ပဲခူးတိုင်းဒေသကြီး ရပ်ကျေးအုပ်ချုပ်ရေးမှူးများကို ဇန်နဝါရီ ၁၅ ရက် နောက်ဆုံးထား ရွေးချယ်မည်

ပဲခူးတိုင်းဒေသကြီး ရပ်ကျေးအုပ်ချုပ်ရေးမှူးများကို ဇန်နဝါရီ ၁၅ ရက် နောက်ဆုံးထား ရွေးချယ်မည်
Published 7 December 2017

ပဲခူးတိုင်းဒေသကြီး ရပ်ကျေးအုပ်ချုပ်ရေးမှူးများကို ဇန်နဝါရီ ၁၅ ရက်အတွင်း အပြီးရွေးချယ်မည်ဖြစ်ကြောင်း သိရသည်။

အဆိုပါ ရပ်ကွက်၊ ကျေးရွာအုပ်ချုပ်ရေးမှူးများ ပြန်လည်ရွေးချယ်ရန်အတွက် ကြီးကြပ်ရေးမှူးများ ရွေးချယ်ခြင်းကို ခေတ္တဆိုင်းငံ့ထားရန် ပြောဆိုခဲ့သော်လည်း တိုင်းဒေသကြီး အစိုးရအဖွဲ့၏ ညွှန်ကြားချက်အရ ရပ်ကျေးအုပ်ချုပ်ရေမှူး ရွေးချယ်ခြင်းလုပ်ငန်းများကို ၂၀၁၈ ခုနှစ် ဇန်နဝါရီ ၁၅ ရက် အပြီး ရွေးချယ်ပေးရမည်ဖြစ်ကြောင်း ပြည်မြို့နယ် အုပ်ချုပ်ရေးမှူးရုံးက သိရသည်။

“အုပ်ချုပ်ရေးမှူးရွေးတဲ့အခါမှာ စနစ်တကျဖြစ်အောင် တိုင်းဒေသကြီး အစိုးရအဖွဲ့က သတ်မှတ်ပေးထားတဲ့အတိုင်း ဆောင်ရွက်သွားမှာ ဖြစ်ပါတယ်။ ကျွန်တော်တို့ မြို့နယ် အနေနဲ့ကတော့ ရပ်ကျေးအုပ်ချုပ်ရေးမှူးရွေးဖို့ မနေ့ကပဲ ပြည်ခရိုင်အထွေထွေအုပ်ချုပ်ရေး ဦးစီးဌာနက ဇန်နဝါရီ ၁၅ ရက် နောက်ဆုံးထား အပြီးရွေးပေးဖို့ မနေ့က ညွှန်ကြားချက် ဝင်လာတယ်ဝင်လာတဲ့အတွက် ရပ်ကျေးအုပ်ချုပ်ရေးမှူးတွေရွေးဖို့အတွက် ကျေးရွာမှာ ကြီးကြပ်ရေးမှူး ငါးဦးရွေးပေးဖို့က ပထမအဆင့်ဖြစ်ပါတယ်။ အဲဒီအဆင့်အတွက်ကို ကျွန်တော်ဌာနဆိုင်ရာ အကြီးအကဲတွေ ပါဝင်တဲ့အဖွဲ့ရှစ်ဖွဲ့ ဖွဲ့ထားပါတယ်” ဟု ပြည်မြို့နယ်အုပ်ချုပ်ရေးမှူး ဦးမြတ်ကျော်က ပြောကြားသည်။

အဆိုပါ ကြီးကြပ်ရေးမှူး ရွေးချယ်ခြင်းကို ဒီဇင်ဘာ ၁၂ ရက်မှ စတင်ကာ ၂၅ ရက်အတွင်း အပြီးသတ် လုပ်ဆောင်မည်ဖြစ်ကာ ပြည်မြို့နယ်အတွင်းရှိ ရပ်ကွက်ကျေးရွာ ၆၉ အုပ်စုတွင်း ကြီးကြပ်ရေးမှူး ၃၄၅ ဦးကို ဥပဒေ လုပ်ထုံးလုပ်နည်းများ သိရှိစေရန် သင်တန်းပေးသွားမည်ဖြစ်ကြောင်း သိရသည်။

“အရွေးခံရတဲ့ ကြီးကြပ်ရေးမှူးငါးဦးကနေ သူတို့ဆက်ပြီး ဆောင်ရွက်ရမယ့် ဆယ်အိမ်စုမှူးစုဖွဲ့တာတွေ ရာအိမ်စုမှူးစုဖွဲ့တာတွေ ကျေးရွာတာဝန်ခံရွေးချယ်တာ အုပ်ချုပ်ရေးမှူးလောင်း ရွေးချယ်တာ နောက်ဆုံးအဆင့် ကျေးရွာအုပ်ချုပ်ရေးမှူး ရွေးချယ်တာမှာ လုပ်မှားကိုင်မှား မဖြစ်အောင် မြို့နယ်အဆင့်အနေနဲ့ ကြီးကြပ်ရေးမှူးအရွေးခံရတဲ့ ၃၄၅ ဦးကိုမူ ယာပင်ခန်းမမှာ သင်တန်းသဘောမျိုးလေး လမကုန်ခင်မှာ ပေးဖို့ရှိပါတယ်” ဟု ၎င်းက ဆက်လက်ပြောကြားသည်။

အဆိုပါ သတ်မှတ်ရက်မှာ ပဲခူးတိုင်းဒေသကြီးအတွင်းဖြစ်ကာ အခြားတိုင်းနှင့်ပြည်နယ်များတွင်လည်း သက်ဆိုင်ရာအစိုးရအဖွဲ့များ၏ ညွှန်ကြားချက်များအတိုင်း ရက်ကန့်သတ်ရွေးချယ်နေကြောင်း ရွေးချယ်ရာတွင်လည်း ဘက်လိုက်မှု မသမာမှုများ မဖြစ်စေရန် ပွင့်လင်းမြင်သာစွာဖြင့် အများပြည်သူကို အသိပေးမည်ဖြစ်ကာ ကိုယ်တိုင်ပါဝင်နိုင်အောင်လည်း လုပ်ဆောင်နေကြောင်း ဥပဒေလုပ်ထုံးလုပ်နည်းနှင့် ညီညွတ်ခြင်းမရှိပါကလည်း ဥပဒေပါအတိုင်း ပြစ်မှုပြစ်ဒဏ်များ ချမှတ်နိုင်ကြောင်း သိရသည်။

Most Read

Most Recent