အောက်တိုဘာ ၁၆ ရက်က ဘရပ်ဆဲလ်ရှိ ဥရောပကော်မရှင်ရုံးအား ရိုက်ကူးထားသော ဓာတ်ပုံ (Photo : AFP)

မြန်မာနိုင်ငံရှိ ဘင်္ဂါလီမွတ်စလင်တို့၏ ဒေသများတွင် လုံခြုံရေးတပ်ဖွဲ့များက ရက်စက်ကြမ်းကြုတ်စွာ နှိမ်နင်းခဲ့သည် ဟုဆိုကာ ဥရောပသမဂ္ဂက မြန်မာစစ်ဘက်နှင့် ဆက်ဆံရေးကို ပြန်လည်ဖြတ်တောက်မည် ဖြစ်ကြောင်း သိရသည်။

အောက်တိုဘာ ၁၆ ရက်တွင် ဥရောပနိုင်ငံခြားရေး ဝန်ကြီးများက တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် အပါအဝင် မြန်မာထိပ်တန်း တပ်မတော် ခေါင်းဆောင်များကို လာရောက်ရန် ဖိတ်ကြားခြင်းများအား ဆိုင်းငံ့ထားရန် သဘောတူခဲ့ကြသည်။ ဗိုလ်ချုပ်မှူးကြီး မင်းအောင်လှိုင်သည် လွန်ခဲ့သည့်နှစ်က ဥရောပနိုင်ငံ များစွာသို့ သွားရောက်ခဲ့ပြီး ဥရောပသမဂ္ဂမှ ထိပ်တန်းစစ်ဘက်ဆိုင်ရာ ခေါင်းဆောင် တစ်ဦးကိုလည်း အိမ်ရှင်အဖြစ် လက်ခံတွေ့ဆုံခဲ့သည်။ ယခုဆုံးဖြတ်ချက်သည် မြန်မာအရပ်သား အစိုးရအဖွဲ့ခေါင်းဆောင် ဒေါ်အောင်ဆန်းစုကြည်နှင့် နိုင်ငံအတွင်း၌ သြဇာကြီးမားနေဆဲဖြစ်သော မြန်မာတပ်မတော်တို့နှင့် ဆက်ဆံရေးများ၌ အကြီးအကျယ် မြှုပ်နှံထားသော ကမ္ဘာ့အင်အားကြီးနိုင်ငံများကို ရင်ဆိုင်ရာ၌ အခက်အခဲများရှိကြောင်း ထင်ဟပ်ပြနေသည်။

ဒေါ်အောင်ဆန်းစုကြည်သည် ရခိုင်အရေးကိစ္စနှင့် ပတ်သက်၍ နိုင်ငံတကာ၏ ပြင်းထန်စွာ ဝေဖန်မှုများခံခဲ့ရပြီး လူ့အခွင့်အရေးအဖွဲ့များက မြန်မာလက်နက်ကိုင် တပ်မတော်ကို ပိုမိုပြင်းထန်သော အရေးယူဆောင်ရွက်မှုများ ပြုလုပ်ရန် တောင်းဆိုခဲ့ကြသည်။

Burma Capaign UK အဖွဲ့က ဥရောပသမဂ္ဂ၏ တုံ့ပြန်မှုသည် လုံလောက်ခြင်းမရှိဟု ပြစ်တင်ရှုတ်ချခဲ့သည်။ “မြန်မာ တပ်မတော်အရာရှိ တချို့ကို ဥရောပလာဖို့ ဖိတ်ကြားမှု ဆိုင်းငံ့ထားရုံလောက်က ရိုဟင်ဂျာတွေကို လူမျိုးစုလိုက် သုတ်သင်မှုကို တုံ့ပြန်ရာမှာ လုံးဝပျော့ညံ့တဲ့ ဆုံးဖြတ်ချက်ပါပဲ” ဟု အဆိုပါအဖွဲ့၏ ညွှန်ကြားရေးမှူး မက်ဖာမနာက ပြောကြားခဲ့သည်။ “ဒီအားနည်းတဲ့ တုံ့ပြန်မှုကို မြန်မာတပ်မတော်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကတော့ မတော်မတရားမှုတွေ ဆက်လုပ်ဖို့ မီးစိမ်းပြတာလို့ မှတ်ယူမှာပဲ” ဟုလည်း ၎င်းက ပြောကြားခဲ့သည်။

လူဇင်ဘတ်တွင် ပြုလုပ်သော ဥရောပသမဂ္ဂဝန်ကြီးများ အစည်းအဝေး၏ ဆုံးဖြတ်ချက်သည် ဗုဒ္ဓဘာသာဝင်များ လွှမ်းမိုးသော မြန်မာနိုင်ငံ အနောက်ပိုင်း ရခိုင်ပြည်နယ်ရှိ မွတ်စလင်ဒေသများတွင် လုံခြုံရေးတပ်များ၏ လုပ်ဆောင်ခဲ့မှုနှင့် အချိုးမျှတခြင်းမရှိဟု ဝေဖန်ခံခဲ့ရသည်။ မြန်မာလုံခြုံရေးတပ်များ၏ စစ်ဆင်ရေးကို ကုလသမဂ္ဂ လူ့အခွင့်အရေးအဖွဲ့ အကြီးအကဲက “လူမျိုးစုလိုက် သုတ်သင်မှု၏ ပြဋ္ဌာန်းစာအုပ်နမူနာ” ဟုပင် ခေါ်ဆိုခဲ့သည်။ ဥရောပသမဂ္ဂ အဖွဲ့ဝင်နိုင်ငံများသည် အကြီးတန်း မြန်မာတပ်မတော် အရာရှိများကို ဧည့်ခံခြင်းအား ရပ်ဆိုင်းလိုက်သကဲ့သို့ လက်တွေ့လုပ်ဆောင်နေသည့် ကာကွယ်ရေးဆိုင်ရာ ပူးပေါင်းဆောင်ရွက်မှု အားလုံးကိုလည်း ပြန်လည်သုံးသပ်မည်ဖြစ်သည်။

အပြုသဘောဆောင်သော ဖွံ့ဖြိုးမှုများနှင့်အညီ တုံ့ပြန်ရန် အသင့်ရှိသည်ဟူသည့် ရပ်တည်ချက်ရှိကြောင်း ပြောကြားခဲ့သော်လည်း ရခိုင်ပြည်နယ်၌ အခြေအနေရပ်များ တိုးတက်ခြင်း မရှိပါက ဥရောပသမဂ္ဂ အဖွဲ့ဝင်နိုင်ငံများ အနေဖြင့် နောက်ထပ်အရေးယူမှု နည်းလမ်းများကို စဉ်းစားမည် ဖြစ်ကြောင်းလည်း ဝန်ကြီးများက ပြောခဲ့သည်။ ဥရောပသမဂ္ဂက လက်နက်များသာမက ပြည်တွင်း၌ ဖိနှိပ်မှုများ ပြုလုပ်ရာတွင် အသုံးပြုနိုင်သည့် ကိရိယာ တန်ဆာပလာများကိုလည်း မြန်မာနိုင်ငံသို့ ရောင်းချခြင်း ဆက်လက်ပိတ်ပင် သွားမည်ဟု ဆိုသည်။

Ref : AFP