဆိုတော့ ဖြတ်လာဘူး။ အခု ဒုသမ္မတကိုခေါ်ပြတဲ့ သတင်းအချက်အလက်တွေ တက်လာတော့ မြိတ်ဒေသခံတွေရဲ့ ရင်ထဲမှာ အတော်လေး စိတ်မကောင်း ဖြစ်သွားတယ်။ မျှော်လင့်ချက်တွေ မဲ့သွားပြီးလားဆိုတဲ့ စိတ်တွေဝင်သွားတယ်။ မတရား လုပ်ခံရတယ်ဆိုပြီး Massage တွေ ကျွန်တော်တို့ဆီကို ရောက်လာတယ်။ ဒေသခံ ပြည်သူတွေရဲ့ အသံက ကျွန်တော်တို့ အသံပါပဲ။ ဘာပဲဖြစ်ဖြစ် ဒေသရဲ့ မျှော်လင့်ချက်က ကျွန်တော်တို့ရဲ့ မျှော်လင့်ချက်ပါပဲ။ အခုဆွေးနွေးပွဲမှာ အတော်လေး ပြည့်စုံတယ်။ လုပ်ငန်းရှင်တွေ၊ ငါးဖမ်းလှေအသင်းတွေ၊ ဒေသခံတွေလည်း လာကြတော့ အသံတွေက အတော်လေး စုံလင်ပြီး ဆွေးနွေးနိုင်ခဲ့ကြတယ်။ အဓိက အချက်က ဈေးကွက်ပေါ့။ မြိတ်ဒေသ အတွင်းမှာ အမြန်ဆုံး အကောင်ထည်ဖော် ဆောင်ရွက်နိုင်ဖို့ ကျွန်တော်တို့ လွှတ်တော်ကလည်း လုပ်ပိုင်ခွင့်တွေ၊ တာဝန်ရှိတဲ့ အပိုင်းတွေကနေ အမြန်ဆုံး လုပ်ဆောင်သွားမယ်လို့ ပြောကြားချင်ပါတယ်” ဟု မြိတ်မြို့နယ် ပြည်သူ့လွှတ်တော် ကိုယ်စားလှယ် ဦးစိုးပိုင်ဌေးက ပြောကြားသည်။

တိုင်းဒေသကြီး အစိုးရအနေဖြင့် ရှိပြီးသား ငါးလေလံဈေးကို ဥပဒေအတိုင်း အကောင်ထည်ဖော်ပေးရန် မကြိုးစားသည့်အပြင် လက်ရှိတည်ဆောက်ရန် ကြိုးစားနေသည့် သရက်ချောင်းမြို့မှ ငါးလေလံဈေးအား ဒုသမ္မတ ဦးဟင်နရီဗန်ထီးယူအား ခေါ်ယူပြသခဲ့အတွက် ပြည်သူများကြားတွင် ဝေဖန်မှုများပြားလာခဲ့ခြင်း ဖြစ်ကြောင်း သိရသည်။

သရက်ချောင်းမြို့တွင် တည်ဆောက်ရန် ကြိုးစားနေသည့် ငါးလေလံဈေး မြေနေရာမှာ လယ်ယာမြေ ဖြစ်သည့်အပြင် ငါးဖမ်းလှေများ ဝင်ထွက်ဆိုက်ကပ်ရန် ခက်ခဲခြင်း၊ ငါးဈေးကွက်မရှိခြင်း၊ လွှတ်တော်အား တင်ပြထားခြင်း မရှိသေးကြောင်း သိရသည်။

အပြည်ပြည်ဆိုင်ရာ ငါးလေလံဈေးအား လည်ပတ်နိုင်အောင် ဆောင်ရွက်ပေးပါက ထိုင်းနိုင်ငံတွင် ရောက်ရှိနေသည့် ငါးဈေးကွက်ကြီးနှင့် မြန်မာရွှေ့ပြောင်း လုပ်သားများကို ပြန်လည်ရောက်ရှိလာနိုင်အောင် ဆောင်ရွက်နိုင်မည်ဖြစ်သလို နိုင်ငံတော်အနေဖြင့် အခွန်အခများကို အတိအကျဖြင့် ပိုမိုရရှိလာမည် ဖြစ်ကြောင်း သိရသည်။

လက်ရှိ တိုင်းအစိုးရမှ သရက်ချောင်းတွင် တည်ဆောက်နေသည့် ငါးလေလံဈေးနှင့် ပတ်သက်ပြီး တနင်္သာရီတိုင်း ဒေသကြီး ငါးလုပ်ငန်း အဖွဲ့ချုပ်ဥက္ကဋ္ဌက သဘောထား မှတ်ချက်ပေးရန် ငြင်းဆိုထားကြောင်း သိရသည်။