နိုင်ငံခြားကုမ္ပဏီများက ပြည်တွင်းကုမ္ပဏီများ၏ အစုရှယ်ယာ ၃၅ ရာခိုင်နှုန်းအထိ ဝယ်ယူခွင့်ပြုထားပြီး ထိုသို့ဝယ်ယူသော်လည်း ပြည်တွင်းကုမ္ပဏီအဖြစ်ပင် ဆက်ရှိနေမည့် မြန်မာနိုင်ငံကုမ္ပဏီများဥပဒေကို ၂၀၁၇ ခုနှစ် ပြည်ထောင်စုလွှတ်တော် ဥပဒေအမှတ်စဉ် ၂၉ အဖြစ် ဒီဇင်ဘာ ၆ ရက်တွင် အတည်ပြု ပြဋ္ဌာန်းလိုက်ပြီဖြစ်ကြောင်း ဒီဇင်ဘာ ၇ ရက်ထုတ် နိုင်ငံပိုင်သတင်းစာများတွင် ဖော်ပြထားမှုအရ သိရသည်။
နိုင်ငံခြားသားပိုင် ရှယ်ယာတစ်ရာခိုင်နှုန်း ပါဝင်လျှင်ပင် နိုင်ငံခြားကုမ္ပဏီအဖြစ် သတ်မှတ်ကာ အခွန်အခများကို နိုင်ငံခြားငွေဖြင့် ပေးဆောင်ရခြင်း၊ စီးပွားရေးလုပ်ငန်းများ လုပ်ကိုင်ရာတွင် ကန့်သတ်မှုများစွာရှိခြင်းစသည့် ကန့်သတ်ချက်ကြီးမားသည့် နိုင်ငံခြား ရင်းနှီးမြှုပ်နှံမှုများ ပြည်တွင်းကုမ္ပဏီများသို့ ဝင်မလာနိုင်အောင် တားဆီးထားသည့်အချက်ကို လက်ရှိဥပဒေတွင် ရှယ်ယာ ၃၅ ရာခိုင်နှုန်းထက် ကျော်လွန်သည့် ကုမ္ပဏီများကိုသာ နိုင်ငံခြားကုမ္ပဏီအဖြစ် သတ်မှတ်လိုက်သည့်အတွက် ပြည်တွင်းကုမ္ပဏီများအနေနှင့် ရင်းနှီးမြှုပ်နှံမှုကဏ္ဍတွင် မြှုပ်နှံငွေများ ပြည်ပကုမ္ပဏီများမှ ရရှိလာမည်ဖြစ်သည့်အတွက် လုပ်သာကိုင်သာရှိမည့် အခြေအနေ ဖြစ်ပေါ်လာမည်ဖြစ်သည်။
နိုင်ငံခြားသားများကို မြန်မာကုမ္ပဏီများ၏ အစုရှယ်ယာများ ဝယ်ယူခွင့်ပြုထားသည့် မြန်မာနိုင်ငံကုမ္ပဏီများဥပဒေ အတည်ပြုကာ ဥပဒေအဖြစ် ထွက်ပေါ်လာမည့်နေ့ကို စတော့အိတ်ချိန်းမှ စောင့်မျှော်နေသည်ဟု ရန်ကုန်စတော့အိတ်ချိန်း၏ ပထမဆုံး စာရင်းဝင်ကုမ္ပဏီဖြစ်သည့် FMI ၏ ဥက္ကဋ္ဌ ဦးသိမ်းဝေက ပြောကြားသည်။
လက်ရှိတွင် အတည်ပြုလိုက်ပြီဖြစ်သည့် မြန်မာနိုင်ငံကုမ္ပဏီများဥပဒေအရ ရန်ကုန်စတော့အိတ်ချိန်းတွင် နိုင်ငံခြားသားများ အစုရှယ်ယာ ဝယ်ယူခွင့်ပြုပါက ဈေးကွက်ထိန်းချုပ်သွားမည့် အခြေအနေဖြစ်ပေါ်နိုင်သည်ဟု သုံးသပ်မှုများရှိနေသည်။ ထိုသို့ နိုင်ငံခြား ကုမ္ပဏီများကို အစုရှယ်ယာ ၃၅ ရာခိုင်နှုန်းအထိ ဝယ်ယူခွင့်ပြုမှုနှင့်အတူ ကန့်သတ်ချက်များ ဖြေလျှော့မှုများမှာ ၂၀၁၈ ခုနှစ် မြန်မာ့စီးပွားရေးကဏ္ဍအတွက် စိတ်ဝင်စားစရာ ဖြစ်နေကြောင်း စီးပွားရေးအတိုင်ပင်ခံကုမ္ပဏီ Diamond Intelligence မှ ဦးသက်အောင်မင်းလတ်က ပြောကြားသည်။
