<

ရန်ကုန်တိုင်းဒေသကြီး အတွင်းရှိ စက်ရုံပေါင်း ၃၄၀၀ ကျော်တွင် ရေဆိုးစွန့်ပစ်သည့် စက်ရုံအရေအတွက် ၁၈၈ ရုံသာရှိ

ရန်ကုန်မြို့ စက်မှုဇုန်တစ်ခု အတွင်းရှိ အရက်ချက်စက်ရုံတစ်ရုံ ရေဆိုးစွန့်ပစ်နေသည်ကို တွေ့ရစဉ်

ရန်ကုန်တိုင်းဒေသကြီး အတွင်းရှိ စက်မှုဇုန် ၂၄ ဇုန်မှ စက်ရုံပေါင်း ၃၄၀၀ ကျော်တွင် စွန့်ပစ်ရေဆိုး စွန့်ပစ်သည့်စက်ရုံ အရေအတွက် ၁၈၈ ရုံသာရှိကြောင်း ရန်ကုန်မြို့တော် စည်ပင်သာယာရေးကော်မတီ ပတ်ဝန်းကျင် ထိန်းသိမ်းရေးနှင့် သန့်ရှင်းရေးဌာန ဒုတိယဌာနမှူး ဦးစောဝင်းမောင်က ပြောကြားသည်။

“ကျွန်တော်တို့က ပတ်ဝန်းကျင် ထိန်းသိမ်းရေးကို ဆောင်ရွက်ရတာ ဖြစ်တဲ့အတွက်ကြောင့် စက်မှုဇုန်တွေကိုလည်း ကော်မတီရဲ့ တာဝန်ထဲမှာ ပါတဲ့အတွက်ကြောင့် စက်မှုဇုန်တွေကို ဆက်စပ်ပြီး ဆောင်ရွက်ရတဲ့ အခါမှာ ဌာနကရလာတဲ့ စာရင်းဇယား အချက်အလက်များအရ ကျွန်တော်တို့ ဆက်သွယ် ဆောင်ရွက်နေရတဲ့ စက်မှုဇုန် ၂၄ ဇုန်ရှိပါတယ်။ အဲဒီအထဲမှာ စက်ရုံအရေအတွက် ၃၄၇၄ ရုံရှိပါတယ်။ အဲဒီအထဲမှာ ရေဆိုးစွန့်ပစ်တယ်ဆိုတဲ့ စက်ရုံ၊ များများစွန့်ပစ်တဲ့ စက်ရုံ ၁၈၈ ရုံရှိပါတယ်။ အဲဒီ ၁၈၈ ရုံမှာ Proper Treatment လုပ်ထားတဲ့ စက်ရုံ ၁၀ ရာခိုင်နှုန်းခန့်ပဲ ရှိပါတယ်။ ၁၉ ရုံ၊ ရုံ ၂၀ အဲဒီလောက်ပဲ ရှိပါတယ်။ ကျန်တဲ့စက်ရုံတွေက သတ်မှတ်ချက်နဲ့မညီ Proper Treatment မဖြစ် ဒီလိုစွန့်ပစ်တာတွေ တွေ့ရှိရပါတယ်” ဟု ပတ်ဝန်းကျင် ထိန်းသိမ်းရေးနှင့် သန့်ရှင်းရေးဌာနမှ ဒုတိယဌာနမှူး ဦးစောဝင်းမောင်က ပြောကြားသည်။

Industry Waste Water Quality Standards (As of Occupational Health Dept;) တွင် pH မှာ 6.0-9.6၊ Biological Oxygen Demand တွင် 20-60 ppm၊ Chemical Oxygen Demand တွင် <200 ppm၊ Total Solid တွင် up to 2000 ppm၊ Suspended Solid တွင် up to 500 ppm ရှိရမည်ဖြစ်ကြောင်း ၎င်းကဆက်လက် ပြောကြားသည်။

အထက်ပါ စံသတ်မှတ်ချက်များနှင့်အညီ စွန့်ပစ်နိုင်မှသာလျှင် အရည်အသွေးမီ ရေကောင်းရေသန့်များမှာ အများပြည်သူပိုင် ချောင်း၊ မြောင်းများ အတွင်းသို့ ရောက်ရှိမည်ဖြစ်ကြောင်း ၎င်းကဆိုသည်။

စက်မှုဇုန်ဆိုင်ရာ ပတ်ဝန်းကျင် ထိန်းသိမ်းရေး လုပ်ငန်းများနှင့် စပ်လျဉ်း၍ ပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာန အနေဖြင့် စက်ရုံများ၏ ပတ်ဝန်းကျင် ထိန်းသိမ်းရေးဆိုင်ရာ ကိစ္စရပ်များ စိစစ်ဆောင်ရွက် နိုင်ရန်အတွက် စက်မှုဇုန်တာဝန်ခံအဖွဲ့ ဖွဲ့စည်း၍ ကြပ်မတ်ဆောင်ရွက် လျက်ရှိကြောင်း၊ စက်မှုဇုန် ပတ်ဝန်းကျင် ထိန်းသိမ်းရေးဆိုင်ရာ ၀န်ဆောင်မှုကို ၂၀၁၆ ခုနှစ် ဒီဇင်ဘာ ၁ ရက်မှ စတင်ဆောင်ရွက်ခဲ့ကြောင်း သိရသည်။

စွန့်ပစ်ရေဆိုး ထုတ်လွှတ်သည့် စက်ရုံ၊ အလုပ်ရုံများအား ဒဏ်ရိုက်အရေးယူခြင်း ဆောင်ရွက်ရန်အတွက် ၂၀၁၇ ခုနှစ် ဇွန် ၁၃ ရက်တွင် ရန်ကုန်မြို့တော် စည်ပင်သာယာရေး ကော်မတီ၊ ကော်မတီဝင်များ၏ အစည်းအဝေး မှတ်တမ်း (၁၅/၂၀၁၇) အရ ပထမအကြိမ် ကျူးလွန်ပါက သတ်မှတ်ဒဏ်ငွေ၊ ဒုတိယအကြိမ် ကျူးလွန်ပါက သတ်မှတ်ဒဏ်ငွေ၏ နှစ်ဆ၊ တတိယအကြိမ် ကျူးလွန်ပါက သတ်မှတ်ဒဏ်ငွေ၏ သုံးဆ၊ စတုတ္ထအကြိမ် ကျူးလွန်ပါက စက်ရုံလုပ်ငန်းလိုင်စင် ပိတ်သိမ်းသည်အထိ ဆောင်ရွက်ရန်နှင့် စက်ရုံအမျိုးအစားအလိုက် သတ်မှတ်ဒဏ်ငွေမှာ ဒဏ်ငွေ ကျပ် ၅၀၀၀၀၊ တစ်သိန်း၊ နှစ်သိန်း၊ သုံးသိန်း ပေးဆောင်ရမည်ဖြစ်ကြောင်း သိရသည်။

မြန်မာနိုင်ငံရှိ စက်ရုံများ၏ ရာခိုင်နှုန်း ၉၀ သည် ရေဆိုးသန့်စင်သည့်စနစ် မပါရှိဘဲ ၁၀ ရာခိုင်နှုန်းခန့်သာ ရေဆိုးသန့်စင်သည့်စနစ်ရှိကြောင်း၊ အောက်တိုဘာ ၁၂ ရက် က ကုန်သည်စက်မှု အသင်းချုပ်တွင် ပြုလုပ်သည့် ကုန်ထုတ်လုပ်မှု လုပ်ငန်းများမှ ထွက်ရှိသော စွန့်ပစ်ရေဆိုးများကြောင့် ပတ်ဝန်းကျင် ညစ်ညမ်းမှု လျော့နည်းစေရေး အလုပ်ရုံဆွေးနွေးပွဲတွင် မြန်မာနိုင်ငံ စားသောက်ကုန်ထုတ်လုပ် တင်ပို့ရောင်းချသူများ အသင်း ဒုတိယဥက္ကဋ္ဌ ဦးစိန်သောင်းက မီဒီယာများ၏ မေးမြန်းမှုအား ဖြေကြားခဲ့ကြောင်း သိရသည်။

 

October 15, 2017














Copy Protected by Chetan's WP-Copyprotect.