အနောက်ဘက်နယ်စပ် ရခိုင်အမျိုးသားနယ်မြေ ပြန်လည်တည်ဆောက်ရေး အထောက်အကူပြုကော်မတီ (ယာယီ) မောင်တောဒေသသို့ ပထမအကြိမ်ကွင်းဆင်း

အနောက်ဘက်နယ်စပ် ရခိုင်အမျိုးသားနယ်မြေ ပြန်လည်တည်ဆောက်ရေး အထောက်အကူပြုကော်မတီ (ယာယီ) မောင်တောဒေသသို့ ပထမအကြိမ်ကွင်းဆင်း
Published 4 October 2017

အနောက်ဘက်နယ်စပ် ရခိုင်အမျိုးသား နယ်မြေပြန်လည်တည်ဆောက်ရေး အထောက်အကူပြုကော်မတီ (ယာယီ) ဥက္ကဋ္ဌဒေါက်တာ အေးချမ်း ဦးဆောင်သည့်အဖွဲ့ မောင်တောဒေသသို့ ကွင်းဆင်းကာ ဒေသခံများနှင့် တွေ့ဆုံပြီး ဒေသခံများ၏အသံကို နားထောင်ခဲ့ကြောင်း သိရသည်။

အဆိုပါကော်မတီသည် အောက်တိုဘာ ၂ ရက်မှ အောက်တိုဘာ ၃ ရက်အထိ ကွင်းဆင်းခဲ့ခြင်းဖြစ်ပြီး မောင်တောတောင်ပိုင်းတွင် အင်းဒင်ကျေးရွာသားများနှင့် တွေ့ဆုံမေးမြန်းခဲ့ပြီး မောင်တောမြို့မိမြို့ဖများ၊ လူမှုအဖွဲ့အစည်းများနှင့် တွေ့ဆုံကာ လက်ရှိ မြေပြင်အခြေအနေများနှင့် ပတ်သက်ကာ ရခိုင်တိုင်းရင်းသားများ အနောက်ဘက်နယ်စပ်တွင် ရေရှည်နေထိုင်နိုင်ရေး အကြံပြုချက်များကို မှတ်တမ်းတင်ခဲ့ကြောင်း သိရသည်။

အလားတူ မောင်တောမြို့နယ်မြောက်ပိုင်း ကြိမ်ချောင်းကျေးရွာအထိ သွားရောက်ကာ မြေပြင်အခြေအနေများကို လေ့လာခဲ့ပြီး ကြိမ်ချောင်းကျေးရွာရှိ တစ်ရွာလုံးမီးရှို့ခံရပြီး ပြောင်းရွှေ့နေရသည့် ခုံတိုင်မြိုတိုင်းရင်းသား ကျေးရွာသားများ၊ ခမောင်းဆိပ် ရဲဘော်ကျကျေးရွာမှ သတ်ဖြတ်ခံရသူများ၏ ကျန်ရှိသည့်မိသားစုဝင် ဟိန္ဒူဘာသာဝင်များ၊ ကြိမ်ချောင်းကျေးရွာမှ နေရပ်မစွန့်ခွာဘဲ ကျန်ရှိသည့် ရခိုင်တိုင်းရင်းသားများနှင့် တွေ့ဆုံမေးမြန်းခဲ့သည်။

ဒေသခံအများစုက ဘင်္ဂါလီများနှင့် နီးကပ်စွာ မနေရဲတော့ကြောင်း ပြောဆိုကြပြီး တစ်ဖက်နိုင်ငံသို့ ထွက်ခွာသွားသည့် ဘင်္ဂါလီများကို ပြန်လည်လက်ခံနေရာချထားလျှင် တိုင်းရင်းသားကျေးရွာများနှင့် အဝေးတွင်ထားရှိစေလိုကြောင်း ပြောကြားသည်။

ခုံတိုင်ကျေးရွာသားများကလည်း လက်ရှိတွင် ကျေးရွာသို့မပြန်ရဲတော့ဘဲ လုံခြုံရေးရှိမှ နေထိုင်နိုင်မည်ဖြစ်ကြောင်း ပြောကြားသည်။

ကွင်းဆင်းလေ့လာရခြင်းနှင့် ပတ်သက်ပြီး အနောက်ဘက်နယ်စပ် ရခိုင်အမျိုးသားနယ်မြေ ပြန်လည်တည်ဆောက်ရေး အထောက်အကူပြုကော်မတီ (ယာယီ) အတွင်းရေးမှူး ဦးသန်းထွန်းက “ကျွန်တော်တို့ကော်မတီက ရသေ့တောင်၊ မြောက်ဦးဒေသကိုသွားပြီး နေရပ်စွန့်ခွာသူတွေနဲ့ တွေ့ဆုံမေးမြန်းပြီးပြီ။ အခုမောင်တောကို ကွင်းဆင်းလာတဲ့အခါ မြေပြင်မှာ တကယ့်အနေအထားနဲ့ ဒေသခံတွေရဲ့ သဘောထားအမြင်ကို မေးမြန်းတာဖြစ်ပါတယ်။ ဒီနယ်မြေကို ကျွန်တော်တို့ ဘယ်လိုတည်ဆောက်မလဲဆိုတာကို စဉ်စားတဲ့အခါ ဒီဒေသက ဒေသခံတွေရဲ့ သဘောထားကို အစိုးရက အလေးထားဖို့လိုပါတယ်” ဟုပြောကြားသည်။

အနောက်ဘက်နယ်စပ်ဒေသ ရခိုင်အမျိုးသားနယ်မြေ ပြန်လည်တည်ဆောက်ရေး အထောက်အကူပြုကော်မတီ (ယာယီ) ကို ဘက်ပေါင်းစုံ ပျက်စီးပြိုကွဲနေသော အနောက်ဘက်နယ်စပ်ဒေသ ရခိုင်အမျိုးသားနယ်မြေကို အခိုင်အမာ ပြန်လည်တည်ဆောက်ရန် ရည်ရွယ်ချက်ဖြင့် ဖွဲ့စည်းခဲ့ခြင်းဖြစ်ပြီး လုပ်ငန်းစဉ်များအနေဖြင့် အနောက်ဘက်ဒေသမှ ဒေသခံပြည်သူများနှင့် ယာယီတိမ်းရှောင်နေရသော ဒုက္ခသည်များအား စိတ်ပိုင်းနှင့် ရုပ်ပိုင်းဆိုင်ရာ လုံခြုံမှုပေးနိုင်ရန်၊ အနောက်ဘက်နယ်စပ်ရှိ ဒေသခံတိုင်းရင်းသားများ၏ ဘဝလုံခြုံရေး၊ နယ်မြေတည်တံ့ခိုင်မြဲရေးနှင့် လူမှုစီးပွား ဖွံ့ဖြိုးတိုးတက်ရေးတို့ကို ပံ့ပိုးကူညီသွားရန်၊ ရခိုင်ရေးရာ ကိစ္စရပ်များကို ကာကွယ်ရန်နှင့် ရပိုင်ခွင့်များကို ဥပဒေဘောင်အတွင်းမှ တောင်းဆိုသွားရန်တို့ဖြစ်ကြောင်း သိရသည်။

နာယကအဖွဲ့တွင် အလိုတော်ပြည့် ဆရာတော်ကြီး၊ ဦးဖေသန်း၊ ဦးထွီးလှ၊ အကြံပေးအဖွဲ့တွင် ဦးသာပွင့်၊ ဦးဦးလှစော၊ ဒေါ်ခင်စောဝေတို့ပါဝင်ပြီး အလုပ်အမှုဆောင်အဖွဲ့တွင် ဥက္ကဋ္ဌအဖြစ် ဒေါက်တာအေးချမ်း၊ ဒုဥက္ကဋ္ဌ (၁) ဦးခင်မောင်ကြီး၊ ဒုဥက္ကဋ္ဌ (၂) ဦးမောင်မောင်ကျော်၊ အတွင်းရေးမှူး ဦးသန်းထွန်း၊ တွဲဖက်အတွင်းရေးမှူးများအဖြစ် ဦးခိုင်ဆန်းအောင်၊ ဦးအောင်မင်းဦး၊ ဦးညီညီမောင်၊ ဦးဦးကျော်သန်းတို့ပါဝင်ပြီး ဘဏ္ဍာရေးကော်မတီတွင် ဘဏ္ဍာရေးမှူး ဦးစံထွန်းမောင်၊ ဒုတိယဘဏ္ဍာရေးမှူး ဦးမောင်မောင်၊ စာရင်းစစ်အဖွဲ့တွင် ဦးသင်္ခါကျော် (ပ-ခေါင်းဆောင်)၊ ဦးစံသိန်း (ဒု-ခေါင်းဆောင်)၊ ရုံးအဖွဲ့တွင် ဦးအောင်သိန်း၊ ဦးမောင်မောင်စော၊ ဦးစံထွန်းမောင်၊ ဦးကျော်စိုးသိန်း၊ ဦးကျော်သန်းတို့ပါဝင်ပြီး ပြန်ကြားရေးအဖွဲ့တွင် ဦးခိုင်မြတ်ကျော် (ပ-ခေါင်းဆောင်)၊ ဦးကျော်ကျော်နိုင်တို့ ပါဝင်သည်။

ကော်မတီတွင် ဆရာတော်ကြီးအပါအဝင် စုစုပေါင်း ၂၅ ဦးဖြင့် ဖွဲ့စည်းထားခြင်းဖြစ်သည်။

အနောက်ဘက်နယ်စပ်ဒေသ ရခိုင်အမျိုးသားနယ်မြေ ပြန်လည်တည်ဆောက်ရေး အထောက်အကူပြုကော်မတီ (ယာယီ) ကို စက်တင်ဘာ ၄ ရက်က စတင်ဖွဲ့စည်းခဲ့သည်။

 

Most Read

Most Recent