မြန်မာနိုင်ငံဆိုင်ရာ ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးမှူး Ms.Renata Lok-Dessallien ၏ တာဝန်ထမ်းဆောင်မှုပြီးဆုံး

မြန်မာနိုင်ငံဆိုင်ရာ ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးမှူး Ms.Renata Lok-Dessallien ၏ တာဝန်ထမ်းဆောင်မှုပြီးဆုံး
Published 13 October 2017

Photo: United Nations Information Centre

မြန်မာနိုင်ငံဆိုင်ရာ ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးမှူးဖြစ်သူ Ms.Renata Lok-Dessallien ၏ မြန်မာနိုင်ငံတွင် လေးနှစ်ခန့် တာဝန်ထမ်းဆောင်မှု ယခုလကုန်တွင် ပြီးဆုံးပြီဖြစ်ကြောင်း မြန်မာနိုင်ငံဆိုင်ရာ ကုလသမဂ္ဂရုံးက အောက်တိုဘာ ၁၁ ရက် နေ့စွဲဖြင့် သတင်းထုတ်ပြန်ခဲ့ကြောင်း သိရသည်။

မြန်မာနိုင်ငံဆိုင်ရာ ကုလသမဂ္ဂရုံး၏ သတင်းထုတ်ပြန်မှု၌ မြန်မာနိုင်ငံဆိုင်ရာ ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးမှူး Ms.Renata Lok-Dessallien အနေဖြင့် မြန်မာနိုင်ငံ၌ တာဝန်ထမ်းဆောင်မှုသည် ယခုလကုန်တွင် ပြီးဆုံးတော့မည်ဖြစ်ကြောင်း၊ လမကုန်မီ ကျန်ရှိနေသေးသည့် အချိန်အတွင်း ကုလသမဂ္ဂ၏ အစီအစဉ်အရ ငြိမ်းချမ်းရေးနှင့် လုံခြုံရေး၊ လူ့အခွင့်အရေးများ တိုးမြှင့် ဆောင်ရွက်ရန်အပြင် မြန်မာနိုင်ငံမှ ပြည်သူအားလုံးအတွက် လူသားချင်းစာနာထောက်ထားမှုနှင့် ဖွံ့ဖြိုးရေးထောက်ပံ့မှု လုပ်ငန်းများကိုလည်း ဆက်လက် လုပ်ဆောင်သွားမည်ဖြစ်ကြောင်း ဖော်ပြထားသည်။

ထို့ပြင် Ms.Renata Lok-Dessallien အနေဖြင့် ရခိုင်ပြည်နယ်မြောက်ပိုင်းတွင် ဖြစ်ပေါ်နေသည့် ပဋိပက္ခများကို အဆုံးသတ်ရန် ဆက်လက် တိုက်တွန်းသွားမည်ဖြစ်ကြောင်းနှင့် လူသားချင်းဆိုင်ရာ ထောက်ပံ့မှု အကူအညီများကို အပြည့်အဝခွင့်ပြုရန်၊ IDP စခန်းများရှိ ဒုက္ခသည်များအား ၎င်းတို့၏ မူလနေရပ်များဆီသို့ ဘေးကင်းလုံခြုံစွာ ပြန်လည် နေထိုင်နိုင်ရန်အတွက်လည်း ကျန်ရှိနေသည့် ၎င်း၏သက်တမ်းကာလအတွင်း လုပ်ဆောင်ပေးသွားမည်ဟုလည်း သတင်းထုတ်ပြန်မှုတွင် ဖော်ပြထားသည်။

ဆက်လက်ပြီး Ms.Renata Lok-Dessallien က မြန်မာနိုင်ငံတွင် တာဝန်ထမ်းဆောင်ခဲ့သည့်ကာလအတွင်း ကုလသမဂ္ဂ၏ မူဝါဒများကို အကောင်အထည်ဖော်ခွင့်ရရန် ကူညီပေးခဲ့သည့် လုပ်ဖော်ကိုင်ဖက်များကို ကျေးဇူးတင်ရှိကြောင်းနှင့် မြန်မာနိုင်ငံရှိ ကုလသမဂ္ဂအဖွဲ့ကို ယုံကြည်မှုပေးခဲ့သည့် ကုလသမဂ္ဂ အထွေထွေအတွင်းရေးမှူးချုပ်ကိုလည်း အသိအမှတ်ပြု ကျေးဇူးတင်ရှိကြောင်း ရေးသားဖော်ပြထားသည်။

မြန်မာနိုင်ငံဆိုင်ရာ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးမှူး Ms.Renata Lok-Dessallien အနေဖြင့် မြန်မာနိုင်ငံတွင် တာဝန်ထမ်းဆောင်မှုပြီးဆုံးပြီ ဖြစ်သော်လည်း ကုသသမဂ္ဂဌာနချုပ်တွင် အခြားရာထူးတစ်ရပ်ဖြင့် ပြန်လည်တာဝန်ထမ်းဆောင်မည်ဖြစ်ကြောင်းလည်း သတင်းထုတ်ပြန်မှုအရ သိရသည်။

မြန်မာနိုင်ငံဆိုင်ရာ ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးမှူးနှင့် ကုလသမဂ္ဂဖွံ့ဖြိုးရေးအစီအစဉ် UNDP ၏ မြန်မာနိုင်ငံဆိုင်ရာ ဌာနေကိုယ်စားလှယ်အဖြစ်လည်း ပူးတွဲတာဝန်ထမ်းဆောင်ရသူ Ms.Renata Lok-Dessallien သည် ဘူလ်တန်၊ ဘင်္ဂလားဒေ့ရှ်နဲ့ တရုတ်နိုင်ငံတို့တွင် တာဝန်ထမ်းဆောင်ခဲ့သူဖြစ်ပြီး ၂၀၁၄ ခုနှစ် ဇန်နဝါရီမှစ၍ မြန်မာနိုင်ငံတွင် စတင်တာဝန်ထမ်းဆောင်ခဲ့ခြင်းဖြစ်ကြောင်း သိရသည်။

သို့ရာတွင် Ms.Renata Lok-Dessallien ၏ တာဝန်ထမ်းဆောင်မှု သက်တမ်းကုန်ဆုံးခြင်း သတင်းကို BBC သတင်းဌာနက ‘မြန်မာအခြေစိုက် ကုလကိုယ်စားလှယ်ပြန်ခေါ်ခံရ’ ခေါင်းစဉ်ဖြင့် သတင်းဖော်ပြခဲ့သည်။

Ms.Renata Lok-Dessallien သည် ၎င်းတာဝန်ထမ်းဆောင်နေစဉ်ကာလအတွင်း ဘင်္ဂါလီ (မူရင်းသတင်းတွင် ရိုဟင်ဂျာဟုဖော်ပြ) ကိစ္စနှင့်ပတ်သက်၍ ထိလွယ်ရှလွယ်ဖြစ်သည့်အတွက် မြန်မာအစိုးရနှင့် မျက်နှာမပျက်စေရန်အတွက် ဌာနထဲတွင် မဆွေးနွေးရန် အချိန်အတော်ကြာ တားမြစ်ထားခဲ့ကြောင်း BBC သတင်းဌာနက စက်တင်ဘာလအတွင်း စုံစမ်းဖော်ထုတ်သည့် သတင်းတစ်ရပ်ဖော်ပြခဲ့ကြောင်း BBC သတင်းဌာနမြန်မာပိုင်း၏ အောက်တိုဘာ ၁၁ ရက် သတင်းဖော်ပြမှုတွင် ရေးသားထားသည်။

ထို့ပြင် လူနည်းစုများအပေါ် အစိုးရတပ်မတော်က ညှဉ်းပန်းနှိပ်စက်သည်ဟု စွပ်စွဲမှုများ ထွက်ပေါ်နေသောဒေသများကိုလည်း လူ့အခွင့်အရေး ကိုယ်စားလှယ်များမသွားရန် Ms.Renata Lok-Dessallien သည် အားထုတ်ခဲ့သည်ဟု သိရှိကြောင်း၊ လွန်ခဲ့သည့် နှစ်ပတ်က ၎င်းအပေါ် ယုံကြည်မှု အပြည့်အဝရှိသည်ဟု ကုလသမဂ္ဂအတွင်းရေးမှူးချုပ်က ပြောကြားခဲ့ကြောင်း BBC မြန်မာပိုင်း၏ သတင်းဖော်ပြမှုတွင် ပါရှိသည်။

Ms.Renata Lok-Dessallien သည် မြန်မာနိုင်ငံမှ အောက်တိုဘာလကုန်တွင် ထွက်ခွာရမည်ဖြစ်သောကြောင့် ၎င်း၏ရာထူး ရွှေ့ပြောင်းခြင်းသည် ကုလသမဂ္ဂစံနှုန်းအနေဖြင့် ကြည့်မည်ဆိုပါက အလွန်မြန်သည်ဟု ပြောနိုင်ကြောင်း BBC မြန်မာပိုင်းက သတင်းရေးသားထားသည်။