၂၀၁၇-၂၀၁၈ ဘဏ္ဍာနှစ်အတွင်း ဆံတော်ရှင် ကျိုက်ထီးရိုးစေတီတော် တောင်တော်ဖွင့်ပွဲမှ အလှူငွေ ကျပ်သိန်း ၈၈၀ ကျော်ရရှိပြီး ယခင်ဘဏ္ဍာနှစ်ထက် ကျပ်သိန်း ၇၀၀ ကျော်ပိုမိုရရှိခဲ့ကြောင်း သာသနာရေးနှင့် ယဉ်ကျေးမှု ဝန်ကြီးဌာန၏ ထုတ်ပြန်ချက်အရ သိရသည်။
ထုတ်ပြန်ချက်တွင် ၂၀၁၅-၂၀၁၆ ဘဏ္ဍာ နှစ် တောင်တော်ဖွင့်ပွဲတွင် အလှူတော်ငွေ ကျပ် ၁၂၇ သိန်းရရှိပြီး ယခု ၂၀၁၇-၂၀၁၈ ခုနှစ် တောင်တော်ဖွင့်ပွဲတွင် အလှူငွေ ကျပ် ၈၈၉ သိန်းကျော် ရရှိခဲ့သောကြောင့် ကျပ် ၇၆၂ သိန်းကျော် ပိုမိုရရှိခဲ့ကြောင်း၊ ယခင် ၂၀၁၅-၂၀၁၆ ခုနှစ် ရွှေဆိုင်းအရောင်းလုပ်ငန်းအား ကန်ထရိုက်စနစ် ကျင့်သုံးစဉ်က လေလံကြေး တစ်နှစ်စာ ကျပ် ၆၃၈ သိန်းကျော် ရရှိခဲ့ကြောင်း၊ ဂေါပကအဖွဲ့သစ်၏ ကြီးကြပ်မှု ဖြင့် ၂၀၁၇ ခုနှစ် အောက်တိုဘာ ၅ ရက်မှ ၁၀ ရက်အထိ ခြောက်ရက်အတွင်း ရွှေဆိုင်းရောင်းချခဲ့ရာ အမြတ်ငွေ ကျပ် ၃၃၆ သိန်းကျော် ရရှိခဲ့ကြောင်း သိရသည်။
ထို့ပြင် ရင်ပြင်တော် အလှူခံပုံးများ၌ ယခင် ၂၀၁၅-၂၀၁၆ ဘဏ္ဍာနှစ်တွင် တစ်နှစ်စာ ကျပ် ၄၁၁ သိန်းကျော် ရရှိခဲ့ပြီး ယခုနှစ် ဂေါပကအဖွဲ့သစ် တာဝန်ယူသည့် အောက်တိုဘာ ၅ ရက်မှ အောက်တိုဘာ ၁၀ ရက်အထိ ကျပ် ၁၁၉ သိန်းကျော် ရရှိခဲ့ကြောင်း၊ ဆည်းလည်း အရောင်းလုပ်ငန်းကို ကန်ထရိုက်စနစ် ကျင့်သုံးစဉ်က ကျပ် ၁၆၇ သိန်းကျော် ရရှိခဲ့ပြီး ယခုနှစ် ဂေါပကအဖွဲ့သစ် ကြီးကြပ်မှုဖြင့် ခြောက်ရက်တာ ကာလအတွင်း ရောင်းချခဲ့ရာ ကျပ် ၇၂ သိန်းကျော် ရရှိခဲ့ကြောင်း၊ ဂေါပကအဖွဲ့သစ် တာဝန်ယူသည့် ၂၀၁၆ ခုနှစ် အောက်တိုဘာမှ ၂၀၁၇ ခုနှစ် သြဂုတ်လအထိ ကျိုက်ထီးရိုးစေတီတော်ကြီးသို့ ပြည်တွင်းဘုရားဖူး ၂ ဒသမ ၆ သန်းကျော်နှင့် ပြည်ပဘုရားဖူး ၁ ဒသမ ၁ သိန်းကျော် လာရောက်ဖူးမြော် ကြည်ညိုခဲ့ကြောင်း ထုတ်ပြန်ချက်အရ သိရသည်။
ထို့ပြင် ၂၀၁၆ ခုနှစ်တွင် ဂေါပကအဖွဲ့သစ် အနေဖြင့် ရွှေသင်္ကန်း ကန်ထရိုက်လုပ်ငန်း၊ အလှူခံပုံး စသည့် ကန်ထရိုက်စာချုပ် စနစ်များကို ပယ်ဖျက်ပြီး ဘက်စုံပဒေသာပင် အလှူခံဌာန တစ်ခုတည်းသာ ဖွင့်လှစ်ဆောင်ရွက်ခြင်း၊ ရင်ပြင်တော်ရှိ တည်းခိုဆောင် ကန်ထရိုက်စနစ်ကို ပယ်ဖျက်ပြီး ဂေါပကအဖွဲ့သစ်က တိုက်ရိုက်စီမံ ကြီးကြပ်ပြီး ဘုရားဖူး ပြည်သူများ စိတ်နှလုံးချမ်းမြေ့စွာ ဘုရားဖူးနိုင်ရေးအတွက် အခမဲ့ တည်းခိုနိုင်ရေးနှင့် သက်သာသော နှုန်းထားဖြင့် တည်းခိုနိုင်ရေးတို့ကို စီစဉ်ဆောင်ရွက်ခြင်း၊ စီးပွားရေးဆန်သော အနှစ် ၂၀၊ အနှစ် ၃၀ ရေရှည်ကန်ထရိုက် စာချုပ်ပေါင်း ၁၄ မျိုးကို ပယ်ဖျက်ခြင်း စသည့် ပြုပြင်ပြောင်းလဲရေး လုပ်ငန်းများ ဆောင်ရွက်ခဲ့ကြောင်း ထုတ်ပြန်ချက်တွင် ဖော်ပြထားသည်။
ယင်းအပြင် ကျိုက်ထီးရိုးစေတီတော် ရင်ပြင်တော်ရှိ တိဿဓမ္မာရုံ (ပထမထပ်)၊ ဆီးမီး ၉၀၀၀ ဓမ္မာရုံ စသည်တို့ရှိ အခန်း ၂၉ ခန်းတွင် ဘုရားဖူး ရဟန်း၊ ရှင်၊ လူ၊ ပြည်သူ ၁၂၆၇ ဦးအား အခမဲ့ တည်းခိုနိုင်ရေးနှင့် တိဿဓမ္မာရုံ (ဒုတိယ၊ တတိယ၊ စတုတ္ထထပ်)၊ ပေ ၄၀ ဓမ္မာရုံ စသည့်ဓမ္မာရုံများနှင့် တည်းခိုဆောင်တို့ရှိ အခန်း ၃၇၃ ခန်းတွင် ဘုရားဖူး ၁၄၄၀ တို့အား အခပေး တည်းခိုနိုင်ရေးတို့ကို စီမံဆောင်ရွက် ပေးခဲ့ကြောင်း၊ အခပေး တည်းခိုဆောင်များတွင် တည်းခိုရာ၌ Aircon၊ စောင်၊ ခေါင်းအုံး၊ ခြင်ထောင်များ ဝန်ဆောင်မှုပေးပြီး တစ်ဦးလျှင် ကျပ် ၅၀၀၀၊ ကျပ် ၁၀၀၀၀၊ ကျပ် ၁၅၀၀၀ စသည်ဖြင့် ယခင်နှုန်းထားများထက် များစွာလျော့နည်း သက်သာသော နှုန်းထားများ သတ်မှတ်ပြီး တည်းခိုနိုင်အောင် စီစဉ်ဆောင်ရွက်ခဲ့ကြောင်း သိရသည်။
