စားသုံးသူအငြင်းပွားမှု ဖြေရှင်းရေးအဖွဲ့သို့ တိုင်ကြားသည့်အမှုများအနက် စားသောက်ကုန်များ၏ အရည်အသွေးပိုင်းသာမက ဝန်ဆောင်မှုပိုင်းနှင့် ပတ်သက်သော တိုင်ကြားမှုများပါ မြင့်တက်လာ

စားသုံးသူအငြင်းပွားမှု ဖြေရှင်းရေးအဖွဲ့သို့ တိုင်ကြားသည့်အမှုများအနက် စားသောက်ကုန်များ၏ အရည်အသွေးပိုင်းသာမက ဝန်ဆောင်မှုပိုင်းနှင့် ပတ်သက်သော တိုင်ကြားမှုများပါ မြင့်တက်လာ
Published 25 October 2017

ပြပွဲတစ်ခုတွင် ခင်းကျင်းပြသထားသည့် စားသုံးသူရေးရာဦးစီးဌာန၏ စားသုံးသူအကာအကွယ်ပေးရေး အသိပညာပေးပြခန်းအား တွေ့ရစဉ်

ယခုနှစ်ပိုင်းအတွင်း စားသုံးသူအငြင်းပွားမှု ဖြေရှင်းရေးအဖွဲ့သို့ တိုင်ကြားလာသည့်အမှုများအနက် စားသောက်ကုန်များ၏ အရည်အသွေးပိုင်းနှင့် ပတ်သက်သောအမှုများသာမက ဝန်ဆောင်မှုနှင့် ပတ်သက်သော တိုင်ကြားမှုများပါ မြင့်တက်လာကြောင်း စားသုံးသူရေးရာဦးစီးဌာနမှ ညွှန်ကြားရေးမှူး ဦးဆွေတင့်ကြူး၏ ပြောကြားချက်အရ သိရသည်။

စားသုံးသူ အငြင်းပွားမှုဖြေရှင်းရေးအဖွဲ့သို့ ၂၀၁၇ ခုနှစ်အတွင်း လက်ရှိအထိ တိုင်ကြားမှုစုစုပေါင်း ၄၅ မှုရှိပြီဖြစ်ကြောင်းနှင့် ၂၀၁၆ ခုနှစ်တစ်နှစ်တာအတွင်း တိုင်ကြားမှုပေါင်း ၄၆ မှုရှိခဲ့ကြောင်းနှင့် ယခင်က တိုင်ကြားလာသည့်အမှုများအနက် အများစုမှာ စားသောက်ကုန်များ၏ အရည်အသွေးနှင့် ပတ်သက်သောတိုင်ကြားမှုများဖြစ်ကြောင်းလည်း သိရသည်။

“တိုင်ကြားစာတွေအရ အရင်ကတော့ အစားအသောက်တွေပဲများတယ်။ ဘာလို့လည်းဆိုတော့ စားသုံးသူကာကွယ်ရေးဆိုတော့လည်း အစားအသောက်ကိုပဲ ပြေးမြင်ကြလို့ပါ။ တကယ်က ကုန်စည်တွေရော၊ ဝန်ဆောင်မှုတွေရော ပါပါတယ်။ အဓိက,က မြန်မာနိုင်ငံမှာ ဝန်ဆောင်မှုကဏ္ဍမှာ လစ်ဟာနေတဲ့အတွက် စားသုံးသူရေးရာဌာနက ဝန်ဆောင်မှုနဲ့ပတ်သက်လို့ စားသုံးသူတွေ စိတ်ကျေနပ်မှုမဖြစ်ရင် နစ်နာတယ်ထင်ရင် တိုင်ကြားတာတွေ ဖြေရှင်းပေးတယ်။ ဥပမာ ပစ္စည်းတစ်ခုကို အာမခံပေးတာမျိုးပေါ့။ ရောင်းတုန်းကတော့ ဘယ်လိုဆောင်ရွက်ပေးမယ်၊ ဘာညာပြောပြီး တကယ်လက်တွေ့မှာမဟုတ်ဘူးဆိုရင် ကျွန်တော်တို့ဆီမှာ တိုင်ကြားလို့ရတယ်။ ဥပဒေအရ အရေးယူလို့ရပါတယ်။ အခုနောက်ပိုင်းမှာ ဝန်ဆောင်မှုအပိုင်းတွေကို မကျေနပ်လို့တိုင်တာတွေ များလာတယ်။ ဥပမာ ခရီးသွားတယ်။ မူလသူ့မှာပါတဲ့ ကြေညာထားတဲ့ဝန်ဆောင်မှုကတစ်မျိုး၊ လက်တွေ့ကိုယ်သွားတဲ့အခါမှာ ဝန်ဆောင်မှုက ပြောင်းသွားတာမျိုးတွေပေါ့။ ကားအသစ်ဆိုပြီးပြောတယ် ပို့တော့အဟောင်းနဲ့ ပို့တာမျိုးတွေပေါ့။ ကျွန်တော်တို့ဌာနကို တိုင်ကြားလာလို့ရှိရင် ဖြေရှင်းပေးတာကျတော့ ၂၀၁၄ ခုနှစ် စားသုံးသူ အကာအကွယ်ပေးရေးဥပဒေအရ ဖြေရှင်းပေးပါတယ်။ တိုင်ကြားမှုခိုင်လုံတယ်ဆိုရင် သတိပေးတာ၊ ပြင်းထန်စွာသတိပေးတာ၊ ပြန်လည်ပေးလျော်ခိုင်းတာ၊ လုပ်ငန်းကို ခေတ္တရပ်ဆိုင်းတာ၊ နောက်တစ်ခု အမြဲတမ်းရပ်ဆိုင်းဖို့လိုတယ်ဆိုရင် သက်ဆိုင်ရာဌာနနဲ့ ညှိနှိုင်းလုပ်ဆောင်တာမျိုးတွေရှိတယ်” ဟု ဦးဆွေတင့်ကြူးက ပြောကြားသည်။

၂၀၁၆ ခုနှစ်အတွင်း တိုင်ကြားခဲ့သည့်အမှုများအနက် အရေးယူဆောင်ရွက်မှုအနေဖြင့် အရေးယူဆောင်ရွက်မှုပေါင်း ၂၃ မှုနှင့် စေ့စပ်ညှိနှိုင်းခဲ့မှု ၁၄ မှု၊ စုစုပေါင်း ၃၇ ခုကို လုပ်ဆောင်ခဲ့ကြောင်းနှင့် သတ်မှတ်စံချိန်စံညွှန်း အရည်အသွေး ကိုက်ညီမှုမရှိသော စားသောက်ကုန်၊ လူသုံးကုန်ပစ္စည်းများ ဈေးကွက်အတွင်း ဖြန့်ဖြူးရောင်းချနေသည်ကိုတွေ့ရှိပါက ရန်ကုန်တိုင်းဒေသကြီး စားသုံးသူအငြင်းပွားမှု ဖြေရှင်းရေးအဖွဲ့သို့ သတင်းပေးတိုင်ကြားနိုင်ကြောင်း သိရသည်။

Most Read

Most Recent