စစ်ကိုင်းပြတ်ရွေ့ကြော အင်းဝအပိုင်းတွင် ငလျင်လှုပ်ခတ်ခဲ့သည်မှာ နှစ်ပေါင်းရာချီ ကြာမြင့်နေပြီ ဖြစ်သည့်အတွက် ထပ်မံလှုပ်ခတ်ရန် အခွင့်အလမ်း များသည့်အတွက် ယင်းနေရာတွင် ပြည်တွင်းပြည်ပ ပညာရှင်များ ပူးပေါင်း၍ လေ့လာမှုများ ပြုလုပ်သွားမည်ဖြစ်ကြောင်း မြန်မာနိုင်ငံ ငလျင်ကော်မတီမှ သိရသည်။
“စစ်ကိုင်းပြတ်ရွေ့ကတော့ Detail Mapping ပေါ့။ ဘူမိဗေဒပညာရှင်တွေ နိုင်ငံတကာနဲ့ ပေါင်းပြီးတော့ အထူးသဖြင့် ငလျင်ကြီးကြီးမားမား လှုပ်နိုင်တဲ့ အပိုင်းတွေပေါ့။ စစ်ကိုင်းပြတ်ရွေ့ပေါ်မှာရှိတဲ့ ပဲခူးအပိုင်းကတော့ တော်တော်လေး ပြီးပြီဆိုတော့ လုပ်ထားပြီးသလောက် ရှိနေပြီ။ ကျွန်တော်တို့ နောက်တစ်နေရာ စိုးရိမ်တာက မန္တလေး၊ အမရပူရ။ အင်းဝငလျင်ဆိုတာ ၁၈၃၉ ခုနှစ်က လှုပ်ခဲ့တာ။ လှုပ်မယ်ဆိုရင် ဒီကောင်က တော်တော်လေးကို အခွင့်အလမ်းများတယ်။ အဲဒီအပိုင်းကို သိပ်မသိကြသေးဘူး။ အဲဒီအပိုင်းကို ၂၀၁၉ မှာ အဲဒီနေရာကို Focus လုပ်ပြီးတော့ လေ့လာဖို့ သဘောတူကြတယ်” ဟု မြန်မာနိုင်ငံ ငလျင်ကော်မတီဒုဥက္ကဋ္ဌ ဒေါက်တာမျိုးသန့်က ပြောကြားသည်။
ယင်းသို့ လေ့လာမှုများတွင် GPS ဖြင့် လေ့လာခြင်း၊ Air Bomb lighter၊ Resolution ကောင်းမွန်သည့် ကောင်းကင်ဓာတ်ပုံရရန် ရိုက်ကူးခြင်း၊ Seismic Survey တို့ ပြုလုပ်သွားမည်ဖြစ်ကြောင်း သိရသည်။
“အင်းဝက နောက်ဆုံးလှုပ်ခဲ့တာ ၁၈၃၉။ သူ့ကို ရွေးချယ်လိုက်တာက အကြမ်းဖျင်း သူ့ကို သုတေသန လုပ်ကြည့်လိုက်တာက အင်အား ရှစ်လောက်အထိ ရှိခဲ့လိမ့်မယ်လို့ ယူဆတာပေါ့။ လှုပ်ခဲ့တာကလည်း ကြာနေပြီ။ နှစ်ပေါင်း ရာတောင်ချီသွားပြီ။ အခုအချိန် လှုပ်မယ်ဆိုရင်တော့ ၇ ဒသမ ၆ ပြင်းအား တစ်ခုခုပေါ့။ ဒါကြောင့် အဲဒီအပိုင်းကို ပိုပြီးတော့ Focus လုပ်လိုက်တာပါ။ ဒီဘက်က ပဲခူးတို့ ဘာတို့က တော်တော်လေး အတန်အသင့် လေ့လာပြီးသလောက် ဖြစ်သွားတာပေါ့” ဟု ဒေါက်တာမျိုးသန့်က ဆိုသည်။
“စစ်ကိုင်းပြတ်ရွေ့ကြော၊ အင်းဝအပိုင်းက ဘယ်ကစမလဲဆိုတော့ တောင်၊ မြောက် အမရပူရ အင်းဝလောက်ကနေ နေပြည်တော်နားအထိ။ အင်းဝကနေပြီးတော့ နေပြည်တော် အထိဆိုရင် အဲဒီအပေါ်မှာရှိတဲ့ မြို့တွေကတော့ နည်းနည်းလေး အန္တရာယ်ရှိတာပေါ့” ဟု ၎င်းက ဆက်လက်ပြော ကြားသည်။
