တာလောကြီး ဆိပ်ကမ်းတွင် စက်လှေပေါ်မှ မီးသွေးအိတ်များကို တရုတ်နိုင်ငံသို့ တင်ပို့ရန် ဆယ်ဘီးကားဖြင့် သယ်ယူနေစဉ်
မြန်မာနိုင်ငံထွက် မီးသွေးများကို တရုတ်နိုင်ငံမှ တရားမဝင် အမြောက်အမြား ဝယ်ယူနေခြင်းကြောင့် မီးသွေးဈေးနှုန်းများ ဆက်တိုက်မြင့်တက်နေကြောင်း သတင်းရရှိသည်။
မီးသွေးကို ကချင်ပြည်နယ်မှတစ်ဆင့် တရုတ်နိုင်ငံသို့ တင်ပို့နေသည်မှာ တစ်လကျော် ကြာမြင့်ခဲ့ပြီဖြစ်ပြီး မြစ်ကြီးနားမြို့တွင် မီးသွေးတစ်တင်းခွဲအိတ်မှာ အကောင်းစားဆိုပါက ကျပ် ၈၀၀၀ မှ ၁၂၀၀၀ သို့လည်းကောင်း၊ အညံ့စား တစ်တင်းခွဲအိတ်မှာ ကျပ် ၄၀၀၀ မှ ၅၅၀၀ သို့လည်းကောင်း လပိုင်းအတွင်း မြင့်တက်သွားခြင်း ဖြစ်ကြောင်း သိရသည်။
ကချင်ပြည်နယ်နယ်နှင့် စစ်ကိုင်းတိုင်း မြောက်ပိုင်းမှ ရောက်ရှိလာသည့် မီးသွေးများကို ဧရာဝတီ မြစ်ကြောင်းမှတစ်ဆင့် တရုတ်နိုင်ငံသို့ ဝိုင်းမော်-ဆဒုံး-ကန်ပိုင်တည် တရားဝင်လမ်းကြောင်းကို အသုံးပြုကာ သယ်ဆောင်နေခြင်းဖြစ်ကြောင်း သိရသည်။
မြစ်ကြီးနားမြို့နယ် တာလောကြီးကျေးရွာ ဒေသခံ ရပ်မိရပ်ဖ တစ်ဦးက “အခုတစ်ရက်ကို စက်လှေကြီးတွေ တစ်စင်း၊ နှစ်စင်း ရာချီပါတဲ့ မီးသွေးအိတ်တွေ တရုတ်နိုင်ငံဘက်ကို သယ်ဆောင်နေကြတယ်။ စစ်ကိုင်းတိုင်း ကသာ၊ ထီးချိုင့်တွေဘက်က တက်လာတာ။ အဲဒါကို တရုတ်နိုင်ငံဘက်ကို ဆယ်ဘီးကား၊ တုဖုန်းယာဉ်တွေနဲ့ ပို့နေတာ။ တစ်လကျော်ပြီ။ ရွာနားက သစ်တောလည်း စစ်ဒဏ်ကြောင့် လယ်မလုပ်နိုင်ကြတော့ အားလုံး မီးသွေးဖုတ်လိုက်ပြီ။ အခုဆိုရင် ကျေးရွာသုံးဖို့ ဘာမှမကျန်တော့ဘူး။ ကြိုးဝိုင်းတွေပါ မီးသွေးဖုတ်နေကြတာ။ ဝယ်တာကတော့ တရုတ်ပေါ့။ သယ်တာက ဒေသခံတွေပဲ။ ဖမ်းရင်လည်း ဒေသခံတွေပဲမိမှာ။ သက်ဆိုင်ရာကလည်း ဒီအတိုင်းပဲ ထိုင်ကြည့်နေတယ်။ မီးသွေးက သစ်ကဖြစ်တော့ သစ်သယ်တာနဲ့ ဘာမှမထူးဘူးလေ။ အစိုးရကတော့ တရားဝင်ခွင့်ပြုတာ မရှိဘူးလို့ သိရတယ်။ အခုက ရွာဝန်းကျင်တွေက မခံနိုင်တော့ဘူး” ဟု ပြောကြားသည်။
တရုတ်နိုင်ငံသားများသည် မီးသွေးအဆင့်အတန်း ခွဲခြားခြင်းမရှိဘဲ ဝယ်ယူနေခြင်းဖြစ်ပြီး အမှုန်ကအစ ဈေးပေးဝယ်နေမှုကြောင့် ဈေးမြင့်တက်ရခြင်း ဖြစ်ကြောင်း မြစ်ကြီးနား ဒေသခံများက ပြောကြားသည်။
လက်ဖက်ရည်ဆိုင်ရှင် တစ်ဦးက “ကျွန်တော်တို့ကတော့ ၈၀၀၀ ကို ၁၂၀၀၀ ဝယ်သုံးနေရတယ်။ နံပြားတစ်ချပ်ကို ကျပ် ၅၀ တက်လိုက်ရတယ်။ ကြက်သွန်၊ အခြားကုန်ကြမ်းဈေး တက်နေတာလေ။ မတက်လို့မရဘူး။ တရုတ်က မီးသွေးမှုန့်တွေကအစ မြို့ထဲအထိ လာဝယ်တာတော့ လွန်ပါတယ်ဗျာ။ ဗြောက်အိုးတို့၊ မီးရှူးမီးပန်း လုပ်တဲ့နေရာမှာ သုံးတယ်လို့ ကြားရတယ်။ တားလို့ရရင် တားဆီးသင့်တာပေါ့” ဟု ပြောကြားသည်။
မီးသွေးကုန်သည်များက မီးသွေးများ တင်ဆောင်ရာတွင် သက်ဆိုင်ရာဌာနသို့ ငွေပေးရမှု များပြားခြင်း၊ မီးသွေးကုန်ကြမ်း ရှားပါးလာခြင်း၊ သယ်ဆောင်ရသည့် ခရီးဝေးလွန်းခြင်းနှင့် ဝယ်ယူသူ မြင့်တက်လာခြင်း ကြောင့်လည်း ဈေနှုန်းမြင့်တက်နေကြောင်း ဝေဖန်ကြသည်။ ကချင်ပြည်နယ် အစိုးရအဖွဲ့သို့ ယင်းကိစ္စနှင့် ပတ်သက်၍ ဆက်သွယ် မေးမြန်းသော်လည်း မသိရှိရသေးကြောင်း ပြောကြားသည်။
ကချင်ပြည်နယ် နယ်စပ်ဂိတ်မှ တစ်ရက်လျှင် တန် ၁၀၀ နီးပါး တင်ပို့နေမှုကို ၂၀၁၅ ခုနှစ် မတ် ၂၃ ရက်က ကချင်ပြည်နယ် လွှတ်တော်တွင် မေးမြန်းဆွေးနွေးမှုများ ရှိခဲ့ပြီး သစ်သားမီးသွေးကို နိုင်ငံခြားတိုင်းပြည်သို့ တရားဝင ်တင်ပို့ရောင်းဝယ်ခွင့် ရှိ/မရှိ ကို ဗန်းမော်မဲဆန္ဒနယ် အမှတ်(၂) မှ ပြည်နယ် လွှတ်တော် ကိုယ်စားလှယ် ဦးထွန်းရှိန်က မေးမြန်းခဲ့ခြင်းဖြစ်သည်။
ကချင်ပြည်နယ် လွှတ်တော်တွင် တင်ပြရသည့် အကြောင်းမှာ ကချင်ပြည်နယ် ဗန်းမော်ခရိုင်တွင် သစ်တောများ ပြုန်းတီးသွားပြီး မီးသွေးပြုလုပ်နိုင်သည့် သစ်မာအမျိုး အစားမှာ ကျန်ရှိခြင်း မရှိတော့သည့် အချိန်တွင် မြန်မာနိုင်ငံ စစ်ကိုင်းတိုင်းဒေသကြီး အလယ်ပိုင်းနှင့် ရှမ်းပြည်မြောက်ပိုင်း၊ မန္တလေးတိုင်းဒေသကြီး မြောက်ပိုင်းမှ မီးသွေးများသည် ဗန်းမော်မြို့သို့ ရေလမ်း၊ ကုန်းလမ်းများမှ ဝင်ရောက်လာပြီး ဗန်းမော်မြို့မှတစ်ဆင့် လွယ်ဂျယ်နယ်စပ်ဂိတ်ကို ဆယ်ဘီးကားကြီးများဖြင့် တစ်ရက်လျှင် အနည်းဆုံး သုံးစီး တရုတ်နိုင်ငံသို့ ခိုးထုတ်နေသည်ကို မြင်တွေ့နေရပြီး ရေရှည်တွင် မြန်မာနိုင်ငံမှ အဖိုးတန်သစ်မာများ ရှားပါးလာနိုင်သည့် အန္တရာယ် ရှိနေသည့်အတွက် လွှတ်တော်တွင် တင်ပြရခြင်းဖြစ်ကြောင်း တင်ပြခဲ့သည်။
တရုတ်နိုင်ငံသို့ မှောင်ခိုတင်ပို့နေသည့် မီးသွေးများသည် ဗန်းမော်-မန္တလေး ကားလမ်းမှလည်းကောင်း၊ ဗန်းမော် - မန္တလေး ရေလမ်းကြောင်းမှ လည်းကောင်း လမ်းနှစ်သွယ်ဖြင့် ဝင်ရောက်လာပြီး ဗန်းမော်မှတစ်ဆင့် ကားဖြင့် လွယ်ဂျယ်ဂိတ်ကိုဖြတ်ကာ တရုတ်နိုင်ငံသို့ တင်ပို့နေသည်မှာ နှစ်ဆယ်ချီ ကြာမြင့်ခဲ့ပြီဖြစ်ကြောင်း၊ စစ်ကိုင်းတိုင်းဒေသကြီး ဧရာဝတီမြစ်ရိုးနှင့် မန္တလေးကားလမ်းကြောမှ သယ်ယူပို့ဆောင်နေသည်မှာ ကချင်တိုင်းရင်းသား လက်နက်ကိုင် အဖွဲ့နှင့် တပ်မတော်တို့ ပစ်ခတ်မှုများ ဖြစ်ပွားလာသည့် ၂၀၁၁ ခုနှစ် နောက်ပိုင်းတွင်သာ ဖြစ်ကြောင်း တရုတ်သို့ မီးသွေးခိုးထုတ်ခဲ့သည့် ကုန်သည်များ၏ ပြောပြချက်အရ သိရသည်။
