<

မောင်တောခရိုင်အတွင်း တာဝန်ထမ်းဆောင်နေသော နိုင်ငံ့ဝန်ထမ်းများအား အောက်တိုဘာ၊ နိုဝင်ဘာနှင့် ဒီဇင်ဘာအတွက် မူရင်းလစာ၏နှစ်ဆ ပြင်ဆင်ခံစားခွင့်ပြု

မောင်တောခရိုင်အတွင်းရှိ စာသင်ကျောင်း တစ်ကျောင်းတွင် ကျောင်းတက်ရန် လာရောက်ကြသည့် ကျောင်းသားကျောင်းသူ အချို့အား တွေ့ရစဉ်

လက်ရှိဖြစ်ပေါ်နေသော ဒေသဆိုင်ရာ လုံခြုံရေးအခြေအနေအရ မောင်တောခရိုင်အတွင်း တာဝန်ထမ်းဆောင်နေသော နိုင်ငံ့ဝန်ထမ်းများအား အောက်တိုဘာ၊ နိုဝင်ဘာနှင့် ဒီဇင်ဘာသုံးလအတွက် မူရင်းလစာ၏နှစ်ဆ ပြင်ဆင်ခံစားခွင့်ပြုခဲ့ကြောင်း သိရသည်။

ပြည်ထောင်စုအစိုးရအဖွဲ့ အစည်းအဝေးအမှတ် (၁၈/၂၀၁၇) ၏ ခွင့်ပြုချက်အရ ရခိုင်ပြည်နယ် မောင်တောခရိုင်အတွင်းမြို့နယ်များတွင် တာဝန်ထမ်းဆောင်လျက်ရှိသော နိုင်ငံ့ဝန်ထမ်းများအားလုံး လက်ရှိအခြေအနေအရ ၂၀၁၇ ခုနှစ် အောက်တိုဘာ၊ နိုဝင်ဘာ၊ ဒီဇင်ဘာတို့အတွက် လက်ရှိခံစားနေသော မူရင်းလစာ၏နှစ်ဆကို အထူးကိစ္စတစ်ရပ်အနေဖြင့် ဆက်လက်၍ ပြောင်းလဲပြင်ဆင် ခံစားခွင့်ပြုလိုက်ခြင်းဖြစ်ပြီး တစ်ရက်လုပ်ခ ကျပ် ၆၅၀၀ နှုန်းသို့ ဆက်လက်၍ ပြောင်းလဲပြင်ဆင် ခံစားခွင့်ပြုလိုက်ခြင်းဖြစ်ကြောင်း သိရသည်။

အဆိုပါထုတ်ပြန်ချက်အား အောက်တိုဘာ ၁၉ ရက် ရက်စွဲဖြင့် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်း၏လက်မှတ်ဖြင့် ထုတ်ပြန်ခဲ့ခြင်းဖြစ်ကြောင်း သိရသည်။

လစာနှစ်ဆတိုးမြှင့်ခံစားခွင့်ပြုခြင်းနှင့် ပတ်သက်၍ ရခိုင်ပြည်နယ်အစိုးရအဖွဲ့ စီမံကိန်းနှင့် ဘဏ္ဍာရေးဝန်ကြီး ဦကျော်အေးသိန်းက “အဲဒါက နိုင်ငံတော်ကစီစဉ်တာပါ။ နိုင်ငံတော်ကနေ ဝေးလံခေါင်သီတဲ့ဒေသတွေ၊ လူမှုရေးတာဝန်ထမ်းဆောင်ရန် ခက်ခဲတဲ့ဒေသတွေမှာ အဲဒီလိုထောက်ပံ့ပေးတာတွေရှိပါတယ်။ သုံးလတစ်ကြိမ်စီ အမိန့်စာထွက်ပြီး လုပ်နေတာဖြစ်ပါတယ်” ဟုပြောကြားသည်။

၂၀၁၆ ခုနှစ် အောက်တိုဘာလအတွင်းက မောင်တောဒေသရှိ နယ်ခြားစောင့်ရဲစခန်းသုံးခုကို ဘင်္ဂါလီအကြမ်းဖက်သမားများ တိုက်ခိုက်ခဲ့ပြီးနောက်ပိုင်း မောင်တောဒေသအတွင်း တာဝန်ထမ်းဆောင်နေသည့် နိုင်ငံ့ဝန်ထမ်းများကို ယင်းသို့လစာနှစ်ဆ တိုးမြှင့်ခံစားခွင့်ပြုခြင်းဖြစ်ကြောင်း သိရသည်။

မောင်တောမြို့နယ် ပညာရေးမှူး ဦးခင်အောင်က “ကျွန်တော်တို့ ၂၀၁၆ ကတည်းကနေပေးလာတာ ဆက်တိုက်ဆက်တိုက်ပေးခဲ့ပြီးတော့ ၂၀၁၇ ဘဏ္ဍာနှစ်မှာလည်း ဇန်န၀ါရီ၊ ဖေဖော်ဝါရီ၊ မတ်တစ်ကြိမ်၊ နောက်တစ်ခါ ဧပြီ၊ မေ၊ ဇွန်တစ်ကြိမ်နဲ့ ဇူလိုင်၊ သြဂုတ်၊ စက်တင်ဘာတစ်ကြိမ် ပေးပြီးပါပြီ။ ဒီအောက်တိုဘာ၊ နိုဝင်ဘာနှင့် ဒီဇင်ဘာသုံးလကိုလည်း အောက်တိုဘာ ၁၉ ရက်နေ့စွဲနဲ့ ပြည်ထောင်စုဝန်ကြီးကနေပြီးတော့ လစာနှစ်ဆ ထုတ်ပေးခွင့်ပေးလိုက်တယ်ဆိုပြီးတော့ အမိန့်ညွှန်ကြားချက် ရောက်နေပါပြီ။ ဒါပေမဲ့ဌာနကတော့ ဘယ်လောက်ထုတ်ယူပါဆိုပြီးတော့ ခွင့်ပြုချက်မကျသေးတဲ့အတွက် ဒီလမှာတော့ ဒေသစရိတ်နဲ့ လစာကိုပဲ လောလောဆယ်ပေးလိုက်နိုင်သေးတယ်။ နောက်လမှာပေါင်းပြီးတော့ ထုတ်ပေးမှာပေါ့” ဟုပြောကြားသည်။

မောင်တောဒေသတွင် ၂၀၁၇ ခုနှစ် သြဂုတ် ၂၅ ရက်က ARSA ဘင်္ဂါလီအကြမ်းဖက်သမားများက တပ်စခန်းတစ်ခုနှင့် ရဲစခန်း ၃၀ ကိုတိုက်ခိုက်ခဲ့ပြီး နိုင်ငံ့ဝန်ထမ်းများ သေဆုံးဒဏ်ရာရရှိမှုများရှိခဲ့သည်။

ထို့ပြင် ဝေလံခေါင်သီ လမ်းပန်းဆက်သွယ်ရေးခက်ခဲသည့် ကျေးလက်တောရွာများတွင် တာဝန်ထမ်းဆောင်နေကြသည့် ကျန်းမာရေးဝန်ထမ်းများ၊ ကျောင်းဆရာ ဆရာမများအနေဖြင့် ဆက်သွယ်သွားလာမရ ပိတ်မိနေခဲ့ကြပြီးနောက် လုံခြုံရေးဖြင့် ကယ်ထုတ်ခဲ့ရသည်များလည်း ရှိခဲ့သည်။

“ဒေသကလည်း သက်စွန့်ဆံဖျားလုပ်ရတဲ့ဒေသဖြစ်နေတယ်။ နောက်ပြီးတော့ ရှားပါးတဲ့ လူအသွားအလာနည်းပြီးခေါင်တဲ့၊ ကုန်ဈေးနှုန်းကြီးတဲ့မြို့ဖြစ်တဲ့အတွက် ၀န်ထမ်းကတော့ ယခင်ကထက်ပိုပြီးတော့ စေတနာထားပြီး လုပ်နိုင်လိမ့်မယ်လို့ထင်တယ်။ နိုင်ငံတော်အနေနဲ့လည်း ပေးလိုက်တဲ့ဘဏ္ဍာအတွက် အကျိုးရှိရှိနဲ့ အသုံးချနိုင်လိမ့်မယ်လို့ထင်ပါတယ်” ဟု မောင်တောမြို့နယ်ပညာရေးမှူး ဦးခင်အောင်က ပြောကြားသည်။

ပြည်ထောင်စုသမ္မတ မြန်မာနိုင်ငံတော်အစိုးရသည် ရခိုင်ပြည်နယ် မောင်တောခရိုင်အတွင်းရှိ မြို့နယ်များတွင် တာဝန်ထမ်းဆောင်နေသော အဆင့်အလိုက် ဌာနဆိုင်ရာ နိုင်ငံ့ဝန်ထမ်းများအား မူရင်းလစာ၏ နှစ်ဆနှင့် နေ့စားအလုပ်သမားများအားလုံး၏ တစ်ရက်လုပ်ခကို ကျပ် ၆၅၀၀ နှုန်းသို့ လက်ရှိဖြစ်ပေါ်နေသော ဒေသဆိုင်ရာ လုံခြုံရေးအခြေအနေအရ ၂၀၁၆ ခုနှစ်အောက်တိုဘာ၊ နိုဝင်ဘာ၊ ဒီဇင်ဘာတို့အတွက်ကိုလည်းကောင်း၊ ၂၀၁၇ ခုနှစ် ဇန်န၀ါရီ၊ ဖေဖော်ဝါရီ၊ မတ်တို့အတွက်ကိုလည်းကောင်း၊ ၂၀၁၇ ခုနှစ် ဧပြီ၊ မေ၊ ဇွန်တို့အတွက်ကိုလည်းကောင်း၊ ၂၀၁၇ ခုနှစ်ဇူလိုင်၊ သြဂုတ်၊ စက်တင်ဘာအတွက်ကိုလည်း အထူးကိစ္စတစ်ရပ်အနေဖြင့် စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးရုံး၏ အမိန့်ကြော်ငြာစာအမှတ် (၁၆၁/၂၀၁၆) (၃၁/၂၀၁၇)(၅၇/၂၀၁၇) နှင့် (၈၈/၂၀၁၇) တို့ဖြင့် ပြောင်းလဲပြင်ဆင်ခံစားခွင့်ပြုခဲ့ကြောင်း သိရသည်။

October 31, 2017














Copy Protected by Chetan's WP-Copyprotect.