တူနီးရှားနိုင်ငံ သမ္မတဟောင်း၏ မြန်မာနိုင်ငံအပေါ် စွပ်စွဲပြောကြားမှုနှင့် ပတ်သက်၍ သက်ဆိုင်ရာ အဖွဲ့အစည်းဖြစ်သည့် HWPL က ပြန်လည်တောင်းပန်

တူနီးရှားနိုင်ငံ သမ္မတဟောင်း၏ မြန်မာနိုင်ငံအပေါ် စွပ်စွဲပြောကြားမှုနှင့် ပတ်သက်၍ သက်ဆိုင်ရာ အဖွဲ့အစည်းဖြစ်သည့် HWPL က ပြန်လည်တောင်းပန်
Published 9 November 2017

တူနီးရှားနိုင်ငံ သမ္မတဟောင်း၏ မြန်မာနိုင်ငံအပေါ် စွပ်စွဲပြောကြားမှုနှင့် ပတ်သက်၍ သက်ဆိုင်ရာ အဖွဲ့အစည်းဖြစ်သည့် HWPL က ပြန်လည်တောင်းပန်ခဲ့ကြောင်း သာသနာရေးနှင့် ယဉ်ကျေးမှု ဝန်ကြီးဌာနက နိုဝင်ဘာ ၇ ရက်တွင် သတင်းထုတ်ပြန်ခဲ့သည်။

စက်တင်ဘာ ၁၈ ရက်တွင် တောင်ကိုးရီးယားနိုင်ငံ ဆိုးလ်မြို့တွင် ကျင်းပသော တတိယအကြိမ် ငြိမ်းချမ်းရေး နှစ်ပတ်လည် ထိပ်သီးညီလာခံ အစည်းအဝေးနှင့် အထိမ်းအမှတ်ပွဲ World Alliance Religions Peace (WARP) Summit, Seoul တွင် တူနီးရှားနိုင်ငံ သမ္မတဟောင်း H.E. Moncef Marzouki က “လက်ရှိ ဖြစ်ပွားနေသော စစ်ပွဲအများစုတွင် ဘာသာရေး အကျုံးဝင်မှုနှင့် တရားမျှတကြောင်း ပြသမှုတို့ရှိကြောင်း၊ မြန်မာနိုင်ငံတွင် လက်ရှိဖြစ်ပွားနေသော လူမျိုးသုဉ်း သတ်ဖြတ်ခြင်းအပေါ် ဗုဒ္ဓဘာသာကို ကာကွယ်ခြင်းဟု ယူဆကြကြောင်း၊ အထင်အရှား ပြောရမည်ဆိုလျှင် အကြမ်းဖက်မှုနှင့် ဘာသာရေးကို ရောယှက်ဖြစ်သော ရာဇဝတ်မှုပင် ဖြစ်ကြောင်း၊ ယခုဗုဒ္ဓခေတ်တွင် ဗုဒ္ဓရဟန်းတော်များကို ကြည့်သောအခါ ဗုဒ္ဓဘာသာက ဆုံးမထားသကဲ့သို့ ငြိမ်းချမ်းရေးနှင့် သည်းခံမှုတန်ဖိုးများအတွက် ကိုယ်စားလှယ်များဟု ထင်ရပြီး မြန်မာနိုင်ငံရှိ မွတ်စလင် လူနည်းစုကို မျိုးဖြုတ်သုတ်သင်ခြင်းသည် အလွန်ထူးဆန်းပြီး ရင်နာစရာ ကောင်းပါကြောင်း၊ ယေဘုယျအားဖြင့် ကမ္ဘာ့ဘာသာရေး ခေါင်းဆောင်များ အားလုံးနှင့် အထူးသဖြင့် ဤထိပ်သီးညီလာခံသည် အရေးကြီးသော အခန်းကဏ္ဍမှ ပါဝင်နေကြောင်း ကျွနု်ပ်ထင်မြင်မိပါတယ်” ဟု ပြောဆိုခဲ့ကြောင်း သာသနာရေးနှင့် ယဉ်ကျေးမှု ဝန်ကြီးဌာန၏ သတင်းထုတ်ပြန်ချက်အရ သိရသည်။

၎င်း၏ ပြောဆိုစွပ်စွဲချက်များအတွက် အဆိုပါ အခမ်းအနားအား တာဝန်ယူကျင်းပခဲ့သည့် ဆိုးလ်မြို့အခြေစိုက် Heavenly Culture, World Peace, Restoration of Light (HWPL) အဖွဲ့မှ ဒါရိုက်တာ Ye Won Lee က ၂၆-၁၀-၂၀၁၇ ရက်စွဲပါ တောင်းပန်စာအား ပေးပို့လာပြီး အဆိုပါ တောင်းပန်စာတွင် “မတူကွဲပြားသော လူမျိုးစုများ၊ ယဉ်ကျေးမှုများနှင့် ဘာသာရေးများ စုစည်းထားသော အပြည်ပြည်ဆိုင်ရာ ငြိမ်းချမ်းရေး အဖွဲ့အစည်း ဖြစ်ပါကြောင်း၊ တိုင်းပြည်အသီးသီးမှ လူများစုအကြား မတူကွဲပြားခြင်းကို ကျော်လွှားခြင်း၊ ငြိမ်းချမ်းရေးကို အဓိက ရည်ရွယ်သော အမြင်များမှတစ်ဆင့် Heavenly Culture, World Peace, Restoration of Light (HWPL) သည် အတွေးအခေါ်များကို နားထောင်ပေးပါကြောင်း၊ သို့သော်ငြားလည်း ဤဖြစ်စဉ်မှ တစ်ဆင့် (HWPL) မှ ရည်မှန်းထားသည့် ငြိမ်းချမ်းရေး အသိသညာများနှင့် အလှမ်းဝေးသော အမြင်များနှင့် အတွေးအခေါ်များကို ပြန်လည်ဆွေးနွေးပါကြောင်း၊ HWPL မှာ ကမ္ဘာ့ငြိမ်းချမ်းရေးပွဲကို လက်ခံကျင်းပခဲ့ပြီး ဆွေးနွေးတင်ပြသူ တစ်ယောက်ထံမှ ပုဂ္ဂိုလ်ရေးဆိုင်ရာ မျက်နှာလိုက်သော စကားရပ်သည် အလွန်ဝမ်းနည်းဖွယ် ထွက်လာခဲ့ပါကြောင်း၊ HWPL သည် ကျွနု်ပ်တို့၏ စဉ်းစားဆင်ခြင်ဉာဏ်နှင့် ပြန်လည်သုံးသပ်ခြင်းကို ဖြစ်စေခဲ့သော ထိုစကားရပ်အတွက် လွန်စွာဝမ်းနည်း ရပါကြောင်း ဖော်ပြထားသည်ဟု သိရသည်။

ဆက်လက်ပြီး ကြားနေဝါဒအားဖြင့် စစ်ပွဲများ ရပ်တန့်ရေးအတွက် ငြိမ်းချမ်းရေးကို လိုလားတောင့်တသော အဖွဲ့အစည်းအနေဖြင့် HWPL သည် မြန်မာနိုင်ငံ၏ အလွန်အထိအခိုက် မခံဘဲ အငြင်းပွားဖွယ်ဖြစ်သော ပြုပြင်ပြောင်းလဲမှု ကာလတွင်  ချင့်ချိန်ရှုမျှော်ရာ လုံလောက်မှု မရှိသည့်အတွက် လှိုက်လှိုက်လှဲလှဲ တောင်းပန်အပ်ပါကြောင်း၊ ထိုကဲ့သို့သော အမှားမျိုး နောက်တစ်ဖန် မဖြစ်စေရပါဟု ရှင်းလင်းဖော်ပြ တောင်းပန်ထားပါကြောင်း သာသနာရေး ဝန်ကြီးဌာနက အများပြည်သူ သိရှိစေရန် ထုတ်ပြန်ခဲ့သည်။

 

Most Read

Most Recent