<

ရခိုင်ပြည်နယ်မှ ဘင်္ဂလားဒေ့ရ်ှသို့ ထွက်ခွာသွားသူများကို နှစ်နိုင်ငံ သဘောတူညီချက်ဖြင့် ပြန်လည် လက်ခံနိုင်ရန် နီးစပ်နေပြီ ဖြစ်ကြောင်း ပြည်ထောင်စုဝန်ကြီး ပြောကြား

ရခိုင်ပြည်နယ်မှ ဘင်္ဂလားဒေ့ရ်ှသို့ ထွက်ခွာသွားသူများကို နှစ်နိုင်ငံ သဘောတူညီချက်ဖြင့် ပြန်လည်လက်ခံရန် နီးစပ်နေပြီ ဖြစ်ကြောင်း ရခိုင်ပြည်နယ်ဆိုင်ရာ အကြံပြုချက်များ အကောင်အထည်ဖော်ရေးကော်မတီဥက္ကဋ္ဌ ပြည်ထောင်စုဝန်ကြီး ဒေါက်တာဝင်း မြတ်အေးက ပြောကြားသည်။

“သဘောတူညီချက် လက်မှတ်ရေးထိုးဖို့က အရမ်းအရေးကြီးတဲ့ကိစ္စ ဖြစ်တယ်။ ဒါနဲ့ ပတ်သက်ပြီးတော့လည်း အလွန်နီးစပ်နေပြီ။ မကြာခင်မှာ သဘောတူညီချက် ထွက်ပေါ်လာမယ်။ ထွက်ပေါ်လာပြီးရင် စတင် ဆောင်ရွက်နိုင်တော့မှာ ဖြစ်ပါတယ်”ဟု ပြည်ထောင်စုဝန်ကြီး ဒေါက်တာဝင်းမြတ်အေးက ပြောကြားသည်။

အဆိုပါ ရွှေ့ပြောင်းသူများ ပြန်လည်လက်ခံရေးနှင့် စပ်လျဉ်းသည့် သဘောတူညီချက်ကို မြန်မာနိုင်ငံအနေဖြင့် ၁၉၉၃ ခုနှစ် သဘောတူညီချက်အပေါ်တွင် အခြေခံကာ ညှိနှိုင်းဆောင်ရွက်မည် ဖြစ်ကြောင်းလည်း ၎င်းက ပြောကြားသည်။

သို့ရာတွင် ယင်းသဘောတူညီချက်တွင် မည်သည့်အချက်များ ပါဝင်မည်ကို လတ်တလော ပြောကြား၍ မရသေးဘဲ အပြီးသတ် သဘောတူညီချက် ရရှိမှသာ ရှင်းရှင်းလင်းလင်း ချပြမည်ဖြစ်ကြောင်း ပြည်ထောင်စုဝန်ကြီးက ပြောကြားသည်။

“ညှိနှိုင်းတယ် ဆိုတာကတော့ အပေးအယူနဲ့ ညှိနှိုင်းရတာ ရှိတယ်။ အားလုံးဟာ တစ်ဖက်အတိုင်း ရာနှုန်းပြည့် မဖြစ်နိုင်ဘူး။ ရာနှုန်းမပြည့်သော်လည်း တကယ်ပြည်သူ အကျိုးရှိမယ် မြန်မြန်လေး အကောင်အထည်ဖော် ဆောင်ရွက်နိုင်မယ်ဆိုရင် အားလုံးက တိုက်တွန်းကြတာတွေလည်း ရှိတယ်။ ကျွန်တော်တို့က တကယ်ဆောင်ရွက်ချင်တာလည်း ရှိတယ်။ ဘာကြောင့်လဲဆိုတော့ ဒီကိစ္စကြီးက ကျွန်တော်တို့က မလွဲမသွေ တာဝန်ရှိတဲ့ကိစ္စ ဖြစ်တယ်။ ဆောင်ရွက်ရမယ့်ကိစ္စ ဖြစ်တယ်”ဟု ပြည်ထောင်စုဝန်ကြီး ဒေါက်တာဝင်းမြတ်အေးက ပြောကြားသည်။

ရခိုင်ပြည်နယ်မှ အကြမ်းဖက်မှုနှင့် ပဋိပက္ခများကြောင့် ပြည်တွင်းရှိ အခြားနေရာများသို့ ပြောင်းရွှေ့သွားသူများကို မူလနေရာတွင် ပြန်လည် နေထိုင်နိုင်စေရန်၊ နိုင်ငံပြင်ပသို့ ရောက်ရှိသွားသူများကိုလည်း ဘိုးစဉ်ဘောင်ဆက် အမှန်တကယ် နေထိုင်သူများ ဟုတ်မ ဟုတ် စိစစ်လက်ခံနိုင်ရန်နှင့် လူသားချင်း စာနာထောက်ထားမှု အကူအညီများပေးသွားရန် အဆင်သင့်ဖြစ်နေပြီ ဖြစ်ကြောင်းလည်း ၎င်းက ပြောကြားသည်။

“အတွင်း (ပြည်တွင်း) ထဲမှာ နေရာရွှေ့ပြောင်းနေသွားတဲ့ သူတွေဆိုလည်း သူ့နေရာနဲ့သူ သူ့ရွာသူ ပြန်ရောက်အောင် ဆောင်ရွက်နေတာ တော်တော်လေးတော့ ပြီးပြည့်စုံနေတယ်။ ပြင်ပကို ထွက်သွားတဲ့သူတွေကိုလည်း မိမိနေရာမိမိ တကယ်နေခဲ့တဲ့သူ အစစ်အမှန်တွေ၊ ဘိုးစဉ်ဘောင်ဆက် နေထိုင်ခဲ့တဲ့ သူတွေဆိုရင် ပြန်လည်လက်ခံဖို့ဆိုတာ အဆင်သင့် ဖြစ်နေပြီ။ ပြန်လည် လက်ခံမယ့် စခန်းတွေကို ပြုပြင်နေတယ်။ အသစ် တည်ဆောက်နေတာတွေလည်း ရှိတယ်။ နောက် လူသားချင်း စာနာထောက်ထားမှု အကူအညီအတွက်ကိုလည်း စနစ်တကျ စီမံထားတာ ရှိတယ်။ တစ်ပြိုင်တည်းမှာပဲ ဖွံ့ဖြိုးတိုးတက်ရေးတွေပါ ဆောင်ရွက်နေတယ်။ UEHRD ထဲမှာ ဒီလုပ်ငန်းစဉ် သုံးမျိုးလုံး အကုန်ပါပါတယ်”ဟု ရခိုင်ပြည်နယ်အတွင်း လူသားချင်း စာနာမှုအကူအညီ အထောက်အပံ့ပေးရေး၊ ပြန်လည်နေရာချထားရေး ဖွံ့ဖြိုးရေးစီမံကိန်း (UEHRD) တွင်လည်း ဒုတိယဥက္ကဋ္ဌဖြစ်သည့် ဒေါက်တာဝင်းမြတ်အေးက ပြောကြားသည်။

နေပြည်တော်ရှိ မင်္ဂလာသီရိဟိုတယ်တွင် နိုဝင်ဘာ ၂၂ ရက်က ပြုလုပ်သော ဂလိုဘယ်လိုက်ဇေးရှင်းခေတ်တွင် မတူကွဲပြားမှုကို စီမံခန့်ခွဲခြင်းဖိုရမ် Diversity Management in Age of Globalization တွင် မီဒီယာများ၏ မေးမြန်းမှုကို ပြည်ထောင်စုဝန်ကြီး ဒေါက်တာဝင်းမြတ်အေးက အထက်ပါအတိုင်း ဖြေကြားခဲ့ခြင်း ဖြစ်သည်။

November 23, 2017














Copy Protected by Chetan's WP-Copyprotect.