ပြည်တွင်းပုဂ္ဂလိက ဘဏ်တစ်ခုတွင် ဘဏ်လုပ်ငန်းဆိုင်ရာများ ဆောင်ရွက်နေစဉ် (ဓာတ်ပုံ-စည်သူအောင်)

မြန်မာနိုင်ငံ၏ ဘဏ်လုပ်ငန်း ပြုပြင်ပြောင်းလဲမှုကြောင့် နိုင်ငံ့စီးပွားရေး မထိခိုက်စေရေးအတွက် ပြည်တွင်းဘဏ်များ ချေးငွေဆိုင်ရာ စည်းမျဉ်းစည်းကမ်းနှင့်အညီ ဆောင်ရွက်နိုင်ရန် ဗဟိုဘဏ်က အချိန်ခြောက်လ အစားသုံးနှစ်အထိပေးအပ်ခဲ့ကြောင်း Reuters သတင်းဌာန၏ ဖော်ပြချက်အရ သိရသည်။

ပြီးခဲ့သည့်ဇူလိုင်လအတွင်း ချမှတ်ခဲ့သည့် စည်းမျဉ်းစည်းကမ်းများနှင့် ကိုက်ညီစေရန် ကာလတိုအတွင်းဆောင်ရွက်ပါက မြန်မာနိုင်ငံ၏ ငွေရေးကြေးရေးနှင့် ဘဏ္ဍာရေးကဏ္ဍ ထိခိုက်နိုင်သည်ဟု ပြည်တွင်းဘဏ်များ၏ သတိပေးချက်များကြောင့် လာမည့်ဇန်နဝါရီလတွင် စတင်ဆောင်ရွက်ရမည့် စည်းမျဉ်းများကို သက်တမ်းတိုးပေးခဲ့ခြင်းဖြစ်ကြောင်း သိရသည်။

ပြီးခဲ့သည့် ဇူလိုင်လအတွင်း မြန်မာနိုင်ငံတော်ဗဟိုဘဏ်က ပမာဏကြီးမားသော ကြွေးမြီဆိုင်ရာစည်းမျဉ်း၊ ဘဏ်များလိုက်နာရမည့် မတည်ငွေရင်းလုံလောက်မှုဆိုင်ရာ စည်းမျဉ်း၊ ငွေကြေးလွယ်ကူမှု အချိုးသတ်မှတ်ချက်ဆိုင်ရာ စည်းမျဉ်း၊ ရရန်ပိုင်ခွင့်များအမျိုး အစားသတ်မှတ်ခြင်းနှင့် လျာထားခြင်းဆိုင်ရာ စည်းမျဉ်းများ သတ်မှတ်ခဲ့သည်။

မြန်မာနိုင်ငံတော်ဗဟိုဘဏ် ဒုတိယ ဥက္ကဋ္ဌ ဦးစိုးသိန်းက “ဘဏ်တွေက ထုတ်ပေးထားတဲ့ ချေးငွေတွေနဲ့ပတ်သက်ပြီး စည်းမျဉ်းနဲ့အညီ ဆောင်ရွက်နိုင်ဖို့အတွက် အချိန်ကာလ ခြောက်လအစား သုံးနှစ်ပေးခဲ့ပါတယ်” ဟု ပြောကြားသည်။

ဗဟိုဘဏ်က မြန်မာနိုင်ငံရှိ ဘဏ်လုပ်ငန်းများ နိုင်ငံတကာစံချိန်စံညွှန်းဖြင့် လုပ်ငန်းဆောင်ရွက်နိုင်ရန် အဆိုပါစည်းမျဉ်းစည်းကမ်းများကို ချမှတ်ခဲ့ခြင်းဖြစ်ပြီး ပြည်တွင်းဘဏ်များ၏ လက်ရှိလုပ်ထုံးလုပ်နည်းများနှင့် သတ်မှတ်ကာလအတွင်း ဆောင်ရွက်ပါက နိုင်ငံ့စီးပွားရေးအား ထိခိုက်နိုင်သောကြောင့် ဗဟိုဘဏ်ဘက်က ပြန်လည်ဖြေလျှော့ပေးခဲ့ခြင်း ဖြစ်သည်။

“ပြုပြင်ပြောင်းလဲရေးအတွက် ထိုက်သင့်တဲ့ အချိန်တစ်ခုတော့ ပြည်တွင်းဘဏ်တွေ လိုပါလိမ့်မယ်။ တစ်ခါတလေတော့ နိုင်ငံတကာ လုပ်ထုံးလုပ်နည်းအတိုင်း ပြည်တွင်းမှာ လုပ်ဆောင်ဖို့ခဲယဉ်းပါတယ်။ နိုင်ငံစီးပွား ရေးမထိခိုက်စေဖို့အတွက် ကျွန်တော်တို့ သေချာဂရုတစိုက် ဆောင်ရွက်နေပါတယ်” ဟု ဦးစိုးသိန်းက ပြောကြားသည်။

“နိုင်ငံ့စီးပွားရေး အခြေအနေက အားကောင်းမောင်းသန် အနေအထား မဟုတ်ဘူး။ ကျွန်တော်တို့အနေနဲ့ ငွေရေးကြေးရေးနဲ့ ဘဏ္ဍာရေးကဏ္ဍ တည်တည်ငြိမ်ငြိမ် ဖြစ်စေလိုပါတယ်။ ဗဟိုဘဏ်နဲ့ ပြည်တွင်းဘဏ်တွေအကြား နာလည်မှုရှိစေဖို့ ဆောင်ရွက်နေပါတယ်” ဟု ၎င်းက ဆိုသည်။

ဗဟိုဘဏ်က ချမှတ်ထားသော စည်းမျဉ်းသစ်များတွင် အတိုးမပေးနိုင်သော ချေးငွေများကို ထိန်းချုပ်မည့် စည်းကမ်းသတ်မှတ်ချက်များလည်းပါဝင်ပြီး ပြည်တွင်းဘဏ်များ ကြွေးဆုံးပမာဏ များပြားမှုမရှိစေရန်အတွက် ချမှတ်ခဲ့ခြင်း ဖြစ်သည်။ ပြည်တွင်းဘဏ်များတွင် အရည်အချင်းမပြည့်မီသော ချေးငွေ ထုတ်ချေးမှုများ အလွန်အကျွံဖြစ်နေခြင်းနှင့် ခန့်မှန်းထားသည်ထက် ပိုများနေမည်ကို ဗဟိုဘဏ်က စိုးရိမ်လျက်ရှိကြောင်း သိရသည်။

ဗဟိုဘဏ်က ချမှတ်ခဲ့သောစည်းမျဉ်းသည် ပြည်တွင်းဘဏ်များတွင် ပြန်လည်ပေးဆပ်နိုင်စွမ်းမရှိသော ချေးငွေပမာဏမည်မျှ ရှိနေသည်ကို တွက်ချက်နိုင်ရန်ဖြစ်ပြီး အဆိုပါ စည်းမျဉ်းစည်းကမ်းများကို အပြည်ပြည်ဆိုင်ရာ ငွေကြေးရန်ပုံငွေအဖွဲ့၏အကူအညီဖြင့် ချမှတ်ခဲ့ခြင်း ဖြစ်သည်။

ဗဟိုဘဏ်နှင့် ဘဏ်လုပ်ငန်းရှင်များ၏ ပြောကြားချက်အရ ချေးငွေအားလုံး၏ ရာခိုင်နှုန်း ၇၀ သို့မဟုတ် ဒေါ်လာကိုးဘီလျံနီးပါးသည် ကာလတိုချေးငွေအဖြစ် ထုတ်ချေးထားခြင်းဖြစ်ပြီး ဗဟိုဘဏ်မှချမှတ်သော စည်းမျဉ်းသစ်များတွင်ပါဝင်သော အတိုးမပေးနိုင်သော ချေးငွေများကို ထိန်းချုပ်မည့်စည်းကမ်းသတ် မှတ်ချက်အရ အချိန်ခြောက်လအတွင်း ဆောင်ရွက်ပါက မြန်မာနိုင်ငံ၏စီးပွားရေး ထိခိုက်နိုင်သည်ဟု ဘဏ်လုပ်ငန်းရှင်များ၏ တင်ပြချက်အရ အချိန်သုံးနှစ်အထိ တိုးမြှင့်ပေးအပ်ခဲ့ခြင်း ဖြစ်သည်။