အွန်လိုင်းပေါ်မှ အလှကုန်၊ အစားအသောက်နှင့် ဆေးဝါးအမျိုးမျိုး ဖြန့်ဖြူးသည့်စနစ် တစ်နေ့တခြား ကြီးထွားလျက်ရှိပြီး အခွန်လွတ်မှုများ ရှိသည့်အတွက် စနစ်တကျစိစစ်ပြီး ဥပဒေပါ ပြဋ္ဌာန်းချက်များအတိုင်း အရေးယူသွားမည်ဟု ရန်ကုန်တိုင်းဒေသကြီးအစိုးရ ပြောကြား

အွန်လိုင်းပေါ်မှ အလှကုန်၊ အစားအသောက်နှင့် ဆေးဝါးအမျိုးမျိုး ဖြန့်ဖြူးသည့်စနစ် တစ်နေ့တခြား ကြီးထွားလျက်ရှိပြီး အခွန်လွတ်မှုများ ရှိသည့်အတွက် စနစ်တကျစိစစ်ပြီး ဥပဒေပါ ပြဋ္ဌာန်းချက်များအတိုင်း အရေးယူသွားမည်ဟု ရန်ကုန်တိုင်းဒေသကြီး အစိုးရအဖွဲ့ စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက အောက်တိုဘာ ၁၁ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော်၊ ပဉ္စမပုံမှန် အစည်းအဝေး ဒသမနေ့တွင် ပြောကြားသည်။

ပန်းဘဲတန်းမြို့နယ် မဲဆန္ဒနယ်အမှတ် (၁) တိုင်းဒေသကြီး လွှတ်တော်ကိုယ်စားလှယ် ဦးသန်းနိုင်ဦးက ရန်ကုန်တိုင်းအတွင်း အွန်လိုင်းပေါ်မှနေ၍ တရားမ၀င် တင်သွင်းရောင်းချနေသော အလှကုန်၊ အစားအသောက်နှင့် ဆေးဝါးအမျိုးမျိုးတို့ကို တိုင်းဒေသကြီးအစိုးရ အနေနှင့် နိုင်ငံသားများ တရားဝင် ဆောင်ရွက်နိုင်ရန် အခြေအနေ ဖန်တီးပေးရန် အစီအစဉ် ရှိ၊ မရှိ သိရှိလိုကြောင်း မေးမြန်းရာတွင် စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက ပြန်လည်ဖြေကြား ခဲ့ခြင်းဖြစ်သည်။

ရန်ကုန်တိုင်းဒေသကြီးအတွင်း အလှကုန်ပစ္စည်း၊ အစားအသောက်နှင့် ဆေးဝါးပစ္စည်း အမျိုးမျိုးတို့ကို ဆိုင်ဖွင့်ရောင်းချ၍ ဖြစ်စေ၊ အွန်လိုင်းမှကြော်ငြာ၍ဖြစ်စေ ရောင်းချမည်ဆိုပါက ရန်ကုန်မြို့တော် စည်ပင်သာယာရေး ကော်မတီ၏ လုပ်ငန်းလိုင်စင်၊ မြန်မာနိုင်ငံ ဆေးဝါးကွပ်ကဲရေးဦးစီးဌာန (FDA)၏ ခွင့်ပြုမိန့်များကို ရယူပြီး ရောင်းချနိုင်ကြောင်း သိရသည်။

“တရားမ၀င် တင်သွင်းရောင်းချခြင်းနှင့် ခွင့်ပြုချက် လုပ်ငန်းလိုင်စင် မရှိဘဲနဲ့ ရောင်းချခြင်းကို လုံးဝခွင့်ပြုထားခြင်း မရှိပါဘူး။ တကယ်လို့ ဒီကိစ္စရပ်တွေကို ဖောက်ဖျက်ရင်တော့ ရန်ကုန်တိုင်းဒေသကြီး စားသုံးသူ အငြင်းပွားမှု ဖြေရှင်းရေးအဖွဲ့အနေနဲ့ စိစစ်အရေးယူ ဆောင်ရွက်ဖို့ရှိပါတယ်။ ထို့အတူ အလှကုန်၊ စားသောက်၊ ဆေးဝါးနှင့် ပြည်ပမှ တရားမ၀င် တင်သွင်းလာတဲ့ ကုန်ပစ္စည်းများ ရှိလာပါက တရားမ၀င် တင်သွင်းလာသည့် ပစ္စည်းများကို ကုန်စည်များ တားဆီးရေးနဲ့ ပတ်သက်ပြီး ရန်ကုန်ဆိပ်ကမ်းများမှာ အကောက်အခွန် ဦးစီးဌာနမှလည်းကောင်း၊ နယ်စပ်ဂိတ်များမှာလည်း အကောက်အခွန်ဦးစီးဌာနနှင့် စီးပွားရေးနှင့် ကူးသန်းရောင်းဝယ်ရေးဌာန၊ မြန်မာနိုင်ငံ ရဲတပ်ဖွဲ့တို့ ပါဝင်တဲ့ ပူးပေါင်းအဖွဲ့များနဲ့ ကြပ်မတ်စစ်ဆေးလျက် ရှိပါတယ်။ ရှောင်ကွင်းလမ်းများ၊ နယ်စပ်ဒေသမှ ၀င်ရောက်လာသည့် တရားမ၀င် ကုန်များကိုလည်း သက်ဆိုင်ရာဌာနများက အရေးယူ ဆောင်ရွက်လျက် ရှိပါတယ်” ဟု စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက ပြောကြားသည်။

“အခုလောလောဆယ်ဖြစ်နေတဲ့ အွန်လိုင်းပေါ်ကနေ ရောင်းချနေတဲ့ကိစ္စရပ်က အဓိကအားဖြင့်တော့ နှစ်ခုနဲ့ သက်ဆိုင်ပါတယ်။ FDA စစ်ဆေးခြင်း မပြုရတဲ့အတွက် အားလုံးက သုံးစွဲရန်သင့်၊ မသင့်ဆိုတဲ့ အန္တရာယ်ရှိ မရှိဆိုတဲ့ အချက်အပေါ် မူတည်ပါ တယ်။ နောက်တစ်ချက်ကတော့ အွန်လိုင်းပေါ်ကနေ ရောင်းချပြီးတော့ အိမ်တိုင်ရာရောက် ရောင်းချတဲ့အတွက် တချို့နေရာမှာ အခွန်များလွတ်နေတဲ့ အပိုင်းလည်း ရှိပါတယ်။ ဒါကြောင့်မို့ သေချာစနစ်တကျစိစစ်ဖို့ လိုနေပါပြီ။ ရန်ကုန်တိုင်းဒေသကြီး အပါအ၀င် မြန်မာနိုင်ငံ တစ်ဝန်းလုံးမှာ အွန်လိုင်းကနေ ဖြန့်ဖြူးနေတဲ့စနစ်က တစ်နေ့တခြား ကြီးထွားလျက်ရှိပါတယ်” ဟု၎င်းက ပြောကြားသည်။

စားသုံးသူများ နစ်နာမှု မရှိစေရေးအတွက် နစ်နာမှုများ ဖြစ်ပေါ်လာခဲ့ပါက အကာအကွယ် ပေးနိုင်ရေးအတွက် စားသုံးသူ အကာအကွယ်ပေးရေး ဥပဒေပုဒ်မ ၁၄ တွင် အွန်လိုင်းမှ ကြော်ငြာရောင်းချခြင်း လုပ်ငန်းများနှင့် ဆက်နွှယ်၍ ကုန်စည်၏ အရည်အသွေး၊ အရေအတွက်၊ ကုန်စည်တွင် ပါဝင်သော ပစ္စည်းများ၊ ကုန်စည်အား အသုံးပြုပုံ၊ ကုန်စည်၏ ဈေးနှုန်း၊ ကုန်စည်၏ ၀န်ဆောင်မှုနှုန်းထားများနှင့် ကုန်စည် သို့မဟုတ် ၀န်ဆောင်မှုကို ပေးအပ်နိုင်သည့် အချိန်နှင့် စပ်လျဉ်းသည့် စားသုံးသူများအား လိမ်လည်ထားသော ကြော်ငြာများ၊ ကုန်စည် (သို့မဟုတ်) ၀န်ဆောင်မှု၏ အာမခံပေးထားမှုအပေါ် လိမ်လည်ထားသော ကြော်ငြာများ၊ ကုန်စည် (သို့မဟုတ်) ၀န်ဆောင်မှုနှင့် စပ်လျဉ်း၍ မဟုတ်မမှန်သော သတင်းအချက်အလက်များ ပါဝင်သည့် ကြော်ငြာများ၊ ကုန်စည်နှင့် ၀န်ဆောင်မှုများ၊ ကုန်စည် (သို့မဟုတ်) ၀န်ဆောင်မှုကို အသုံးပြုခြင်းဖြင့် အန္တရာယ်ရှိမှုကို အသိပေးခြင်း မရှိသော ကြော်ငြာများ၊ သက်ဆိုင်သူ၏ ခွင့်ပြုချက်ကို မရဘဲ တစ်စုံတစ်ဦး (သို့မဟုတ်) အဖြစ်အပျက်ကို အသုံးပြုထားသော ကြော်ငြာများ၊ ဥပဒေပြဋ္ဌာန်းချက်များ၊ လူမှုကျင့်ဝတ်များကို ဖောက်ဖျက်သော ကြော်ငြာများကို မဆောင်ရွက်ရဟု ဖော်ပြပါရှိကြောင်း သိရသည်။

“အစားအသောက်ဆေးဝါး၊ အလှကုန် ထုတ်လုပ်ဖြန့်ဖြူး ရောင်းချခြင်းအတွက် မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာန (FDA) ဖွဲ့စည်းထားပြီးတော့ အဲဒီ FDA ရဲ့ခွင့်ပြုချက်ရရှိပြီးမှသာလျှင် ပြဋ္ဌာန်းထားသော အစားအသောက် ဆေးဝါးဥပဒေနဲ့အညီ လိုက်နာဆောင်ရွက်ရမှာ ဖြစ်ပါတယ်။ ထို့ပြင် ရန်ကုန်တိုင်းဒေသကြီး အခြေပြုလုပ်ငန်းများ ဆောင်ရွက်မည် ဆိုပါက ရန်ကုန်မြို့တော် စည်ပင်သာယာရေး ကော်မတီ၏ လုပ်ငန်းလိုင်စင်များ လိုအပ်မှာ ဖြစ်ပါတယ်” ဟု ၀န်ကြီးဦးမြင့်သောင်းက ဆက်လက် ပြောကြားသည်။

စီးပွားရေး လုပ်ငန်းရှင်များ အနေဖြင့် ဥပဒေပါ ပြဋ္ဌာန်းချက်များကို လိုက်နာမှုမရှိဘဲ ပြဋ္ဌာန်းချက် တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်း ခံရပါက သုံးနှစ်ထက်မပိုသော ထောင်ဒဏ်၊ ကျပ်ငါးသိန်းထက် မပိုသောငွေ ဒဏ်ဖြစ်စေ၊ ဒဏ်ငွေနှစ်ရပ်စလုံးကိုဖြစ်စေ ချမှတ်ခြင်းခံရမည်ဟု စားသုံးသူ အကာအကွယ်ပေးရေး ဥပဒေတွင် ပြဋ္ဌာန်းထားကြောင်း စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်း၏ ပြောကြားချက်အရ သိရသည်။